Վրաստանի կրթության նախարարը պատրաստվում է դպրոցականներին խնձոր բաժանել
Կրթության նախարարությունը դպրոցներում «խնձոր բաժանելու» արշավ է սկսում: Ինչպես այսօրվա մամուլի ասուլիսին հաղորդել է գերատեսչության ղեկավար Ալեքսանդր Ջեջելավան, արշավը կսկսվի աշնանն այն դպրոցներում, որտեղ ավելի քան հազար երեխա է սովորում:
Խնձորը բաժանելու են շաբաթը մեկ, հաղորդում է «Ինտերպրեսնյուս» գործակալությունը: Յուրաքանչյուր երեխա մեկական խնձոր կստանա: Այդպիսի աշակերտների քանակը կկազմի 40-60 հազար:
«Դա բարդ ու թանկ նախագիծ է: Մյուս կողմից, մեզ չեն կանգնեցնի ոչ բարդությունները, ոչ թանկությունը: Այդ գաղափարի իմաստն այն է, որ դասամիջոցին երեխան խնձոր ուտի: Խնձորը շատ օգտակար է», — նշել է Ալեքսանդր Ջեջելավան:
Նախարարությունը մտադիր է ծնողներին համոզել, որպեսզի նրանք նույնպես երեխաների հետ լանչի համար խնձոր դնեն:
Ընդհանուր առմամբ, նախագիծը կոչված է տարածելու առողջ կենսակերպն ու առողջ սնունդը: Այդ պատճառով էլ արդեն սեպտեմբերից դպրոցական բուֆետներում կդադարեն վաճառել «վնասակար ուտելիք»՝ մեծ քանակությամբ ճարպ, շաքարավազ և աղ պարունակող մթերք, անգամ գազավորված ըմպելիք: Դպրոցական բուֆետների ճաշացանկում ավելի շատ բանջարեղեն և միրգ կլինի, հայտարարել է նախարարը:
Վրաստանի կրթության նախարար, փոխվարչապետ Ալեքսանդր Ջեջելավան հայտնի է իր հաճախ ոչ միանշանակ և ոչ ստանդարտ հանրային ելույթներով, որոնք երբեմն առիթ են տալիս սոցցանցերում բուռն արձագանքների:
