Վրաստանում գործող Ռազմավարական վերլուծության կենտրոնի հիմնադիր Գիորգի Ռուխաձեն բարձր է գնահատում Ռուսաստանում ԱՄՆ նախկին դեսպանի և Ուկրաինայի նախագահի գրասենյակին կից գործող՝ Ռուսաստանի դեմ պատժամիջոցների խմբի համակարգող Մայքլ Մաքֆոլի վերջին հարցազրույցը և ասում, որ սա Մաքֆոլի վերջին նախազգուշացումն է։
Մայքլ Մաքֆոլը հայտարարել է, որ ունի բավականին ծանրակշիռ ապացույցներ այն մասին, որ վրացի անհատներն ու կազմակերպությունները Ռուսաստանին օգնում են շրջանցել պատժամիջոցները։
«Մեր խումբը քննարկել է Վրաստանից կոնկրետ անձանց և կազմակերպությունների, մտածում ենք նրանց նկատմամբ պատժամիջոցներ սահմանելու մասին։ Ամառվա ընթացքում կհրապարակենք նոր փաստաթղթեր։ Մենք ունենք բավական ծանրակշիռ ապացույցներ, որոնք ցույց են տալիս, որ նրանք օգնում են Ռուսաստանին շրջանցել պատժամիջոցները կամ, այսպես ասած, «քարավան կտրել», և մենք ցանկանում ենք լույս սփռել դրա վրա», — ասել է Մայքլ Մաքֆոլը:
Գիորգի Ռուխաձե. «Երբ ԱՄՆ-ի, Եվրամիության և Մեծ Բրիտանիայի ներկայացուցիչները միասին եկան [Վրաստան]՝ քննարկելու պատժամիջոցները, նրանք մեզ ցույց տվեցին ցուցակ 38 ապրանքների, որոնք չի կարելի արտահանել Ռուսաստան: Նրանց հանդիպումների ու ճեպազրույցների նպատակն ինչ-որ մեկին պատժելը չէր, այլ Ռուսաստանին թույլ չտալ ստանալ այնպիսի ապրանքներ, որոնք նա կարող է օգտագործել ռազմական արդյունաբերության մեջ։ Ինչ վերաբերում է Մաքֆոլի խմբին, ապա նրանք չունեն կանխարգելման խնդիր, դա հետաքննական մարմին է, որը փաստեր է փնտրում, բայց եթե գտնում է, չի կարող պատժել, այդ տեղեկատվությունը տրամադրում է ԱՄՆ-ին, ԵՄ-ին, և դրանց հիման վրա քաղաքական գործիչները որոշումներ են կայացնում։
Կարծում եմ՝ սա Մաքֆոլի վերջին նախազգուշացումն է, և եթե որևէ մեկը ինչ-որ բան է անում, պետք է ժամանակին արձագանքի։
Երկրի համար շատ դժվար է, երբ իշխանությունների ներկայացուցիչն ընկնում է պատժամիջոցների տակ, քանի որ դա նշանակում է, որ նա իշխանությունն օգտագործում է Ռուսաստանին օգնելու համար։
Վատ է նաև այն, որ Georgian Airways-ը հայտնվել է ուկրաինական պատժամիջոցների տակ։ Եվ ես չեմ բացառում, որ շուտով այս ընկերությունը հայտնվի նաև միջազգային պատժամիջոցների տակ։ Ավելի վատ կլինի, եթե պատժամիջոցներ սահմանվեն առանձին պաշտոնյաների նկատմամբ։
Սպասենք Մաքֆոլի հետագա հայտարարություններին, բայց կարծում եմ, որ Իվանիշվիլիին ու նրա շրջապատին քիչ ժամանակ է մնացել հնչեցվածը հասկանալու համար։
«Վրացական երազանք» կուսակցությունը թոթվում է ուսերը և ասում, որ դա անարդար է, կողմնակալ է: Ի՞նչ տարբերություն՝ օբյեկտիվ է, թե ոչ։ Կարևորն այն է, որ դուք կասկածելի երկրների ցանկում եք»։
