Վրաստանում ժողովրդավարություն չկա՞։ Հարցվածների 51%-ն այսպես է պատասխանել NDI-ի հարցմանը
Մեծ մասը չի կողմնորոշվել, թե ում սատարել քաղաքականությունում և կարծում է, որ Վրաստանում ժողովրդավարություն չկա, սակայն վստահ է, որ պետք է միանալ Եվրամիությանն ու ՆԱՏՕ-ին։ Պատվաստման հակառակորդները կողմնակիցներից շատ են, բայց ոչ այնքան։ Այսպիսին են Ազգային ժողովրդավարական ինստիտուտի (NDI) հարցման գլխավոր արդյունքները։
Հարցումն անցկացվել է 2021 թ-ի հուլիսի 13-25-ը, հեռախոսով, հեռախոսահամարի պատահական ընտրանքով։ Հարցերին պատասխանել է 2 016 մարդ ողջ Վրաստանի տարածքում։
![Վրաստանում մեծ մասն ուզում է միանալ ԵՄ-ին և ՆԱՏՕ-ին։ Լուսանկարը՝ JAMnews](https://jam-news.net/app/uploads/2021/08/61447225_2620223788005875_277701689027330048_n-1024x656.jpeg)
70%-ը չի որոշել, թե որ քաղաքական ուժին սատարել
Տեղական ինքնակառավարման մարմինների (ՏԻՄ) ընտրություններից երկու ամիս առաջ (կայանալու են 2021 թ-ի հոկտեմբերի 2-ին) հարցվածների 70%-ը չի կարողացել պատասխանել հարցին, թե որ քաղաքական ուժն է ավելի մոտ իր հայացքներին։
51%-ն ասել է, որ ոչ մի գործող կուսակցություն չի համապատասխանում իր պահանջներին։
Ընդ որում, եթե ընտրություններն անցկացվեին վաղը, դրանց կմասնակցեր բնակչության 61%-ը։
Կողմնորոշվածների 18%-ը հայտարարել է, որ քվեարկելու է «Վրացական երազանք» իշխող ուժի օգտին, 6%-ը՝ կա՛մ «Միասնական ազգային շարժում» առաջատար քաղաքական կուսակցության, կա՛մ ընդդիմադիր այլ ուժի օգտին։
NDI-ը պարզել է, որ հստակ կուսակցությունների սատարման անհատական ցուցիչներն այնքան ցածր են, որ դրանք հնարավոր չէ օգտագործել ընտրությունների արդյունքները կանխատեսելու համար։
- Վրաստան․ «Անգամ բռնապետներն են պահպանում պայմանավորվածությունները»
- Որքանո՞վ է Վրաստանն անվտանգ։ Եվ ի՞նչ անել, եթե ձեզ վրա հարձակվել են
Գործազրկությունն ամենամեծ խնդիրն է
Հարցվածների 59%-ն այն հարցին, թե որն է երկրի ամենամեծ խնդիրը, պատասխանել է՝ գործազրկությունը։
Բնակչության 42%-ը որպես հիմնական խնդիր նշում է գների աճը։
Ցանկի մյուս խնդիրները՝ ստորև․
- աղքատություն՝ հարցվածների 19%,
- ազգային արժույթի՝ լարիի արժեզրկումը՝ 17%,
- ցածր աշխատավարձը՝ 16%,
- Բարձր հարկերը՝ 12%։
Հարցվածների 68%-ը կարծում է, որ կարողանում է ավելի քիչ ապրանք և ծառայություն գնել համավարակից առաջ ընկած ժամանակահատվածի համեմատ։ Եվ միայն 2%-ն է կարծում, որ իր ֆինանսական հնարավորություններն ավելացել են կորոնավիրուսի համավարակից հետո։
47%-ը դժգոհ է խորհրդարանից
47%-ը Վրաստանի խորհրդարանի աշխատանքը գնահատել է որպես վատ, 10%-ը՝ որպես լավ, 33%-ը՝ միջին որակի։
- Հարցվածների 55%-ն ասում է, որ խորհրդարանն իրեն հուզող հարցերի վերաբերյալ օրենքներ չի ընդունում։
- 54%-ը չի հավատում, որ անգամ եթե իր տարածքի պատգամավորին պատմի խնդրի մասին, նա կփորձի լուծել։
- Միայն 24% է կարծում, որ խորհրդարանականները քաղաքացիների հետ կապի մեջ են կանոնավոր կերպով։
Վրաստանում ժողովրդավարություն չկա՞
Հարցման համաձայն՝ Վրաստանի բնակչության 51%-ը կարծում է, որ երկրում ժողովրդավարություն չկա։ 35%-ը վստահ է, որ կա։
Հարցվածների 49%-ն ասել է, որ Վրաստանը սխալ ուղղությամբ է զարգանում։ Համեմատության համար․ մեկ տարի առաջ՝ 2020 թ- օգոստոսին, NDI հարցման ժամանակ այդպես էր կարծում միայն 32%-ը։
23%-ը գոհ է զարգացման միտումներից, իսկ 19%-ը կարծում է, որ ոչինչ ընդհանրապես չի փոխվում։
Մեծ մասը կողմ է ՆԱՏՕ-ին և Եվրամիությանն անդամակցելուն
Հարցման համաձայն՝ Վրաստանի բնակչության 76%-ը կողմ է Եվրամիությանը, իսկ 74%-ը՝ ՆԱՏՕ-ին անդամակցությանը։
Հարցվածների 11-ական տոկոսը հակառակ կարծիքի է․ չի կարելի միանալ ԵՄ-ին և ՆԱՏՕ-ին։
47%-ը կողմ է պատվաստմանը, 35%-ը՝ դեմ
Բնակչության 47%-ը չի պատվաստվելու կորոնավիրուսի դեմ, 35%-ը պատվաստվելու է։ Մնացածը դեռ չեն որոշել։
Հարցվածների 42%-ը հայտարարել է, որ բավականաչափ տեղեկացված չէ կորոնավիրուսի դեմ պատվաստման մասին։ Իսկ 56%-ը չգիտի, թե ինչպես այդ նպատակով գրանցվել առցանց հարթակում։
Միայն 19.54%-ն է կարծում, որ բավականաչափ տեղեկություններ ունի, 42%-ն ասում է, որ անհրաժեշտության դեպքում կարող է գրանցվել կայքում։
Հարցվածների 4%-ն ասել է, որ ընդհանրապես չի իմացել, որ կարելի է պատվաստվել։
Ամենատեղեկացվածները Թբիլիսիի բնակիչներն են։
Սոցցանցերը պոպուլյարությամբ հասնում են հեռուստատեսությանը, սակայն դեռևս զգալիորեն զիջում են
NDI-ի առանցքային եզրակացություններից մեկն այն է, որ սոցիալական ցանցերը՝ որպես տեղեկատվության հիմնական աղբյուր, 2014 թ-ից աճել են 27%-ով։
2014 թ-ին սոցցանցերը տեղեկատվության հիմնական աղբյուրն էին բնակչության ընդամենը 8%-ի համար։ Նոր հետազոտության համաձայն՝ 35%-ի համար։
Սակայն հեռուստատեսությունը նախկինի պես տեղեկատվական առաջին աղբյուրն է մեծ մասի համար․ այսպես է պատասխանել հարցվածների 57%-ը։
Թեև Թբիլիսիում նախընտրությունների բաշխումը տարբերվում է․ Հեռուստատեսությունը տեղեկությունների աղբյուր է բնակչության 42%-ի համար, համացանցն ու սոցցանցերը՝ 51%-ի։