Ադրբեջանական հեռուստասերիալները կստուգվեն՝ որքանով են համապատասխանում փողոցային երթևեկության կանոններին

Ադրբեջանի հեռուստատեսության և ռադիոհեռարձակման ազգային խորհուրդը մտադիր է վերահսկել երկրում նկարահանվող հեռուստասերիալների բովանդակությունը: Այս մասին «Թրենդ» գործակալությանը տված հարցազրույցում հայտնել է Ադրբեջանի հեռուստատեսության և ռադիոհեռարձակման ազգային խորհրդի նախագահ Նուշիրավան Մահերամլին:

Նա պնդում է, որ Ադրբեջանում նկարահանվող հեռուստասերիաները պետք է կրթական գործունեություն իրականացնեն: Մահերամլիի խոսքով՝ ադրբեջանական սերիալներում՝ ի տարբերություն արտասահմանյան սերիալների, հաճախ քարոզվոմ են օրենքների, բարոյաէթիկական արժեքների խախտումներ:

«Արտասահմանյան սերիալներում, երբ հերոսը ավտոմեքենա է նստում, նա առաջինը կապում է ամրագոտին, չի ծխում մեքենայի սրահում, չի խոսում հեռախոսով ղեկին: Իսկ մեր սերիալներում ամեն ինչ հակառակն է, այդ ամենն անում են, դեռ ավելին, փողոցն անցնում են կարմիր լույսի ներքո: Նման բան չպետք է լինի: Սերիալները պետք է օգտակար սովորություններ քարոզեն, ոչ թե վնասակար: Իսկ մեզ մոտ ստացվում է հանցագործության քարոզում»,-կարծում է Մահերամլին:

Մահերամլին հավելել է, որ գրաքննության կողմնակից չէ: «Չենք ցանկանում միջամտել ստեղծագործական գործընթացին: Բայց դա չի նշանակում, որ մենք լիազորություններ չունենք: Կա օրենք «Հեռուստատեսության և ռադիո հեռարձակման մասին», երբ խախտվում են այդ օրենքի դրույթները, պարտավոր ենք միջամտել»:

Սերիալների արտադրությունը հավելյալ հզոր խթան է ստացել 2012թ., երբ Ադրբեջանի հեռուստատեսության և ռադիոհեռարձակման ազգային խորհուրդն ընդունեց ադրբեջանական հեռուստաալիքներով արտասահմանյան սերիալներն արգելելու մասին որոշումը: «Մեր երիտասարդ սերունդը չպետք է դաստիարակվի արտասահմանյան սերիալներով»:

Սոցիալական ցանցների օգտատերերը թերահավատորեն են ընդունել Մահերամլիի հայտարարությունը:

«Կրթական գործառույթի» մասին այդ խոսակցությունները չպետք է վերաբերեն մասնավոր ալիքներին: Ամեն տարի բյուջեից միլիոնավոր մանաթներ են հատկացվում պետական և հասարակական հեռուստաալիքներին: Թող դրանք էլ զբաղվեն կրթությամբ , իսկ մասնավոր հեռուստաալիքները պետք է գումար վաստակեն իրենց արտադրանքով օրենքի շրջանակներում »,-ասում է հեռուստապրոդյուսեր Մուրադ Հուսեյնովը:

«Հետաքրքիր է՝ ինչի կվերածվեին Game of Thrones կամ Doctor House դասական սերիալները, եթե նրանք Մահերամլիի նման գրաքննադատ ունենային»,-հետաքրքրվում է Ֆեյսբուքի օգտատերերից մեկը: