«Վրաստանը կարող է ամբողջությամբ զրկվել ԵՄ-ի հետ առանց վիզայի ռեժիմից»․ Եվրահանձնաժողովի զեկույցը
Վրաստանի հետ ԵՄ-ի առանց վիզայի ռեժիմը կչեղարկվի՞
Եվրոպական հանձնաժողովն իր նոր զեկույցում նշում է, որ Վրաստանի բոլոր քաղաքացիներն ինչ-որ պահի կարող են բախվել ԵՄ-ի հետ առանց վիզայի ռեժիմի կասեցման հետ։
«Ազատություն» ռադիոկայանի փոխանցմամբ՝ Բրյուսելը հայտարարել է, որ 2025 թվականի դեկտեմբերի 30-ից՝ նոր կանոնների ուժի մեջ մտնելուց հետո, վիզային սահմանափակումները կարող են կիրառվել աստիճանաբար՝ նախ դիվանագիտական և ծառայողական անձնագիր կրողների նկատմամբ, ավելի ուշ՝ տարածվել Վրաստանի բոլոր քաղաքացիների վրա։
- Կոբախիձե. «ԵՄ-ն պատասխանատվություն ստանձնեց Վրաստանում կատարված հանցագործությունների համար»
- Transparency International. 2025 թ․-ի վերջին Վրաստանում կոռուպցիայի մակարդակը մտահոգիչ է
- Վրաստանի չեզոքությունը. ինչպե՞ս է ձևավորվում ռուսամետ քաղաքական նոր նախագիծը
Եվրոպական հանձնաժողովի զեկույցում նշվում է, որ Վրաստանում ժողովրդավարական սկզբունքների նահանջը «համակարգային և կանխամտածված բնույթ» ունի, քանի որ երկրի իշխանությունները վերջին տարիներին չեղարկել են նախկինում իրականացված բարեփոխումները՝ չնայած բազմաթիվ առաջարկություններին։
«Վրաստանը խախտել է վիզային ռեժիմի ազատականացման երկխոսության շրջանակներում իր ստանձնած բազմաթիվ պարտավորություններ, գործնականում չի իրականացրել առաջարկություններից ոչ մեկը և, չնայած բազմաթիվ կոչերին, 2024-2025 թվականներին ցուցաբերել է ավելի մեծ նահանջ, այդ թվում՝ հիմնարար իրավունքների և ազատությունների պաշտպանության հարցում»,- ասված է զեկույցում։
2025 թվականի հունվարից ի վեր Եվրամիությունն արդեն կասեցրել է առանց վիզայի ռեժիմը Վրաստանի դիվանագիտական և ծառայողական անձնագրեր կրող քաղաքացիների համար, չնայած որոշ ԵՄ երկրներ, այդ թվում՝ Հունգարիան և Սլովակիան, չեն աջակցել այդ որոշմանը։
Այնուամենայնիվ, նոյեմբերին հաստատված նոր կանոնակարգերը պարզեցնում են Եվրահանձնաժողովի կողմից վիզայի ազատականացումը կասեցնելու գործընթացը։
Զեկույցի համաձայն՝ առաջին փուլում սահմանափակումներ կկիրառվեն առաջարկությունները չկատարելու համար պատասխանատու վրացի պաշտոնյաների նկատմամբ։ Երկրորդ փուլում առանց վիզայի ռեժիմը կարող է ամբողջությամբ վերացվել։
Նոյեմբերի 17-ին Եվրամիության խորհուրդը վերջապես հաստատեց վերանայված մեխանիզմ, որը թույլ է տալիս ավելի արագ և արդյունավետ կերպով կասեցնել վիզային ռեժիմի ազատականացումը այն երրորդ երկրների համար, որտեղ առանց վիզայի ռեժիմն օգտագործվում է իր նշանակությանը ոչ համապատասխան կերպով կամ հակասում է Եվրամիության շահերին։
Ներքին գործերի և միգրացիայի հարցերով եվրահանձնակատար Մագնուս Բրունները հայտարարել է, որ առանց վիզայի ռեժիմի չարաշահումը կարող է ստեղծել անվտանգության և միգրացիայի հետ կապված լուրջ խնդիրներ, և որ համագործակցության բացակայության դեպքում կպահանջվեն «հստակ պատժամիջոցներ»։
Եվրամիության խորհուրդը, բացառությամբ Հունգարիայի, կրկին Վրաստանի իշխանություններին կոչ է արել ազատ արձակել անհիմն կալանավորված քաղաքական գործիչներին, ակտիվիստներին և լրագրողներին, չեղարկել բռնաճնշող օրենսդրությունը և անհապաղ բավարարել վիզայի ազատականացման համար սահմանված չափանիշներին։ Ի պատասխան՝ Վրաստանի վարչապետ Իրակլի Կոբախիձեն հայտարարել է, որ ԵՄ-ն «չունի որևէ հիմք քննադատության համար»։
Եվրոպական հանձնաժողովի՝ ԵՄ ընդլայնման 2025 թ․-ի զեկույցի համաձայն՝ վերջին մեկ տարվա ընթացքում Վրաստանի ԵՄ ինտեգրման գործընթացի հիմքերը զգալիորեն թուլացել են։
Զեկույցում նշվում է, որ Վրաստանի կառավարության կողմից ընդունված օրենսդրական փոփոխություններն ու ձեռնարկված բռնաճնշող միջոցները նվազեցրել են քաղաքացիական հասարակության, անկախ լրատվամիջոցների և ընդդիմության հնարավորությունները՝ ակտիվորեն մասնակցելու քաղաքական գործընթացներին և բնականոն գործունեություն ծավալելու։
ԵՄ ընդլայնման հարցերով գերագույն հանձնակատար Մարթա Կոսը հայտարարել է, որ Վրաստանը գրանցել է ԵՄ ընդլայնման պատմության մեջ ամենավատ արդյունքները, և որ իրավիճակը կարող է բարելավվել միայն այն դեպքում, եթե կառավարությունը դադարի ճնշում գործադրել ընդդիմության, քաղհասարակության և ԶԼՄ-ների վրա։
Հետևեք մեզ — Facebook | Youtube
Վրաստանի հետ ԵՄ-ի առանց վիզայի ռեժիմը կչեղարկվի՞
