Վրաստանի կառավարությունը զիջել է. հացահատկի փոխադրումն ավտոտրանսպորտով չի արգելվի
Հացահատիկն ավտոմոբիլային տրանսպորտով փոխադրելու արգելքի մասին Վրաստանի կառավարության որոշումը չեղարկվել է մեկ տարով:
Այսպիսի որոշում է կայացրել ֆինանսների նախարար Վանո Մաճավարիանին այն բանից հետո, երբ հացահատիկ ներկրող վարորդների բողոքի ակցիայի ժամանակ մասնակիցներից մեկն իր վրա բենզին է լցրել և սպառնացել այրել իրեն:
Սեպտեմբերի 15-ին Վրաստանի կառավարությունը որոշում կայացրեց, որի համաձայն՝ ուժի մեջ է մտել Վրաստանի տարածքով ավտոտրանսպորտային միջոցներով հացահատկի և ալյուրի փոխադրման արգելքը: Այդ որոշումը թույլատրում էր նշված բեռնափոխադրումներն իրականացնել միայն նավահանգիստների և երկաթուղային մագիստրալների միջոցով: Որոշումը, որն ավտոտրանսպորտով հացահատիկ և ալյուր փոխադրողներին և տարանցմամբ զբաղվողներին զրկում էր գործունեություն ծավալելու հնարավորությունից, պետք է ուժի մեջ մտներ հոկտեմբերի 1-ից:
Կառավարության միակ փաստարկը, որը նշվում էր ի ապացույց ներմուծվող կարգավորման անհրաժեշտության, հսկիչ անցակետերում կուտակվող հերթերն էին հացահատիկով բեռնված մեքենաների պատճառով, ինչպես նաև խցանումները, որոնք դրանք ստեղծում են ճանապարհներին, ինչն անհարմարություն է ստեղծում տարեցտարի աճող զբոսաշրջային հոսքի համար:
Կառավարության որոշումը գործազուրկ էր դարձնում բեռնատարների հարյուրավոր վարորդների, որոնք զբաղվում են հացահատկի փոխադրմամբ: Սեպտեմբերի 17-ին վարորդները հավաքվել էին Լիլոյում՝ տնտեսական գործունեության ձևակերպման գոտում, և հանդիպում էին պահանջում նախարար Մաճավարիանիի հետ:
Եռօրյա ցույցից հետո նրանք ստիպեցին կառավարությանը զիջումների գնալ: Դա տեղի ունեցավ այն բանից հետո, երբ ակցիայի մասնակիցներից մեկը բարձրացավ Լիլոյի տերմինալի տանիքն ու սպառնաց ինքնահրկիզման ակտ իրականացնել:
«Մենք ի գիտություն ենք ընդունել վարորդների դրությունն ու որոշել մեկ տարով հետաձգել կարգավորման ընդունումը: Ապագայում փոխադրումների սահմանափակումները սեզոնային կամ այլ բնույթ կկրեն. դա տեղի կունենա հարցը բեռնատարների վարորդների հետ քննարկելուց հետո», — հայտարարել է ֆինանսների նախարարը, որը հանդիպել է ինքնահրկիզման ակտ իրականացնելու սպառնալիք հնչեցրած վարորդի հետ:
Բեռնատարների վարորդներից և հացահատկի բեռնափոխադրումներով զբաղվող ընկերություններից զատ Վրաստանի կառավարությունը բարդ դրության մեջ էր դնում նաև հարևան Հայաստանին:
Վրաստանը Հայաստանի համար միակ տարանցիկ տարածքն է, որի միջոցով երկիր հացահատիկ է մտնում: Այդ պատճառով էլ Վրաստանում հացահատկի ավտոտրանսպորտային փոխադրումները կարող էին զգալիորեն թանկացնել հացը Հայաստանում:
• Արտահանողների մի մասը կարծում է, որ Վրաստանի կառավարության որոշումն ուղղված էր պետական Վրացական երկաթուղիներ ընկերության շահերին, որը կավելացներ իր բեռնափոխադրումների ծավալները: 2012թ-ից Վրացական երկաթուղիների բեռնափոխադրումների ծավալը գրեթե կրկնակի կրճատվել է:
• Վրացական երկաթուղիների հրապարակած ֆինանսական հաշվետվության համաձայն՝ 2018թ-ի առաջին կիսամյակում ընկերության մաքուր եկամուտը նվազել է 36 տոկոսով (74 մլն լարի): 2017թ-ի նույն ժամանակահատվածում ընկերության եկամուտները գերազանցում էին 116 մլն լարին:
• Եկամտին զուգահեռ կրճատվել են նաև Վրացական երկաթուղիների փոխադրումների ծավալները և կազմել ընդամենը 5 մլն տոննա բեռ:
• Հետաքրքրական է, որ 2013թ-ի ապրիլից մինչև 2017թ-ի նոյեմբերի 13-ը նախքան ֆինանսների նախարար նշանակվելը Վրացական երկաթուղիների ղեկավարը Մամուկա Բախտաձեն էր, որն այսօր երկրի վարչապետի պաշտոնն է զբաղեցնում:
