«Առայժմ չի նշմարվում, որ Իրանը ՀՀ-ին կարող է զենք վաճառել»․ կարծիք Երևանից
Սուրեն Պապիկյանի այցը Իրան
Պաշտոնական այցով Իրանում էր Հայաստանի պաշտպանության նախարար Սուրեն Պապիկյանը։ ՀՀ ռազմական գերատեսչության փոխանցմամբ՝ նա Թեհրանում հանդիպումներ է ունեցել Իրանի պաշտպանության և զինված ուժերի աջակցման նախարարի, ԶՈՒ գլխավոր շտաբի պետի, ինչպես նաև Իրանի նախագահի հետ։
Հաղորդվում է, որ նախագահ Մասուդ Փեզեշքիանի հետ հանդիպման ընթացքում Պաշտպանության նախարար Պապիկյանն ընդգծել է «Իրանի շուրջ ստեղծված իրավիճակի՝ դիվանագիտական ճանապարհով լուծման անհրաժեշտությունը»։
Բացի այդ, կողմերն ընդգծել են ՀՀ և Իրանի միջև «բարձր մակարդակի հարաբերությունների շարունակական զարգացման, ինչպես նաև տարածաշրջանում խաղաղության և կայունության ամրապնդման կարևորությունն ու անհրաժեշտությունը»։
«Քննարկվել են Հայաստան-Իրան համագործակցությանը, այդ թվում՝ պաշտպանության ոլորտում փոխգործակցությանը վերաբերող հարցեր»,- ասված է հաղորդագրությունում։
Իրանագետ Արմեն Վարդանյանը «Ռադիոլուրի» եթերում շեշտել է՝ ՀՀ-ն ամեն կերպ փորձում է ռազմատեխնիկական համագործակցություն զարգացնել Իրանի հետ։
«Կողմերը հիմա գնում են ռազմավարական գործընկերության փաստաթղթի ստորագրման։ Վերջերս այդ մասին Իրանի դեսպանը հայտարարեց։ Այս տեսանկյունից շատ կարևոր է, որ նաև Հայաստան-Իրան ռազմատեխնիկական գործակցությունը զարգանա։ Չնայած առայժմ չի նշմարվում, որ Իրանը ՀՀ-ին կարող է զենք վաճառել, բայց ապագայում չի կարելի բացառել նաև այդ սցենարը»,- հայտարարել է Վարդանյանը։
Ի՞նչ տեղեկություններ են հաղորդվել ՀՀ պաշտպանության նախարարի այցի մասին, մեկնաբանություն
- «Թրամփի կողմից 25% մաքսատուրքի սահմանումը մեծ մաքսային բեռ չի դառնա ՀՀ համար»․ կարծիք
- «Այցը Հայաստան՝ հարևան երկրներ առաջնահերթ ուղևորությունների շարքից»․ Իրանի նախագահ
- «Էներգակիրների մասով լուրջ պոտենցիալ կա»․ փորձագետը՝ ՀՀ-Իրան տնտեսական կապերի մասին
Քննարկվել են տարածաշրջանային և միջազգային անվտանգությանն առնչվող հարցեր
Պաշտպանության նախարար Սուրեն Պապիկյանի՝ Թեհրան կատարած այցի մասին սուղ տեղեկություններ են հաղորդվել։ ՊՆ փոխանցմամբ՝ նախարարը հանդիպել է իրանցի գործընկերոջ՝ Պաշտպանության և զինված ուժերի աջակցման նախարար, բրիգադի գեներալ Ազիզ Նասիրզադեի հետ, քննարկել փոխգործակցությանը վերաբերող մի շարք հարցեր․
«Զրուցակիցները նաև մտքեր են փոխանակել տարածաշրջանային ու միջազգային անվտանգությանն առնչվող մի շարք հարցերի վերաբերյալ»։
Նշվում է, որ նախարարները բարձր են գնահատել պաշտպանության բնագավառում Հայաստան-Իրան համագործակցության մակարդակն ու հաստատակամություն հայտնել շարունակել աշխատանքները երկկողմ հարաբերությունների զարգացման ուղղությամբ։
Հրապարակված լուսանկարներից պարզ է դառնում, որ տեղի է ունեցել ոչ միայն երկկողմ, այլև ընդլայնված՝ պատվիրակությունների կազմով հանդիպում։
