Ադրբեջանը պահանջում է Հայաստանի գյուղերից մեկի կեսը

Ադրբեջանի ներկայացուցիչները պահանջում են իրենց փոխանցել 12 տներ, որոնք գտնվում են Հայաստանի Սյունիքի մարզի Շուռնուխ գյուղում։ Այս մասին հայտարարել է գյուղապետ Հակոբ Արշակյանը։

Ադրբեջանական կողմը կարծում է, որ այդ տարածքը պետք է իրեն տրվի, քանի որ գտնվում է Գորիս-Կապան ճանապարհի աջ՝ արևելյան կողմում։

Ըստ եռակողմ համաձայնագրի, որը ստորագրվել է Արցախում 44-օրյա պատերազմից հետո, Ադրբեջանին է հանձնվել Զանգելանի շրջանը։ Այն սահմանակից է Հայաստանի Սյունիքի մարզին, և այժմ այստեղ իրականացվում է սահմանագծում՝ ըստ խորհրդային ժամանակների վարչական սահմանների։

Արդյունքում՝ Սյունիքի մարզի Գորիս և Կապան քաղաքների միջև ճանապարհի որոշ հատվածներ հատում են ադրբեջանական տարածքը։ Վերջերս այստեղ հաճախ են միջադեպեր տեղի ունենում այն պատճառով, որ սահմանն անցնում է Հայաստանի պետական օբյեկտների և մասնավոր տների միջով։

Շրջանում իրավիճակը ծայրահեղ լարված է, սյունեցիները կարծում են, որ վարչապետ Նիկոլ Փաշինյանն ինքնակամ Ադրբեջանին է հանձել Արցախի հողերը, իսկ այժմ տալիս է Հայաստանի հողերը։ Դեկտեմբերի 21-ին նրանք նույնիսկ փակել էին ճանապարհներն ու վարչապետին թույլ չէին տվել մտնել մարզի տարածք։

• Գործադուլներ, փակ ճանապարհներ և հրաժարականներ Հայաստանում․ թե ինչպես է ընդդիմությունը փորձում պաշտոնանկ անել վարչապետին
• Հայաստանի հարավի բնակիչները վարչապետին մարզ չեն թողել․ ինչո՞ւ է ապստամբել Սյունիքը

• Հայաստանի ընդդիմությունն առաջարկում է ռուսական ևս մեկ ռազմաբազա ստեղծել 

Ի՞նչ է կատարվում Շուռնուխում

Դեկտեմբերի 24-ի կեսօրին գյուղապետը հաղորդել է, որ ադրբեջանցիները Շուռնուխում են, նրանք բանակցություններ են անցկացրել Հայաստանի Ազգային անվտանգության ծառայության ներկայացուցչի և ռուս սահմանապահների հետ։

Հակոբ Արշակյանն ինքը բանակցություններին չի մասնակցել և չգիտի, թե ինչ են պայմանավորվել կողմերը։ Բայց նա ենթադրում է, որ այժմ բանակցություններն արդեն այլ մակարդակում են տարվում՝ դիվանագիտական։

Գյուղապետի խոսքով՝ եթե սահմանազատումն իրականացվի GPS-ով, ապա գյուղը երկու մասի կբաժանվի։

Ի՞նչ է ասում վարչապետը

Առավոտյան կառավարության նիստին վարչապետ Նիկոլ Փաշինյանը խոսել է Սյունիքում սահմանների որոշման գործընթացի մասին։ Նա զգուշացրել է, որ Շուռնուխ և Որոտան գյուղերում սահմանային հարցեր կան, որոնք կարող են «որոշակի ցավոտ իրավիճակների բերել»․

«Սակայն ուզում եմ հավաստիացնել, որ բոլոր պագաներում, երբ մեր քաղաքացիների շահերի տեսանկյունից որոշակի հարցեր կառաջանան, կառավարությունը փոխհատուցման տարբերակներ կառաջարկի, որը կլինի լիարժեք»։

Փորձագիտական կարծիք

Վերլուծաբան Կարեն Բեքարյանը կարծում է, որ Նիկոլ Փաշինյանն առանց ավելորդ խոսքերի կատարում է ինչ-որ գաղտնի խոստումներ, որոնք տվել է ադրբեջանական կողմին։ Ըստ փորձագետի՝ այլ բացատրություն չկա այն բանին, որ այժմ Հայաստանի սահմանների հետ նույն բանն է տեղի ունենում, ինչ Լեռնային Ղարաբաղի տարածքների, այսինքն՝ դրանք ինքնակամ հանձնվում են Ադրբեջանին․

«Միակ տրամաբանությունն այն է, որ նա [Փաշինյանը] Ալիևի նկատմամբ իր վրա վերցրած լրացուցիչ պարտավորություններ ունի, որոնք այժմ, առանց ժողովրդին որևէ փաստաթուղթ ներկայացնելու, լուռ կատարվում են»։

Ըստ Կարեն Բեքարյանի՝ այժմ իրականացվող սահմանագծման տրամաբանությունը չի համապատասխանում նոյեմբերի 9-ին Հայաստանի, Ռուսաստանի և Ադրբեջանի առաջնորդների կողմից ստորագրած եռակողմ հայտարարությանը։ Փորձագետն այն «խայտառակ փաստաթուղթ» է համարում, սակայն ընդգծում է, որ եռակողմ հայտարարությունը չի պարունակում հիմքեր այն բանի համար, ինչ այժմ կատարվում է Սյունիքում։