Ձերբակալվել է Հայաստանի պաշտպանության նախկին նախարարը․ ԱԱԾ-ն հաստատում է
Հայաստանի Ազգային անվտանգության ծառայությունը հաստատել է պաշտպանության նախկին նախարար Դավիթ Տոնոյանի ձերբակալման մասին լուրը, որն այդ պաշտոնը զբաղեցնում էր 2018-2020 թվականներին։ Նա կասկածվում է առանձնապես խոշոր չափի հափշտակության մեջ։
ԱԱԾ-ն հաստատում է նաև Դավիթ Գալստյանի ձերբակալման մասին լուրը, որը հայկական բանակին տարիներ շարունակ զենք մատակարարող ընկերության ղեկավարն է։
Երկուսն էլ ձերբակալվել են քրեական գործի շրջանակում, որը հետաքննում է բանակի կարիքների համար սպառազինության մատակարարման գործընթացում Հայաստանի պաշտպանության նախարարության և Զինված ուժերի բարձրաստիճան պաշտոնյաների չարաշահումները։
Սեպտեմբերի 29-ին այս մասին հաղորդել էր «Հրապարակ» թերթը՝ վկայակոչելով իր աղբյուրները։ Թերթի հրապարակման մեջ ասվում էր նաև, որ ձերբակալությունից առաջ նախկին նախարարի բնակարանում խուզարկություն է իրականացվել։
- Անկախության 30-ամյակը․ երիտասարդ հին Հայաստանը՝ երկու քարի արանքում
- Ի՞նչ կտա ԵԽԽՎ ընդունած բանաձևը Հայաստանին։ Հայ փորձագետները լավատես են
- «Հայաստանը շարժվում է ճիշտ ուղղությամբ»․ հարցման արդյունքներ
Էլ ի՞նչ է հայտնի
![Լուսանկարը՝ aravot.am-ի։ Աջից՝ Տոնոյանը, ձախից՝ Գալստյանը](https://jam-news.net/app/uploads/2021/09/ARAVOT_davit-tonoyan-davit-galstyan.webp_.jpg)
ԱԱԾ-ն հաղորդում է, որ ձերբակալվածները գործում որպես մեղադրյալ են ներգրավվել առանձնապես խոշոր չափի՝ 2 277 323 840 դրամ [$4,7 մլն] գումարի հափշտակության, ինչպես նաև «կեղծիքներ, հանրորեն վտանգավոր արարքներ կատարելու» համար։
Դատարան է ներկայացվել կալանավորման մասին միջնորդություն։
Ինչպես հաղորդում է ԱԱԾ-ն, քրեական գործեր են հարուցվել նաև երկրի Զինված ուժերի նախկին և գործող բարձրաստիճան այլ պաշտոնյաների դեմ։
Սակայն նախկին նախարարի փաստաբանը հաղորդում է, որ Դավիթ Տոնոյանն իրեն մեղավոր չի ճանաչել։ Ավելին՝ փաստաբանը պնդում է, որ ձերբակալության որոշումն ու կալանավորման միջնորդությունը հիմնավորված չեն, քանի որ դատարանն ավելի վաղ արդեն որոշում է կայացրել, որով Տոնոյանին մեղսագրված արարքը հերքվում է դատարանի կողմից ձեռք բերված ապացույցներով։
Ինչ վերաբերում է Mosston Engineering-ի տնօրեն Դավիթ Գալստյանին, որի ընկերությունը տարիներ շարունակ Հայաստանի ԶՈւ զենքի մատակարարն է եղել, ապա նա արդեն կալանավորվել էր 2020 թ-ի փետրվարին։ Սակայն մայիսին վերաքննիչ դատարանը չեղարկել էր առաջին ատյանի դատարանի որոշումը, և նա ազատ էր արձակվել։
ԱԱԾ հաղորդագրության համաձայն՝ Դավիթ Գալստյանի ընկերությունը 2018 թ-ին պայմանագիր է կնքել ՊՆ հետ՝ 1983-1986 թթ․ արտադրության արկերի մատակարարման մասին, սակայն մատակարարել է 1977 թ-ի զինամթերք։
Պարզվել է, որ մարտավարական բնութագրերով դրանք զգալիորեն զիջել են այն արկերին, որոնց կարիքն ունեցել է բանակը, և դրանցով «անհնար է եղել մարտական խնդիրներ կատարել»։ Այս առնչությամբ ձերբակալվածը կասկածվում է ավելի քան մեկ միլիոն դոլարի յուրացման մեջ։
Mosston Engineering-ի ղեկավարի փաստաբանը դեռ փետրվարին հայտարարել էր, որ դատարանին անհերքելի ապացույցներ են ներկայացվել պայմանագրի պահանջների համապատասխան մատակարարված ապրանքի վերաբերյալ․
«Իրականում այս դրվագը, որը վերաբերում է 70-ական թվականներին, շատ զավեշտալի է, որովհետև գործի նյութերը՝ բոլոր ներկայացված ապացույցներով, հերքում են, որ մատակարարվել են 70-ականների արկեր։ Պարզապես մարդիկ, չլինելով մասնագետ, չեն տեսնում տարբերությունը արկերի արտադրման տարեթվի և հստակ թվերի միջև, որոնք նշված են արկերի դետալների վրա։ Խնդիրը սա է»։
Էլ ովքե՞ր են ներգրավված այս գործում
Սեպտեմբերի 29-ից Հայաստանի լրատվամիջոցները հաղորդում են նույն գործով Հայաստանի ԶՈւ գլխավոր շտաբի պետի տեղակալ Ստեփան Գալստյանի ձերբակալման մասին։ Պաշտոնապես հաստատվել է այն լուրը, որ նա հրավիրվել է Ազգային անվտանգության ծառայություն։
Ավելի վաղ հրապարակվել է տեղեկություն այն մասին, որ այդ նույն գործով ձերբակալվել է ԶՈւ ավիացիայի վարչության նախկին պետ Ավետիք Մուրադյանը։
ԱԱԾ հաղորդագրությունում առանց անուն նշելու ասվում էր, որ բարձրաստիճան զինվորականն իմացել է, որ մատակարար ընկերություններից մեկը 2011 թ-ին ժամկետանց և անորակ զինամթերք է ներկրել, սակայն դա չի խանգարել գնել այն, որի համար պետբյուջեից վճարվել է 4,7 մլն դոլար։ Իսկ 2009-2019 թթ․ ավիացիայի վարչության պետի պաշտոնը զբաղեցնում էր գեներալ-մայոր Ավետիք Մուրադյանը։
Ասեկոսեների մակարդակում և սեփական աղբյուրների վկայակոչմամբ՝ հայկական լրատվամիջոցները գրում են, որ մոտ օրերս հնարավոր է նաև պաշտպանության նախկին նախարար Սեյրան Օհանյանի և Հայաստանի ԶՈւ գլխավոր շտաբի նախկին պետ Յուրի Խաչատուրովի ձերբակալությունը։ Երկուսն էլ այդ պաշտոնները զբաղեցրել են 2008-2016 թթ-ին։
ԱԱԾ վերջին հայտարարությունում ասվում է, որ «քրեական գործով շարունակվում են ձեռնարկվել մեծածավալ օպերատիվ-հետախուզական և քննչական գործողություններ՝ պետության առանձնապես խոշոր չափերի գույքը հափշտակելու հանցավոր մեխանիզմի ամբողջական պատկերի բացահայտման, դեպքի հետ առնչություն ունեցած այլ պաշտոնատար անձանց գործողություններն անհատականացնելու և նրանց նկատմամբ քրեական հետապնդումներ սկսելու ուղղությամբ»։