Պապիկյանը Թեհրանում հանդիպել է նաև Իրանի Զինված ուժերի գլխավոր շտաբի պետ, գեներալ-մայոր Աբդոլրահիմ Մուսավիի հետ: Օրակարգում են եղել ինչպես պաշտպանության ոլորտում երկկողմ համագործակցությանը, այնպես էլ տարածաշրջանային անվտանգությանն առնչվող հարցեր։
«Վկայում է հարաբերությունների վերելքի մասին»․ դեսպան
Անդրադառնալով Սուրեն Պապիկյանի այցին՝ ՀՀ-ում Իրանի դեսպան Խալիլ Շիրղոլամին նշել է, որ այն նախապես ծրագրված է եղել։ Այցը, ըստ նրա, վկայում է ՀՀ-Իրան հարաբերությունների վերելքի մասին։
Դեսպանը հավանական է համարել ապագայում մասշտաբային հայ-իրանական զորավարժությունների անցկացումը։
Ընդգծել է՝ պաշտպանական ոլորտում երկու երկրների գործակցությունը հիմնված է «պատմական կապերի, սահմանների անձեռնմխելիության և երկու երկրների տարածքային ամբողջականության պահպանման վրա»։
Հայ-իրանական սահմանը Խալիլ Շիրղոլամին բնորոշել է որպես «խաղաղության սահման» և հավելել, որ այն կարևոր նշանակություն ունի երկու երկրների համար։
Փորձագիտական կարծիք
Իրանագետ Արմեն Վարդանյանի խոսքով՝ Հայաստան-Իրան երկխոսությունը ռազմավարական բնույթ ունի։ Հիշեցնում է՝ Հնդկաստանից ձեռքբերված զենքն ու սպառազինությունը ՀՀ են հասնում հենց հարևան Իրանի տարածքով։
«Որոշ ժամանակ առաջ որոշակի խնդիրներ էին առաջացել։ Եվ Հայաստանի իշխանությունների երկխոսությունը Իրանի իշխանությունների հետ այդ առումով Հայաստանի համար շատ կարևոր էին»,- նկատել է նա՝ առանց մանրամասնելու։
Փորձագետը հնարավոր է համարում երկկողմ քննարկումների արդյունքում հայ-իրանական նոր զորավարժությունների անցկացումը։
«Ճիշտ է՝ նախորդ զորավարժությունների բնույթը այնպիսին էր, որ Հայաստանն իր տարածքում էր անում, Իրանը՝ իր, բայց դրանք, այնուամենայնիվ, համատեղ էին։ Չեմ բացառում, որ այդ սցենարն ավելի զարգանա, և ավելի լայնամասշտաբ համատեղ զորավարժություններ անցկացվեն»,- ասել է Վարդանյանը։
Հայաստանի ու Իրանի զինված ուժերի հատուկ նշանակության ստորաբաժանումները 2025 թ․-ի ապրիլի 9-10-ը իրականացրել էին համատեղ զորավարժություն՝ յուրաքանչյուր երկիր իր տարածքում։
«Զորավարժությունը ենթադրում է Հայաստան-Իրան պետական սահմանին տեղակայված սահմանային անցակետերի վրա պայմանական ահաբեկչական խմբերի հարձակումը չեզոքացնելու գործողություններ»,- հայտարարել էր ՀՀ պաշտպանական գերատեսչությունը։
Իրանական կողմը, իր հերթին, վստահեցրել էր, որ Իրանի և Հայաստանի սահմանային տարածքներին որևէ վտանգ չի սպառնում, զորավարժությունների անցկացման նպատակը «սահմանային անվտանգության ամրապնդումն է»։
Ըստ Վարդանյանի՝ բնական է, որ Իրանի շուրջ առկա լարվածությունը նույնպես դարձել է քննարկման առարկա։ Ասում է՝ Թեհրանին մտահոգում են Հայաստանի հետ կապված հետևյալ հարցերը՝
- «Հայաստանը լինի անվտանգ,
- ՀՀ-ն չլինի հակաիրանական գործողությունների հարթակ,
- Հայաստանի սահմանը փոփոխությունների չենթարկվի»։
«Հայաստանին էլ որոշ հարցեր են մտահոգում։ Եվ այդ ուղղությամբ, բնականաբար, քննարկումներ եղել են միշտ ու կշարունակվեն»,- ամփոփել է իրանագետը։
Հետևեք մեզ — Facebook | Youtube
Սուրեն Պապիկյանի այցը Իրան
