Հստակեցվում է ՀՀ-ի մասնակցության շրջանակը ԵՄ ճգնաժամային կառավարման գործողություններին
ՀՀ-ի մասնակցությունը ԵՄ ճգնաժամային կառավարմանը
Հայաստանի խորհրդարանի Եվրոպական ինտեգրման հարցերի հանձնաժողովը դրական եզրակացություն է տվել «ՀՀ և Եվրամիության միջև ԵՄ ճգնաժամային կառավարման գործողություններում Հայաստանի մասնակցության շրջանակը սահմանելու մասին» համաձայնագիրը վավերացնելու մասին օրենքի նախագծին։
Փաստաթուղթը ստորագրվել էր ամիսներ առաջ՝ հունիսի 30-ին։ Առաջիկայում այն կքննարկվի նաև ԱԺ լիագումար նիստում։ Համաձայնագրի վավերացումից հետո Հայաստանը կարող է մասնակցել ԵՄ ճգնաժամային կառավարման ինչպես քաղաքացիական, այնպես էլ ռազմական գործողությունների։
Լրագրողները Արտաքին գործերի փոխնախարար Մնացական Սաֆարյանից հետաքրքրվել են՝ արդյո՞ք խոսքը զինված ներկայության մասին է։
«Որոշ դեպքերում կարող ենք զենքով լինել, մյուս դեպքերում՝ առանց զենքի։ ԵՄ ճգնաժամային կառավարումը տարբեր ոլորտների է վերաբերում։ Կարող են լինել, օրինակ՝ բժիշկներ, սակրավորներ»,- արձագանքել է նա։
ԱԺ Եվրոպական ինտեգրման հանձնաժողովի նախագահ Արման Եղոյանի գնահատմամբ՝ զինված մասնակցությունից պետք չէ վախենալ կամ խորշել։
«Եթե մեր ռազմական գերատեսչությունը համարի, որ մեր փորձի և միջպետական համագործակցությունների տարբեր ասպեկտներ լրացնելու տեսանկյունից պետք է, այո, պետք է դրան էլ մասնակցենք, ինչպես ժամանակին մասնակցել ենք Իրաքում, Աֆղանստանում, Լիբանանում»,- հայտարարել է Եղոյանը։
Վավերացման ենթակա համաձայնագրով սահմանվում են Հայաստանի մասնակցության ընդհանուր պայմանները, այսինքն՝ վերանում է յուրաքանչյուր առաքելության համար առանձին պայմաններ սահմանելու անհրաժեշտությունը։
ԱԳՆ եզրակացության համաձայն՝ ԵՄ առաքելություններին ՀՀ-ի մասնակցությունը հնարավորություն կընձեռնի հաստատել, խորացնել կողմերի համապատասխան գերատեսչությունների միջև փոխգործակցելիությունը։ Դա էլ, իր հերթին, «կդյուրացնի հետագա համագործակցությունը տարբեր նախաձեռնությունների շրջանակներում»։
- ՀՀ-ում Եվրամիության ներդրումները կհասցվեն 2.5 միլիարդ եվրոյի․ եռակողմ հանդիպում Բրյուսելում
- «Այս վճռորոշ պահին կաջակցենք Հայաստանին»․ ԵՄ բարձր ներկայացուցչի այցը Երևան
- «Ոչ իրատեսական ակնկալիքներ չպետք է լինեն»․ ԵՄ-ՀՀ կոմիտեի նիստ Երևանում
«Վաղաժամ է ասել, թե կոնկրետ որտեղ ենք մասնակցելու»
Արտաքին գործերի նախարարի տեղակալ Մնացական Սաֆարյանի խոսքով՝ համաձայնագիրը հնարավորություն կտա ստանալ հրավերներ և որոշում կայացնել այս կամ այն առաքելությանը մասնակցելու մասին։
Լրագրողները պաշտոնյային հարցրել են՝ ո՞ր թեժ կետերում է հնարավոր, որ ՀՀ-ը մասնակցի։
«Հիմա չեմ կարող կոնկրետ ասել՝ որտեղ ՀՀ մասնակցությունը կլինի։ Առանձին հրավերներ կլինեն և կկայացվեն որոշումներ մասնակցության կամ չմասնակցության մասին։ Այս պահին վաղաժամ է մանրամասնել, թե որտեղ կմասնակցենք»,- նշել է նա։
Հայաստանի ներդրումը․ ի՞նչ է ասված համաձայնագրում
Ըստ համաձայնագրի՝ Հայաստանի անձնակազմի և անվտանգության ուժերի հնարավորություններն ու կարողությունները կարող են օգտագործվել ԵՄ ճգնաժամային կառավարման գործողություններում։
Նշվում է նաև, որ Եվրամիությունն է կայացնում որոշում երրորդ երկրներին, այդ թվում՝ ՀՀ-ին այդ գործողություններին մասնակցելու հրավեր ուղարկելու մասին։
«Հայաստանը կարող է ընդունել միության հրավերն ու առաջարկել իր ներդրումը։ Այդ դեպքում ԵՄ-ն է որոշում կայացնում առաջարկվող ներդրումն ընդունելու վերաբերյալ»,- ասված է փաստաթղթում։
JAMnews-ն ուսումնասիրել է համաձայնագիրը և պարզել, որ խոսքը ինչպես քաղաքացիական, այնպես էլ ռազմական գործողություններին ՀՀ-ի հնարավոր մասնակցության մասին է։
ՀՀ-ից գործուղված անձնակազմը ՝
- պետք է անցնի բժշկական զննություն,
- լինի պատվաստված (ըստ կարգի),
- ՀՀ-ի իրավասու մարմնի կողմից ճանաչված լինի ծառայության համար (համապատասխան եզրակացությամբ)։
Քաղաքացիական, ինչպես նաև ռազմական գործողության հրամանատարությունն ու վերահսկողությունն իրականացնելու է հրամանատարը՝ ԵՄ-ից։ Շեշտվում է, որ «գործողության ամենօրյա կառավարման մասով ՀՀ-ն օժտված է նույն իրավունքներով ու պարտականություններով, ինչ միության՝ գործողությանը մասնակցող անդամ պետությունները»։
Համաձայնագրում խոսվում է նաև ԵՄ գաղտնի տեղեկատվության պաշտպանության ապահովման անհրաժեշտության մասին, այդ թվում՝ տեղեկատվության փոխանակման ժամանակ անվտանգության ապահովման ընթացակարգերի մասին առանձին համաձայնագիր կնքելու միջոցով։
«Հայաստանի վարած արտաքին քաղաքականության առումով նպատակահարմար է»․ ԱԳՆ
Խորհրդարանի կայքում հրապարակված ԱԳՆ եզրակացությունից տեղեկանում ենք, որ արտաքին քաղաքական գերատեսչությունը նպատակահարմար է համարում համաձայնագրի վավերացումը երկրի վարած «արտաքին քաղաքականության առումով»․
«Համաձայնագրի կնքումը դիտարկվում է նաև որպես ՀՀ վարած արտաքին քաղաքականությանը համահունչ պրակտիկ քայլ Հայաստան—ԵՄ համագործակցության խորացման և չափանիշների ներդրման տեսանկյունից»։
Նշվում է, որ համաձայնագիրը հնարավորություն կընձեռի ճգնաժամերի կառավարման ոլորտում լավագույնս օգտագործել Եվրոպական միության փորձն ու գիտելիքները: Բացի այդ, փաստաթուղթը կդառնա իրավական շրջանակ ԵՄ հետ գործակցությունը կանոնակարգելու համար։
«Հաշվի առնելով, որ վերջին շրջանում Հայաստանի և Եվրոպական միության միջև գործընկերության օրակարգը համալրվել է նաև անվտանգային և պաշտպանական ոլորտի համագործակցությամբ՝ համաձայնագիրը հնարավորություն կստեղծի այդ ուղղություններով ևս համագործակցության խորացման և հետագա ընդլայնման համար»,- ասված է եզրակացության մեջ։
Հետևեք մեզ — Facebook | Youtube
ՀՀ-ի մասնակցությունը ԵՄ ճգնաժամային կառավարմանը
