Վրաստանը նավթամթերքի մեկանգամյա անվճար տարանցում կապահովի Ադրբեջանից Հայաստան
Ադրբեջանից ՀՀ վառելիքի մատակարարում Վրաստանով
Վրաստանի էկոնոմիկայի և կայուն զարգացման նախարարությունը մեկնաբանել է ադրբեջանական լրատվամիջոցներում հրապարակված տեղեկություններն այն մասին, թե Վրաստանի սակագները խոչընդոտում են երկաթուղով Ադրբեջանից Հայաստան վառելիքի մատակարարմանը: Նախարարությունը հայտնել է, որ հարևան երկրներից ստացել է Ադրբեջանից Հայաստան վառելիքի մեկանգամյա տարանցման հարցում, որը Վրաստանը կիրականացնի անվճար:
«Այս տարվա դեկտեմբերի 5-ին Վրաստանի կառավարությունը գործընկեր երկրներից ստացել է Վրաստանի տարածքով Ադրբեջանից Հայաստան վառելիքի մեկանգամյա տարանցիկ փոխադրման խնդրանք։ Վրաստանի վարչապետ Իրակլի Կոբախիձեի որոշմամբ՝ «Վրացական երկաթուղի» ընկերությանն անմիջապես հանձնարարվել է անվճար իրականացնել այս բեռի միանվագ փոխադրումը։
Այս որոշումը ներկայացվել է պաշտոնական կողմերին։ Վրաստանը եղել և մնում է Հայաստանի և Ադրբեջանի ռազմավարական և հուսալի գործընկերը։ Մենք միշտ եղել և մնում ենք տարածաշրջանում խաղաղության և համագործակցության կողմնակիցներ»,- ասված է հայտարարության մեջ։
2025 թվականի դեկտեմբերի 5-ին ադրբեջանական լրատվամիջոցները հաղորդեցին Ադրբեջանի և Հայաստանի իշխանությունների միջև նոյեմբերի 28-ին տեղի ունեցած հանդիպման մասին: Աղբյուրների փոխանցմամբ՝ քննարկված հիմնական հարցը ադրբեջանական նավթի և նավթամթերքի Հայաստան արտահանումն էր, որը կարող է տնտեսական դիվիդենտներ բերել Բաքվին և Երևանին:
Երկու երկրների միջև ուղիղ երկաթուղային կապի բացակայության պատճառով Վրաստանի տարածքով տարանցումը դիտարկվում է որպես գործարքի իրականացման միակ ճանապարհ։
ԶԼՄ-ները նշել էին, որ Ադրբեջանը Վրաստանից խնդրել է ներկայացնել փոխադրումների սակագներ, իսկ վրացական կողմը ներկայիս սակագնից 20 անգամ ավելի բարձր գին է մատնանշել: Ադրբեջանական լրատվամիջոցների փոխանցմամբ՝ այն ընթացքում, երբ Հարավային Կովկասն ունի հակամարտության տրամաբանությունից զարգացման տրամաբանության անցում կատարելու եզակի հնարավորություն, Թբիլիսիի վարքագիծն այս անցումային շրջանը ձգձգելու փորձ է։
«Այս ամենը խաթարում է տարածաշրջանային խաղաղության ընդհանուր դինամիկան և ի ցույց է դնում համատեղ բարգավաճման տարածքի ստեղծմանը մասնակցելու դժկամությունը»,— գրում է հոդվածի հեղինակ Մաքսուդ Սալիմովը։
Անցյալ շաբաթ ադրբեջանական մեկ այլ կառավարամետ պարբերական՝ «Կալիբր»-ը հրապարակել էր հոդված, որի հեղինակ Սամիր Վելիևը, հիմնվելով վարորդների պատմությունների վրա, նկարագրում էր, թե ինչպես է վերջերս փոխվել սահմանի վրացական կողմի վերաբերմունքը ադրբեջանցի վարորդների նկատմամբ։
Հեղինակի խոսքով՝ վարորդները բախվում են կոպիտ վերաբերմունքի և օրենքի չհարգման դեպքերի. նրանց մի քանի օր պահում են սահմանին, իսկ որոշ վարորդներ նույնիսկ հիշում են, թե ինչպես են իրենց ծաղրելով հարցրել՝ «ե՞րբ կբացվի Զանգեզուրի միջանցքը» և առաջարկել գնալ այդ ճանապարհով։
Հոդվածում կա ենթադրություն, թե Թբիլիսիի քաղաքականության այս փոփոխությունները կարող են կապված լինել նրա «հյուսիսային հարևանի» կամ «վրացական կառավարությունում Հայաստանի շահերը ներկայացնողների» հետ։
Հետևեք մեզ — Facebook | Youtube
Ադրբեջանից ՀՀ վառելիքի մատակարարում Վրաստանով
