Հայաստանը դիմել է Մարդու իրավունքների եվրոպական դատարան։ Պահանջը նոյեմբերի 16-ին ՀՀ ինքնիշխան տարածքում Ադրբեջանի սանձազերծած ագրեսիվ գործողությունների ընթացքում գերեվարված հայ զինծառայողների հիմնարար իրավունքների ապահովումն է։ Այս մասին տեղեկանում ենք ՄԻԵԴ-ում ՀՀ ներկայացուցչի ֆեյսբուքյան էջից։
«Եվրոպական դատարան է ներկայացվել Դատարանի կանոնների 39-րդ Կանոնի ներքո Ադրբեջանի նկատմամբ միջանկյալ միջոց կիրառելու դիմում, որի նպատակն է երաշխավորել գերեվարված զինծառայողների՝ Մարդու իրավունքների եվրոպական կոնվենցիայով երաշխավորված կյանքի և խոշտանգումներից զերծ մնալու իրավունքների ապահովումը»,- ասված է հաղորդագրությունում։
Եվրոպական դատարանի կանոնակարգը նոր խմբագրությամբ ուժի մեջ է մտել 2020 թվականի հունվարի 1-ին։
Ըստ այդ կանոնակարգի 39-րդ՝ միջանկյալ միջոց կիրառելու մասին դրույթի՝ դիմումը ստանալուց հետո դատարանը կարող է ձեռնարկել հետևյալ միջոցառումները՝
Պալատը կամ, հավուր պատշաճի, Սեկցիայի նախագահը կամ հատուկ նշանակված դատավորը կարող է կողմերից մեկի կամ շահագրգիռ որևէ անձի միջնորդությամբ կամ սեփական նախաձեռնությամբ առաջարկել կողմերին միջանկյալ միջոցներ, որոնք իր կարծիքով պետք է ընդունվեն կողմերի կամ վարույթի պատշաճ իրականացման շահերից ելնելով:
Անհրաժեշտության դեպքում կոնկրետ գործով ընդունված միջոցի մասին ծանուցումը կարող է անհապաղ ուղարկվել Նախարարների կոմիտե:
Պալատը կամ, հավուր պատշաճի, Սեկցիայի նախագահը կամ հատուկ նշանակված դատավորը կարող է կողմերից տեղեկություններ պահանջել նշված միջանկյալ միջոցի իրականացմանն առնչվող որևէ հարցի վերաբերյալ:
Միջանկյալ միջոցներ կիրառելու միջնորդությունների վերաբերյալ որոշում կայացնելու համար Դատարանի նախագահը կարող է որպես հատուկ դատավոր նշանակել Սեկցիաների նախագահների տեղակալներին:
Հիշեցնենք, որ նոյեմբերի 16-ին ադրբեջանական ԶՈՒ-ը ներխուժել էին ՀՀ ինքնիշխան տարածք։ Հայ-ադրբեջանական սահմանի արևելյան ուղղությամբ ժամեր շարունակ ընթանում էին տեղային մարտեր։ Սրացումն ուղեկցվում էր հրետանու, զրահատեխնիկայի և տարբեր տրամաչափի հրաձգային զենքերի կիրառմամբ։ Ռազմական գործողությունները դադարեցին ռուսական կողմի միջնորդությունից հետո միայն։ Արդյունքում երկու կողմերն էլ ունեն զոհեր ու վիրավորներ։ Կան նաև 24 հայ զինծառայողներ, որոնց ճակատագիրը մինչ օրս անհայտ է։
