Ադրբեջանական ընդդիմությունն այս տարվա վերջին հանրահավաքն է անցկացրել

Ադրբեջանի Ժողովրդական ուժերի ազգային խորհուրդ ընդդիմադիր դաշինքի շաբաթ օրվա հանրահավաքի մասնակիցները իշխանություններին դատապարտել են կոռուպցիայի համար, պահանջել են ժողովրդավարական բարեփոխումների անհապաղ անցկացում և քաղբանտարկյալների ազատ արձակում:

Դա դաշինքի այս տարվա արդեն հինգերորդ հանրահավաքն էր: Ինչպես և նախորդ ակցիաները, այն համաձայնեցվել է Բաքվի գործադիր իշխանության հետ և անցկացվել թույլատրված վայրում՝ Բաքվի ծայրամասում գտնվող մարզադաշտում, ոստիկանության ուժեղացված վերահսկողության ներքո:

Նոր հանրահավաքի օրակարգը գրեթե ոչնչով չէր տարբերվում նախորդներից: Ավանդաբար ելույթ ունեցողներն իշխանություններին մեղադրեցին կոռուպցիայի համար, կոչ արեցին ազատ արձակել քաղբանտարկյալներին, ուշադրություն սևեռեցին տնտեսական խնդիրների վրա: Եվ, որպես արդյունք, պահանջեցին իշխանությունների հրաժարականը:

Կուսակցության համակարգման կենտրոնի անդամ, ագրարային հարցերի փորձագետ Վահիդ Մահերամլին հայտարարեց, որ ճգնաժամի սկզբից Ադրբեջանի տնտեսությունը կրճատվել է երկու անգամ:

«Այս մտածելակերպով, խելքով, ունակություններով նրանք (իշխանությունները) չեն կարող ինչ—որ բանի հասնել: Մենք պետք է նրանց ճանապարհ ցույց տանք: Նրանց ուղին հրաժարական տալն է», — Մահերամլիի խոսքերն է փոխանցում Turan գործակալությունը:

Իրավապաշտպան Օգթայ Գյուլալիևն իր ելույթում առանձնահատուկ տեղ էր հատկացրել քաղբանտարկյալների և խոսքի ազատության խնդրին:

«Անկախ, ընդդիմադիր կայքերն արգելափակված են: Երկրում 160-ից ավել քաղբանտարկյալ կա: Նրանցից մոտ քսանը լրագրողներ և բլոգերներ են: Ադրբեջանը Եվրոպայում առաջատար է քաղբանտարկյալների թվով», — հայտարարել է Գյուլալիևը:

Ադրբեջանի ժողովրդական ճակատ կուսակցության առաջնորդ Ալի Քերիմլին իշխանություններին կոշտ քննադատության է արժանացրել: Նա հայտարարել է, որ 24 տարվա կառավարման ընթացքում իշխանությունները չեն լուծել երկրի ոչ մի խնդիր, ոչ մի առաջընթաց չկա ղարաբաղյան հակամարտության կարգավորման և օկուպացված տարածքների վերադարձի հարցում:

Վերջում Քերմլին հայտարարել է, որ Ժողովրդական ուժերի ազգային խորհուրդը ժամանակավորապես կասեցնում է բողոքի ակցիաները: Սակայն, նրա խոսքով, դա չի նշանակում, որ հանրահավաքները դադարեցվում են: «Մենք դեռ կունենանք ավելի զանգվածային, ուժեղ ակցիաներ, և Ազգային խորհուրդը կիրազեկի այդ մասին», — հայտարարել է Քերիմլին:

Հանրահավաքից հետո Բաքվի ոստիկանության գլխավոր վարչության տարածած հաղորդագրության մեջ, նշվում է, որ ակցիային մասնակցել է մինչև 1000 մարդ: «Հասարակական կարգի և իրավական նորմերի կոպիտ խախտումներ չեն գրանցվել», — հայտարարել է ոստիկանությունը: