Ադրբեջանական «Ղարաբաղը» ջախջախել է վրացական «Սամտրեդիային» ֆուտբոլի չեմպիոնների լիգայում
Ադրբեջանի չեմպիոն «Ղարաբաղ» ֆուտբոլային ակումբը չեմպիոնների եվրոպական լիգայի առաջին խաղում վստահ հաղթանակ է տարել վրացական «Սամտրեդիայի» հանդեպ 5:0 հաշվով և գործնականում իր մասնակցությունն է ապահովել մրցաշարի հաջորդ ընտրական փուլում:
«Ղարաբաղը» խաղին հասել է կասկածելի մարզավիճակում՝ տանուլ տալով բոլոր նախապատրաստական խաղերն, ընդ որում, դրանցից ոմանք՝ խոշոր հաշվով: Սակայն Ադրբեջանի ամենահայտնի թիմի երկրպագուները հավատում էին նրա հաղթանակին, և Բաքվի Թոֆիկ Բահրամովի անվան մարզադաշտը լիքն էր գրեթե երեք քառորդով:
Հանդիսատեսը կարող էր ավելի շատ լինել, եթե խաղից առաջ չլիներ «Ղարաբաղի» երկրպագուների ամենամեծ բանակի հետ միջադեպը: «Իմարեթ» ֆան ակումբի անդամներին թույլ չէին տվել տրիբունաներ տանել քաղաքական բովանդակության հսկայական ցուցապաստառը: Այն նվիրված էր մեկ շաբաթ առաջ հայկական զորքերի գնդակոծության արդյունքում զոհված երկամյա Զահրա Գուլիևային՝ «Պատասխան եք տալու թափված արյան յուրաքանչյուր կաթիլի համար» գրառմամբ: Սակայն ոստիկանությունն արգելել էր երկպագուներին պարզել այդ պաստառն՝ արդարացիորեն ենթադրելով, որ դրան կհետևեն եվրոպական ֆուտբոլային միության պատժամիջոցները՝ տուգանքից մինչև որակազարկում: Որպես բողոքի նշան «Իմարեթ» ակումբի երկրպագուները լքել էին մարզադաշտը ողջ կազմով:
«Իմարեթը» 1993թ-ին ղարաբաղյան պատերազմի ընթացքում ավերված մարզադաշտի անվանումն է Աղդամ քաղաքում: Այժմ «Ղարաբաղ» ակումբը տեղակայված է Գուզանլի ավանում, որը գտնվում է ներքին Ղարաբաղի Աղդամի շրջանի ադրբեջանական վերահսկողության տակ գտնվող մասում, սակայն միջազգային մակարդակի խաղերն անցկացնում է Բաքվում:
Բացակայում էին նաև վրացական թիմի երկրպագուները: Ողջ ստադիոնում նկատեցինք Վրաստանի մեկ դրոշ, այն էլ՝ մամուլի համար օթյակում: Հնարավոր է, որ վրացի երկրպագուները որոշել են Բաքու չգալ երկամյա վաղեմության դեպքի պատճառով, երբ Թբիլիսիի մարզադաշտի տրիբունաներում քաղաքական և ազգայնական կարգախոսներ էին հնչում, իսկ խաղից հետո «Դինամո-ուլտրաս» ակումբի երկրպագուները ծեծել էին ադրբեջանցի երկրպագուներին:
Չնայած խոշոր հաշվին՝ խաղը բավականին ձանձրալի էր: Երկու թիմերն էլ բազմաթիվ սխալներ էին գործում, որոնք կարելի է բացատրել սեզոնի սկզբում ունեցած վատ մարզավիճակով: «Աչքի ընկավ» նաև թուրք դատավորը՝ վրացիների դարպասին երկու վիճելի 11-մետրանոց նշանակելով: «Սամտրեդիայի» գլխավոր մարզիչ Գիա Ցեցաձեն, ի պատիվ իրեն, հետխաղյանմամուլի ասուլիսին չբողոքեց վատ մրցավարությունից՝ ասելով, որ իրենք «պարտվել են ոչ թե դատավորի մեղքով, այլ որովհետև «Ղարաբաղն» ավելի ուժեղ էր:
Հարավկովկասյան դերբիի պատասխան խաղը կկայանա հուլիսի 18-ին Վրաստանում:
