Ադրբեջանական ոստիկանությունը խուզարկություն է անցկացրել «Եհովայի վկաներ» կրոնական կազմակերպության անդամների բնակարաններում

Բաքվի Ղարադաղի շրջանի ոստիկանությունը Կրոնական կառույցների հետ աշխատանքի պետական կոմիտեի աշխատակիցների հետ համատեղ խուզարկություններ է անցկացրել Բաքվից 20կմ դեպի արևմուտք գտնվող Լոքբաթան ավանի երկու քաղաքացիների բնակարաններում:
Խուզարկության արդյունքում «կասեցվել են Սալմազ Օրուջևայի և Սևիլ Աղալիևայի բնակարաններում «Եհովայի վկաներ» կրոնական կազմակերպության անդամների ապօրինի հավաքները: Երկու հասցեներում 33 մարդ է հայտնաբերվել, որոնցից 10-ը՝ փոքր տարիքի երեխաներ, աղանդի քարոզ պարունակող բազմաթիվ գրականություն է հայտնաբերվել և առգրավվել», ասված է Կրոնական կառույցների հետ աշխատանքի պետական կոմիտեի մամուլի ծառայության հաղորդագրությունում:

Փաստի առթիվ հետաքննությունը և քննչական միջոցառումները շարունակվում են:
Կրոնական կառույցների հետ աշխատանքի պետական կոմիտեի տվյալներով՝ «Ադրբեջանի տարածքում 17 կրոնական կազմակերպություն է գործում, 5-6 կազմակերպությունների գործունեություն մեծ կասկածներ է առաջացնում, այդ թվում՝ «Եհովայի վկաներ» և «Յոթերորդ օրվա ադվենտիստներ» կազմակերպություններինը»:

Եհովայի վկաներ» կազմակերպությունը քրիստոնեական ուղղություն է, որն ամբողջ աշխարհում 8.5մլն անդամ ունի, այսինքն՝ նրանց թիվը համադրելի է Ադրբեջանի բնակչության հետ:

Սա այդ ուղղության հետևորդների հետապնդման առաջին դեպքը չէ: Այսպես, 2010թ-ին Ադրբեջանի պաշտպանության նախարարությունը Եհովայի վկաներին մեղադրել է, որ նրանք, ի թիվս այլ ոչ ավանդական կրոնական կազմակերպությունների և եկեղեցիների, համագործակցում են Հայ առաքելական եկեղեցու և Հայաստանի հատուկ ծառայությունների հետ:

Եհովայի վկաները չեն մասնակցում ընտրություններին, հրաժարվում են երգել պետական հիմնը, հարգանք մատուցել պետական խորհրդանիշներին:

Նրանք չեն անդամակցում որևէ քաղաքական կուսակցության և հասարակական-քաղաքական կազմակերպության: Եհովայի վկաները չեն պրոպագանդում որևէ

քաղաքական կուսակցություն և իրենց թեկնածությունները չեն առաջադրում ընտրությունների ժամանակ:

Նրանց համար անընդունելի է ծառայությունը բանակում, անգամ եթե ծառայությունից հրաժարվելը քրեական պատասխանատվություն և ազատազրկում է ենթադրում: