Վրաստանն ու Թուրքիան պայմանավորվել են տնտեսության, մշակույթի և կիբերանվտանգության ոլորտում համագործակցության շուրջ

Վրաստանի վարչապետ Գիորգի Կվիրիկաշվիլին մայիսի 23-ին հանդիպել է իր թուրք գործընկեր Բինալի Յըլդըրըմի հետ: Ավելի ուշ կայացել է ռազմավարական համագործակցության գերագույն խորհրդի հանդիպում, որին մասնակցել են երկու երկրների նախարարների կաբինետի անդամները:

Կողմերը 4 փաստաթուղթ են ստորագրել տնտեսության, մշակույթի, արդարադատության և կիբերանվտանգության ոլորտում համագործակցության խորացման մասին:

Վարչապետ Գիորգի Կվիրիկաշվիլիի խոսքով՝ առանձնահատուկ հետաքրքրություն է առաջացնում ազատ առևտրի մասին համաձայնագրի ընդլայնումը: Վրաստանի վարչապետը կարծում է, որ նոր համաձայնագիրը հնարավորություն կտա ընդլայնելու թուրքական շուկա վրացական արտադրանքի մատակարարումը:

Ստորագրվել են հետևյալ փաստաթղթերը.

«Վրաստանի և Թուրքիայի նախարարությունները համագործակցության մասին համատեղ հայտարարություն են ստորագրել»,

«Վրաստանի և Թուրքիայի միջև համատեղ տնտեսական և առևտրային հանձնաժողովի (JETCO) հիմնադրման մասին» հռչակագիր,

«Վրաստանի և Թուրքիայի կառավարությունների միջև մշակույթի ոլորտում համագործակցության ծրագիր»,

«Վրաստանի արդարադատության և Թուրքիայի տրանսպորտի, ծովագնացության ու հեռահաղորդակցության նախարարությունների միջև կիբերանվտանգության ոլորտում համագործակցության մասին հուշագիր»:

Համաձայնագրի համաձայն՝ Վրաստանն ու Թուրքիան համատեղ տնտեսական և առևտրային հանձնաժողով կստեղծեն, որը կնախանշի ապագա համագործակցության ձևաչափը:

Վրաստանի կառավարության ղեկավարի խոսքով՝ աշխարհի առջև կանգնած մարտահրավերների ֆոնին, տարածաշրջանային անկայունության պայմաններում ավելի մեծ արժեք է ձեռք բերում Վրաստանի և Թուրքիայի միջև ռազմավարական գործընկերությունն ու բարձր մակարդակի քաղաքական երկխոսությունը:

«Վրաստանի և Թուրքիայի միջև հաջող համագործակցության փորձն ու հեռանկարները նկատելի են խոշոր տրանսպորտային-էներգետիկ նախագծերում: Չի կարելի չնշել Բաքու-Թբիլիսի-Կարս երկաթուղու նախագիծը, որի առաջին ճյուղի պլանային գործարկումը պլանավորվում է 2017թ-ի ամռանը: Այդ նախագիծը Հարավային էներգետիկ միջանցքի նախագծի հետ մեկտեղ զգալիորեն նպաստում է երթուղիների դիվերսիֆիկացիային և ավելի լավ է ցուցադրում Վրաստանի և Ադրբեջանի՝ նախագծի մասնակիցների տնտեսական կարևորությունն, ինչպես նաև մեր եռակողմ գործընկերության նշանակությունը: Այդ միջանցքը «Մետաքսի ճանապարհի» վերածնման մեծ նախագծի կարևոր հատված է, ինչը ևս մեկ անգամ ընդգծվել է մի քանի օր առաջ Չինաստանում անցկացված գագաթնաժողովին», – հայտարարել է Կվիրիկաշվիլին:

Իր կողմից Թուրքիայի վարչապետն ընդգծել է հավատարմությունը Վրաստանի տարածքային ամբողջականության սկզբունքին:

«Ոչ ոք իրավունք չունի խախտելու Վրաստանի տարածքային ամբողջականությունը և նրա ինքնիշխան իրավունքները: Ցանկացած խնդիր, որը կարող է առաջանալ հիմա կամ ապագայում, պետք է կարգավորվի երկկողմանի համագործակցության կարգով, հատկապես Աբխազիայի և Ցխինվալի շրջանի հետ կապված խնդիրները», — հայտարարել է Բինալի Յըլդըրըմը:

Նա հիշեց, որ Թուրքիայում չկայացած ռազմական հեղաշրջումից մի քանի օր հետո Թուրքիա է ժամանել Գիորգի Կվիրիկաշվիլին, և ընդգծեց, որ Թուրքիայի կառավարությունն ու թուրք ժողովուրդը բարձր են գնահատում այդ համերաշխությունը:

Բինալի Յըլդըրըմն ու Թուրքիայի նախարարների կաբինետի անդամները Վրաստան են ժամանել մայիսի 22-ին: Թուրքիան Վրաստանի ամենախոշոր տնտեսական գործընկերն է: