Ադրբեջանի ոստիկանությունը չի հետաքննում ընտրություններում անկախ դիտորդի ծեծի մասին գործը

Ադրբեջանի իրավապահ մարմինները փորձում են կոծկել Ժալյա Բայրամովայի ծեծի մասին գործը, քանի որ նա փորձել է խանգարել ընտրությունների ընթացքում տեղի ունեցած զեղծարարությունները։ Այդպես է կարծում Ժալյան ու նրա հայրը՝ ընդդիմադիր քաղաքական գործիչ Գուբադ Իբադօղլուն։

Ժալյային ծեծած կինն ինքն է բողոք գրել, և Կենտրոնական ընտրական հանձնաժողովի նախագահ Մազահիր Փանահովը նույնպես Բայրամովայի դեմ է տրամադրված։

• Ամեն ինչ Ադրբեջանի խորհրդարանական ընտրությունների մասին՝ մեկ րոպեում

• Ադրբեջանում ընտրությունների վերջաբանը։ Ի՞նչն էր սխալ և ինչո՞ւ։ Կարծիք

Բռնություն ընտրատեղամասում

Արտահերթ խորհրդարանական ընտրություններն Ադրբեջանում կայացել են փետրվարի 9–ին։ Դրանցում հերթական անգամ հաղթել է իշխող «Ենի Ազերբայջան» կուսակցությունը։ Տեղի անկախ դիտորդների և միջազգային կազմակերպությունների մեծ մասի կարծիքով՝ դրանք ոչ ժողովրդավարական են եղել, և բազում խախտումներ են տեղի ունեցել։ 

Ժալյա Բայրամովան տարածքային ընտրական հանձնաժողովի անդամ է եղել Ադրբեջանի հարավում։ Նա հեռախոսով նկարահանել է քվեաթերթիկների տրամադրման գործընթացը, սակայն նրան ինչ–որ կին է խանգարել, որը կադրում է հայտնվել։ Կինը ոչ ընտրող է եղել, ոչ հանձնաժողովի անդամ, ոչ դիտորդ, և ընդհանրապես չպետք է ընտրատարածքում գտնվեր։ Կինը Ժալյային հատակին է գցել և ուժեղ ծեծել նրան։ Դա տեսանկարահանվել է, և տեսանյութը համացանցում է հայտնվել։ 

Ըստ Գուբադ Իբադօղլուի՝ Բաքվի մասնավոր հիվանդանոցներից մեկում գրանցվել են Ժալյայի ստացած վնասվածքները, սակայն հետո իշխանությունների ճնշման տակ ոչնչացվել է այդ փաստաթուղթը։ Այդ մասին գրում է «Կավկազսկի ուզելը»։ 

«Ինքն է մեղավոր»

Ընտրական հանձնաժողովի ղեկավար Մազահիր Փանահովը պաշտպանում է Ժալյային ծեծած կնոջը։ Նա հայտարարում է, որ ծեծված աղջիկն ինքն է մեղավոր, նա չպետք է տեսանկարահաներ այդ կնոջը, և դրա համար պատժվելու է։ 

Իրավունքի ոլորտի փորձագետ Ալեսքեր Մամեդլին ասում է, որ Ժալյան տեսանկարահանելու լիակատար իրավունք է ունեցել։

«Այո, ըստ սահմանադրության, քաղաքացին կարող է առարկել և դեմ լինել, որ իրեն տեսանկարահանեն առանց իր համաձայնության։ Սակայն դա վերաբերում է մասնավոր կյանքին։ Ընտրատեղամասը հանրային վայր է, իսկ ընտրությունները համապետական միջացառում են», — բացատրում է նա։ 

Մամեդլին կարծում է, որ ծեծի կադրերը դատախազությանը բոլոր հիմքերն ընձեռում են քրեական գործ հարուցելու համար նույնիսկ առանց տուժածի բողոքի։

Քննիչը, որը հետաքննում է Բայրամովայի բողոքն, ու գլխավոր դատախազությունը մեկնաբանություններից զերծ են մնում։