Աբխազական ճանապարհային ոստիկանությանն արգելել են ստուգել ռուսական ավտոմեքենաները

Աբխազիայի ճանապարհապարեկային ծառայությանն արգելվել է ճանապարհային ոստիկանության անցակետերից դուրս արտասահմանյան համարանիշներով ավտոտրանսպորտ կանգնեցնել և ստուգել, ընդ որում անցակետերում էլ արտասահմանյան ավտոտրանսպորտը կանգնեցնել և ստուգել կարելի է միայն հստակ խախտման կամ կողմնորոշման մասին օպերատիվ տեղեկատվություն ստանալու դեպքում միայն:

Աբխազիայի ներքին գործերի նախարար Ասլան Կոբախիայի նման որոշումը հստակ պատճառ ունի. դա արտասահմանյան մեքենաներից (հիմնականում՝ ռուս զբոսաշրջիկների) աբխազական ճանապարհային ոստիկանության աշխատակիցների կողմից զբոսաշրջիկներից վերցվող զանգվածային ապօրինի կաշառքներն են:

Տարբեր զբոսաշրջային ֆորումներում աբխազ տեսուչն արդեն բերանի խոսք է դարձել.

«Ռուսական սահմանից գնում էինք Սուխում: Ընդամենը 100 կմ տարածք է, սակայն մեզ ութ անգամ կանգնեցրին: Կարծես և ամրագոտիներն են գցած, և արագությունն է թույլատրված, դեղատուփի հետ էլ խնդիր չկա, սակայն մինչև մի քանի հարյուր ռուբլի չտաս, ձեռք չեն քաշի: Իսկ եթե իրոք խախտում ես արել, կկողոպտեն պարզապես»:

«Տեղական համարանիշներով մեքենաները հսկիչ կետերի կողքով սլանում են ինչպես Բոինգ, բայց կանգնեցնում են, չգիտես ինչու, բացառապես օրինապաշտ զբոսաշրջիկներին»:

«Ամենաշատը նման դեպքեր լինում են, երբ Ռուսաստանի կողմ ես շարժվում: Կամ տուգանք վճարիր, կամ առանց վարորդական իրավունքի կմնաս: Իհարկե, վարորդական իրավունքից չզրկվելու համար փող կտաս»:

Ի դեպ, միայն զբոսաշրջիկները չեն քննադատում ճանապարհային տեսչությունը, այլ նաև դրա ղեկավարությունը: Հանրապետության պետական ավտոտեսչության ղեկավար Նաուր Սմիրն իր վերջերս կայացած ասուլիսին խոստովանել է, որ աշխատանքից կազատեր իր գերատեսչության աշխատակիցների 99%-ին, «սակայն նրանք, ում դրանց տեղը բերես, ավելի վատն են լինելու»:

Ներքին գործերի նախարարի նորամուծությունը դարձել է սոցցանցերի ամենաքննարկվող թեման:

Բլոգերներից ոչ ոք չի հերքում, որ տեղական ճանապարհային տեսչությունը չի թողնում շնչել: Սակայն արտասահմանյան վարորդների նման ընտրական պաշտպանությունը խախտում է սեփական քաղաքացիների իրավունքը.

«Ստացվում է, որ ստացիոնար անցակետերից դուրս կարելի է շարունակել թալանել աբխազական պետհամարանիշներով տեղացիներին»:

«Այդ որոշումը պետք է տարածվի բոլոր մեքենաների վրա, որոնք չեն խախտում երթևեկության կանոնները: Իսկ եթե խախտում են, պետք է ցանկացած համարանիշներով մեքենան կանգնեցնել: Եվ դա տրամաբանական է: Սակայն տրամաբանությունն՝ ուր, մեր իշխանությունն՝ ուր…»:

«Խնդիրը մեկն է. պետավտոտեսուչներին նորմալ աշխատավարձ տվեք, և ես վստահ եմ, որ մեզ մոտ ամեն ինչ լավ կլինի, իսկ աշխատաիկիցներն ազնվորեն կաշխատեն»:

«Լավ աշխատավարձ պետք է բոլորին: Սակայն որտեղի՞ց այն վերցնել, եթե ամեն ինչ թալանում են ընտրություններին: Եթե պետական բյուջեի մասին հոգ տանելու փոխարեն, «լիազոր» մարմինները սեփական գրպանի մասին են մնածում»:

«Պետք է տեսախցիկներ տեղադրել կաշառքը բացառելու համար: Յուրաքանչյուր հսկիչ կետի մոտ պետք է տերմինալ տեղադրել, որտեղ տուգանքը կվճարեն կտրոններով և դա կգնա պետբյուջե: Ստացիոնարներն ավելի հեշտ է վերահսկել, քան ճանապարհային կողոպտիչներին: Իսկ վարորդներին խորհուրդ եմ տալիս մի քիչ փող ծախսել տեսագրանցող սարքի վրա՝ դրանով իսկ թեթևացնելով սեփական կյանքը»: