Աբխազիայում սկանդալ է առաջացել որակավորման բարձրացման համար Թբիլիսի մեկնած աբխազ բժիշկների շուրջ
Աբխազ մի խումբ բժիշկներ այցելել են Թբիլիսիի բուժկենտրոններից մեկը՝ թրեյնինգի մասնակցելու համար: Այդպես նրանք ուսումնասիրում էին, թե ինչպես է աշխատում ժամանակակից ռեանիմոբիլի սարքավորումը: Սակայն, քանի որ այդ այցի մասին պաշտոնական հաղորդագրություն չի եղել, և դրա մասին հայտնի է դարձել միայն սոցցանցերից, հանրապետությունում լուրջ սկանդալ է առաջացել:
Թրեյնինգի կազմակերպմամբ զբաղվում էր Աբխազիայի միջազգային կազմակերպությունների հետ հումանիտար հարցերով կապի ներկայացուցիչ Զուրաբ Լակերբայան: Նա Սուխումի «Պետքական թերթին» ասել է, որ Թբիլիսիում կայացած թրեյնինգը հոլանդական ոչ կառավարական կազմակերպության հետ պայմանագրի բաղկացուցիչ մասն էր, որը պատրաստ է Աբխազիային նվիրել շտապօգնության ժամանակակից մեքենա:
«Աբխազիայում մասնագետներ չկան, որոնք ծանոթ են այդ սարքավորմանը: Հոլանդացիները պայման են դրել, որպեսզի մեր բժիշկները սկզբից սովորեն դրա հետ աշխատել, և հետո միայն շտապօգնության մեքենան Աբխազիա կբերվի: Իսկ մինչ այդ, ռեանիմոբիլը գտնվում է Վրաստանի մասնագիտացված կենտրոնում, որտեղ մասնագետներ կան, որոնք լավ ծանոթ են այդ սարքավորմանը: Վրաստանում բուժում էր անցնում նաև շտապօգնության մեկ բժիշկ Աբխազիայից: Այդ պատճառով էլ ես հրավիրեցի երեք բուժքույրերի և մեկ վարորդի նույնպես գալ և ծանոթանալ սարքավորմանն այդ մասնագիտացված կենտրոնում, որից հետո նրանք վերադարձել են Աբխազիա», – պատմել է Լակերբայան:
Այնուամենայնիվ, առողջապահության նախարարությունը պաշտոնապես հայտարարել է այցի կազմակերպմանն անմասնակից լինելու մասին:
«Առողջապահության նախարարությունը 2017թ-ի դեկտեմբերին պայմանագիր է կնքել Ռուսաստանի հետդիպլոմային կրթության բժշկական ակադեմիայի հետ բուժանձնակազմի ուսուցման վերաբերյալ», — հայտարարել է նախարարության մամուլի ծառայությունը:
Աբխազիան այլ հնարավորությունների պահանջ չունի, «հատկապես՝ Աբխազիայի Հանրապետության թշնամական [երկրներում]», — ասված է հայտարարությունում:
Զուրաբ Լակերբայան կարծում է, որ այդ այցից սկանդալ սարքելը կնշանակի, որ Աբխազիան ռեանիմոբիլ չի ստանա, որը նրան սուր կերպով անհրաժեշտ է:
«Դա շատ վիրավորական կլինի: Մենք այդպիսի բժշկական սարքավորում չունենք, որը կա այդ մեքենայում, դրա արժեքը սարքավորման հետ միասին կազմում է ավելի քան 50 հազար եվրո», — ասել է Լակերբայան:
Սոցցանցերի աբխազական սեգմենտում թեման ամենաքննարվողներից մեկն է և ավելի լայն արձագանք է ստացել. արդյո՞ք Աբխազիայի բնակիչները պետք է բուժման մեկնեն վրացական հիվանդանոցներ:
Որոշ կարծիքներ.
«Կմեռնեմ, բայց թշնամիների մոտ չեմ գնա: Վրաստան բուժման մեկնելը դավաճանություն է»:
«Երբ մոր ձեռքերում մահացող երեխա է, և նորմալ բժիշկներ չկան, բուժման փող չկա, ոտքով էլ կգնաս, միայն թե երեխայիդ օգնեն բարձր որակավորում ունեցող բժիշկներն, ընդ որում՝ անվճար»:
«Մեկնում են ոչ միայն ընչազուրկներն, ալյ նաև բավականին ունևորները: Մարդիկ անվճար բանին սովոր են»:
«Եթե Ռուսաստանում բուժվելը թանկ է. գնացեք Հայաստան, որտեղ շատ լավ որակավորված բժիշկներ կան: Ինչո՞ւ հենց Վրաստան: Ի՞նչ է, բոլորն արդեն մոռացե՞լ են պատերազմի մասին»:
«Մեր սեփական երկրում պետք է գումար ներդնենք բժշկության մեջ, այդ ժամանակ էլ մեր ժողովուրդը Վրաստան բուժվելու չի գնա»:
