Երևանում 252 անձ տուգանվել է տրանսպորտի ուղեվարձը չվճարելու համար․ չլուծված խնդիրներ կան
Ստուգումներ և տուգանքներ Երևանի տրանսպորտում
Հայաստանի մայրաքաղաքում տրանսպորտի ուղեվարձը չվճարելու համար արդեն իսկ տուգանվել է 252 քաղաքացի։ Երևանի քաղաքապետարանից տեղեկանում ենք, որ նրանցից 145-ը տուգանվել է ուղավարձը չվճարելու, 34-ը՝ արտոնություն ունեցող այլ անձի քարտով վճարելու, 73-ը՝ հսկիչների հորդորից հետո վճարելու համար։
Հանրային տրանսպորտում հսկողական աշխատանքներ են ընթանում օգոստոսի 5-ից։ Աշխատանքներում ներգրավված են քաղաքապետարանի հասարակական կարգի պահպանության ծառայության 47 տեսուչներ։
Քաղաքացիները կիրառվող մեխանիզմի վերաբերյալ տարբեր կարծիքներ ունեն։ Մի մասը տուգանքի ինստիտուտի ներդրումն անհրաժեշտ է համարում, մյուս մասը հայտարարում է, թե իշխանությունն իրեն դիտարկում է որպես «տուգանքի մատերիալ»։ Երևանի քաղաքապետարանից, սակայն, վստահեցնում են՝ միակ նպատակն այն է, որ քաղաքացիները վճարեն ստացած ծառայության դիմաց և «երթևեկեն օրինական ճանապարհով»։
Քաղաքային իշխանությունը 10 հազար դրամ տուգանում է այն քաղաքացիներին, որոնք ընդհանրապես հրաժարվում են վճարելուց, 15 հազար դրամ նրանց, ովքեր այլ անձի արտոնությունից են օգտվում, և 3000 դրամ այն անձանց, ովքեր տեսուչի հորդորից հետո համաձայնում են վճարել։
- Գործադո՞ւլ, թե՞ շանտաժ․ երևանցիների մեծ մասը մնացել է առանց տրանսպորտի
- Ինչո՞ւ է աղմուկի մակարդակն այդքան բարձր Հայաստանում, ինչպե՞ս պայքարել դրա դեմ. կարծիքներ
- Երևանի տրանսպորտը` դժվար լուծվող խնդիր: Առաջարկներ փորձագետից
Երևանի քաղաքապետը շփվել է ուղևորների հետ
Քաղաքապետ Տիգրան Ավինյանն այսօր հանրային տրանսպորտում շփվել է քաղաքացիների հետ։ Նա իր ֆեյսբուքյան էջում հրապարակել է տեսանյութ, որտեղ պատասխանում է ուղևորներին հուզող հարցերին։ Հարցերը հիմնականում վերաբերում են տրանսպորտի աշխատանքին, վճարման եղանակներին և արտոնյալ խմբերի համար գործող զեղչային համակարգին։
«Տրանսպորտը բարեգործական հիմնադրամ չէ»․ համատարած ստուգումներ
Հասարակական կարգի պահպանության ծառայության տեսուչները հատուկ սարքերով ստուգում են՝ քաղաքացին վճարե՞լ է ուղեվարձը, թե՞ ոչ, վճարելիս օգտագործել է սեփակա՞ն, թե՞ արտոնյալ խմբում ներառված մեկ այլ քաղաքացու քարտ։ Ներկա պահին ծառայությունն ունի ավելի քան 30 նման սարք։
Factor TV-ին նկարահանում է իրականացրել ստուգումներից մեկի ժամանակ։ Եղել են ուղևորներ, որոնք տրանսպորտից օգտվելու դիմաց չվճարելը պայմանավորել են տրանսպորտի վատ աշխատանքով։ Ուղևորներից մեկն էլ պնդել է, թե նստելուց առաջ վճարել է, սակայն հատուկ սարքը վճարման փաստը չի արձանագրել։
Քաղաքապետարանի հասարակական կարգի պահպանության ծառայության պետի պաշտոնակատար Ավետիք Բաբայանը պնդել է՝ տրանսպորտը բարեգործական հիմնադրամ չէ, քաղաքացիներին հորդորել է վճարել ծառայության դիմաց։
«Ստուգումները համատարած են, հատուկ ժամեր չկան։ Վերահսկողությունը շարունակական է լինելու»,- հայտնել է Բաբայանը։
Ուղևորը պետք է ապացուցի, որ վճարել է, բայց կան դեպքեր, երբ դա հնաավոր չէ
Երևանում հասարակական տրանսպորտից օգտվելու համար քաղաքացիները վճարում են 3 եղանակով՝
- տրանսպորտային քարտով,
- բանկային քարտով,
- Telcell բջջային հավելվածով (QR կոդ)։
Խնդիրն այն է, որ բջջային հավելվածով վճարելու դեպքում էլեկտրոնային կտրոնը՝ QR կոդը չի պահպանվում հավելվածում։ Ուստի հնարավոր չէ այն մոտեցնել հատուկ սարքին՝ վճարման փաստը ստուգելու համար, եթե, իհարկե, քաղաքացին չունի QR կոդի էկրանակադրը (screenshot)։
«Այն դեպքերում, երբ QR կոդը հավելվածում չի երևում, տվյալները Երևանի կառավարման տեխնոլոգիաների կենտրոնից են փոխանցում»,- հայտնել է Ավետիք Բաբայանը։
«Անհիմն են տուգանել»․ քաղաքացիներից մեկի ահազանգը
Մեկ ամիս չկա, ինչ տուգանքների ինստիտուտ է ներդրվել։ Քաղաքացիները, սակայն, արդեն ահազանգում են խնդիրների մասին։ Օրինակ՝ նրանցից մեկը «Ազատություն» ռադիոկայան է դիմել և պատմել. բանկային քարտով վճարել է, սակայն իրեն չվճարելու պատճառաբանությամբ տուգանել են։
«Իմ քարտը վերցրեց ձեռքը, ինքը իմ քարտը նայեց, տեսավ՝ ես վճարել եմ, բայց քանի որ երևի նկարում էր, երևի չգիտեմ՝ ինչ էր, տրամադրություն չուներ, Դուք չեք վճարել, ասում է: Նույնականացրեց, ես ասացի՝ դուք իրավունք չունեք ինձ նկարել, որովհետև ես վճարել եմ»,- պատմել է քաղաքացի Կարինե Գրիգորյանը:
Միջադեպից հետո Գրիգորյանը դիմել է բանկ, ստացել գործարքների քաղվածքը։ Ըստ բանկային փաստաթղթի՝ կնոջ քարտից երկու անգամ է ուղեվարձ գանձվել՝ մեկ անգամ 14:40-ին, մեկ անգամ էլ՝ 10 րոպե անց:
Լրատվամիջոցի հետ զրույցում Երևանի քաղաքապետարանից ասել են՝ գուցե տեխնիկական խնդիր է եղել, խոստացել են ծանոթանալ փաստաթղթին։ Քաղաքացուց, սակայն, ներողություն չեն խնդրել պատճառված անհարմարության համար։
Մեկնաբանություններ
Լրագրող Հակոբ Կարապետյանը քաղաքացուն անհիմն տուգանելու դեպքի մասին գրում է․
«Քաղաքապետարանի հսկիչները մտնում են ավտոբուս, ստուգում են ուղևորների մոտ տոմսի առկայությունը ու տուգանում են մի կնոջ, որը դրանից մի քանի րոպե առաջ վճարել էր տերմինալով։ Դա էլ քիչ է, առանց քաղաքացու համաձայնությունը ստանալու, նկարահանում են։
Պատկերացրեք, թե ինչ սթրեսի են ենթարկում մարդկանց ու ինչ վիրավորանք են հասցնում։ Լավ է, որ էս դեպքում քաղաքացին հետևողական է եղել, բանկից ստացել է իր վճարման ապացույցներն ու կապվել է լրագրողների հետ»։
Քաղաքական մեկնաբան Հակոբ Բադալյանն ուշադրություն է հրավիրում այն հանգամանքի վրա, որ ստուգում իրականացնող տեսուչներն առանց համազգեստի են․
«Դիտելով տարածված տեսանյութերը՝ տրանսպորտում այսպես ասած հսկիչների աշխատանքի վերաբերյալ, եզրակացությունն այն է, որ քաղաքացին ներկայումս ոչ միայն տուգանքի, այլև արհամարանքի «մատերիալ» է:
Արհամարանք ոչ միայն քաղաքապետարանի, այլ նաև խորհրդարանի մակարդակով: Որովհետև, օրենքը, որով իրականացվում է այդ աշխատանքը համայնքային տրանսպորտում, բնականաբար, ընդունել է խորհրդարանը: Իբրև թե հանրությանը ներկայացնող կառույցում հարկ չեն համարել օրենսդրորեն կարգավորել ոչ միայն քաղաքացուն տուգանելու իրավասությունը, այլև քաղաքացու հետ այդ գործընթացի պարագայում հարաբերվելու կանոնները՝ թե՛ վարքագծային, թե՛ անգամ համազգեստային:
Տրանսպորտում հսկողություն իրականացնող և տուգանելու, առավել ևս անձի նույնականացում իրականացնելու «իրավունք» ունեցողը պետք է պարտավորված լինի տրանսպորտում այդ գործառույթը իրականացնել նախ իր նույնականացումը «ապահովող» հանդերձանքով և տրանսպորտում ներկայանալու հստակ կանոններով: Այլապես, նայում ես տեսանյութը, ու տպավորություն է, որ պարզապես «թաղի տղերքով» որոշել են տրանսպորտում ինչ-որ բան հսկել»։
Հետևեք մեզ — Facebook | Youtube
Ստուգումներ և տուգանքներ Երևանի տրանսպորտում
