Իրանը քննարկում է «Տաթև» տարանցիկ ճանապարհի կառուցման աշխատանքներին իր մասնակցության հարցը
Հայաստանի արտգործնախարարն իրանցի պաշտոնակցին տեղեկացրել է, որ ադրբեջանական անցակետերը շրջանցող այլընտրանքային ճանապարհի կառուցումը գրեթե ավարտված է։ Գործընկերները Թեհրանում քննարկել են տրանսպորտային տարանցման վերջին մարտահրավերները և դրանց հաղթահարման ուղիները։ Այս մասին ՀՀ ԱԳ նախարար Արարատ Միրզոյանը հայտնել է Հոսեյն Ամիր Աբդոլահիանի հետ հանդիպմանը հաջորդած համատեղ ասուլիսի ժամանակ։
Արտգործնախարարության լրատվության և հանրային դիվանագիտության վարչության փոխանցմամբ՝ նախարար Միրզոյանը խոսել է նաև կոմունիկացիաների բացման շուրջ երկխոսություն սկսելու Հայաստանի պատրաստակամության մասին․
«Ադրբեջանը սխալ մեկնաբանությամբ փորձում է խոսել այսպես կոչված «Զանգեզուրի միջանցքի» մասին, որի վերաբերյալ որևէ բառ, որևէ պայմանավորվածություն չի եղել»։
Երկու երկրների ԱԳ նախարարները քննարկել են տարածաշրջանային զարգացումները։ Ըստ աղբյուրի՝ Միրզոյանը մանրամասն անդրադարձ է կատարել Լեռնային Ղարաբաղի դեմ ադրբեջանաթուրքական վերջին ագրեսիային և դրա հետևանքներին։
«Հայաստանի ինքնիշխան տարածքի նկատմամբ Ադրբեջանի ոտնձգությունները վտանգում են տարածաշրջանի կայունությանն ու անվտանգությանն ուղղված մեր ջանքերը։ Այս առումով մենք բարձր ենք գնահատում Հայաստանի տարածքային ամբողջականության և սահմանների անձեռնմխելիության վերաբերյալ Իրանի դիրքորոշումը», — նշել է Արարատ Միրզոյանը։
![](https://jam-news.net/app/uploads/2021/10/16333623313768-1024x576.jpeg)
Իրանցի նախարարն ասել է, որ իրենք մշակել են գործընթաց երկու երկրի տարանցիկ ճանապարհներն ու երթուղիներն աշխուժացնելու համար, ինչպես նաև վստահեցրել, որ առաջիկա շաբաթներին Իրանի և Հայաստանի հարաբերություններում մեծ ակտիվություն կլինի։
Ամիր Աբդոլահիանն ասել է՝ տարածաշրջանը և հյուսիսային հարևանները ծանր իրավիճակում են «տարածաշրջանի որոշ հատվածներում սիոնիստների և ահաբեկիչների ներկայության պատճառով»․
«Մենք թույլ չենք տա որոշ օտարերկրյա պետություններին ազդել Իրանի հարաբերությունների վրա իր հարևանների, այդ թվում՝ Հայաստանի հետ»։
Համատեղ ասուլիսի ժամանակ Հոսեյն Ամիր Աբդոլահիանը հայտարարել է, որ համաձայնության են եկել տնտեսության, առևտրի և զբոսաշրջության ոլորտներում համագործակցությունը զարգացնելու հարցում․
«Առևտուրն ու Հայաստանով անցնող տարանցիկ ուղին շահագործելը երկու երկրի համար փոխադարձ հետաքրքրություն ներկայացնող հարցեր են»:
Իրանական «Մեհր» գործակալության տեղեկություններով՝ հոկտեմբերի 5-ին Երևան է ժամանել Իրանի ճանապարհների և քաղաքաշինության նախարարի տեղակալի գլխավորած պատվիրակությունը։
Ըստ աղբյուրի՝ պատվիրակությունը եկել է քննարկելու Իրանի մասնակցությունը «Տաթև» կոչվող տարանցիկ ճանապարհի կառուցման աշխատանքներին։
Հիշեցնենք, որ երեք շաբաթ առաջ Գորիս-Կապան ճանապարհահատվածում ադրբեջանական անցակետ տեղադրվեց, մինչ օրս այնտեղով անցնելու համար իրանցի բեռնատարների վարորդները մաքսատուրք են վճարում։ Ադրբեջանական ուժերը ձերբակալել են երկու իրանցի վարորդի։ Նրանց ճակատագրի մասին որևէ լուր դեռևս չի հաղորդվել։