«Կրեմլին պետք չէ, որ Ասլան Բժանիան վերադառնա Աբխազիայի կառավարություն»․ կարծիք
Աբխազիայի նոր կառավարությունը
Աբխազիայում ձգձգվում է նոր կառավարության ձևավորման գործընթացը, ինչը բազմաթիվ ասեկոսեների և ենթադրությունների տեղիք է տալիս։ Ասում են, օրինակ, որ նախկին նախագահ Ասլան Բժանիան, ում պաշտոնանկ արեցին 2024 թվականի նոյեմբերին, կդառնա կա՛մ Անվտանգության խորհրդի քարտուղար, կա՛մ Աբխազիայի դեսպան Ռուսաստանում։
Սակայն, «Չեգեմսկայա պրավդա» թերթի գլխավոր խմբագիր Ինալ Հաշիգի կարծիքով, Կրեմլը ամեն բան կանի, որ Ասլան Բժանիան չլինի նոր կառավարությունում։
Այս մտորումները Ինալ Խաշիգը հրապարակել է իր սյունակում։ JAMnews-ը ներկայացնում է այն որոշակի կրճատումներով։
Ինալ Հաշիգ․
Հաշվի առնելով, որ նոր նախագահ Բադրա Գունբան փաստացի Ասլան Բժանիայի հաջորդողն ու փոխարինող է, միանգամայն սպասելի կլիներ, եթե նա իրեն նախորդողին «տեղավորեր» նոր կառավարությունում։
Բայց կա մեկ կարևոր դետալ. կադրային հարցերն այժմ միայն Գունբան չէ լուծում ու նրա թիմը։ Նոր աբխազական իշխանության փիլիսոփայությունը, կազմը և խնդիրները համաձայնեցվելու են Կրեմլի հետ։ Իսկ եթե ավելի ստույգ՝ Ռուսաստանի նախագահի վարչակազմում աբխազական ուղղության համակարգող Սերգեյ Կիրիենկոյի հետ։
Իսկ նա գործին կմոտենա գործնական տեսակետից։ Այսինքն, կադրային հարցը, ինչպես ինձ թվում է, ուղղակիորեն կապված է նոր իշխանության առջև դրված խնդիրների հետ։
Մոսկվայի համար, որին ձանձրացրել է աբխազական ներքաղաքական քաոսը և իշխանության պարբերական տապալումները, առաջնահերթ խնդիր է հանրապետությունում երկարաժամկետ կայունացումը։
Ես արդեն գրել եմ այս մասին և կրկնում եմ ևս մեկ անգամ. Աբխազիայի նոր կառավարությունը կդառնա տեխնոկրատների կառավարություն։ Դրա կազմում չեն լինի այն դեմքերը, որոնք ասոցացվում են աբխազական քրոնիկական ճգնաժամի հետ։
Հենց այդ պատճառով նախկին նախագահ Ասլան Բժանիան նոր կառավարության կազմում չի հայտնվի։ Նա չափազանց վատ համբավ ունի։ Բժանիային նոր կառավարության կազմում ընդգրկելը կլիներ միանգամայն հիմար և ակնհայտորեն պարտվողական գաղափար։ Եվ Կրեմլին դա բացարձակապես պետք չէ։
Չարժե առանց առիթի գրգռել ընդդիմությանը՝ հարվածի տակ դնելով Բադրա Գունբային, որի հետ Մոսկվան ակնհայտորեն մեծ հույսեր է կապում։
Բայց, եթե հանկարծ, հակառակ ամեն տրամաբանության, Ասլան Բժանիային այնուամենայնիվ ինչ-որ պաշտոն տան, ապա Բադրա Գունբային սպասում են ահռելի քանակությամբ խնդիրներ, և նա լավ կանի հենց հիմա սկսի նախագահական պալատի շուրջը ցանկապատ կառուցել, որպեսզի չդառնա հերթական (հաշվով չորրորդ) տապալված նախագահը…
