1988-1992 թվականներին Ադրբեջանից բռնի տեղահանվածները, որոնք չունեն բնակարան և վերջին 10 տարվա ընթացքում իրենց պատկանող անշարժ գույք չեն օտարել, բնակարանի գնման վկայագիր կստանան:
2020-2021 թթ. ընթացքում ծրագիրն իրականացվել է մայրաքաղաք Երևանում, այժմ նախատեսվում է այն իրագործել մարզերում:
Հայաստանի կառավարությունը մարտի 10-ի նիստի ժամանակ նման որոշում է ընդունել:
Գործադիրի որոշմամբ՝ այս տարի բնակարանների գնման վկայագրեր կստանան 1988-1992 թվականներին Ադրբեջանից բռնի տեղահանված և բնակարանի առաջնահերթ կարիք ունեցող փախստականները:
2020-2021 թթ․ ընթացքում ծրագիրն իրականացվել է մայրաքաղաք Երևանում, այժմ նախատեսվում է այն իրագործել մարզերում:
Ծրագրի շահառու չեն կարող դառնալ այն քաղաքացիները, որոնք ունեն սեփականության իրավունքով իրենց պատկանող բնակարան կամ վերջին 10 տարվա ընթացքում վաճառել են իրենց բնակարանը կամ հանրակացարանային սենյակը։
Շահառու են համարվում նշված պայմանին բավարարող և ՀՀ մարզերից որևէ մեկում ժամանակավորապես բնակվող անձինք:
Նախկինում ընդունված որոշման համաձայն՝ Երևանում բնակվող շահառուները բնակարան էին ձեռք բերում ՀՀ ցանկացած բնակավայրում:
Մարզաբնակները, սակայն, կարող են բնակարան գնել միայն այն մարզի համայնքներից մեկում, որտեղ հաշվառված են։
Ըստ նախագծի հիմնավորման՝ այս կարգավորման նպատակը մարզերի համաչափ զարգացումն ապահովելն է:
ՀՀ մարզերում բնակարանի գնման վկայագիրների տրամադրման կարգն ու պայմանները հստակեցնող որոշման նախագիծը մշակվել է ՀՀ ՏԿԵՆ Միգրացիոն ծառայության կողմից։
Տարածքային կառավարման և ենթակառուցվածքների նախարար Գնել Սանոսյանի փոխանցմամբ՝ Ադրբեջանից բռնի տեղահանված և ժամանակավոր կացարաններում ապրող անձանց բնակարանի գնման վկայագիր տրամադրելու գործընթացը 2004-2006 թթ.-ին իրականացվել է մարզերում, 2020-21 թթ.-ին՝ մայրաքաղաք Երևանում՝ առաջին անգամ:
«Երևանում շահառու էր ճանաչվել 270 ընտանիք: Բյուջեն 3,7 մլրդ դրամ էր, որից 2,4 մլրդ դրամն արդեն ծախսվել է, 175 ընտանիք բնակարան է գնել: Գումարի մյուս մասը նոտարների մոտ է, իրականացվում է գնման գործընթաց»,- գործադիրի նիստում հայտարարել է Սանոսյանը:
Մարզերում ԲԳՎ տրամադրելու համար 2022 թ.-ի բյուջեից ծախսվելու է 1,4 մլրդ դրամ, որը նախատեսված է 254 ընտանիքի համար:
Բնակարանի գնման վկայագրերի արժեքը հաշվարկվելու է տվյալ մարզում անշարժ գույքի շուկայի՝ 2021 թ. երկրորդ կիսամյակի միջինացված գներով՝ 1 քառակուսի մետրի համար։
Կառավարության որոշմամբ՝ մարզաբնակ շահառուներին բնակարանի գնման վկայագիր տրամադրելու գործընթացում ներգրավվելու են նաև մարզպետարանների աշխատակիցները: Նախարար Սանոսյանը վստահեցրել է՝ քաղաքացիները կարիք չեն ունենալու փաստաթղթերի հետ կապված հարցերով գալ մայրաքաղաք:
