Վրաստանի նախագահը խախտել է Սահմանադրությունը․ ՍԴ եզրակացությունը
Զուրաբիշվիլին խախտել է Սահմանադրությունը
Վրաստանի Սահմանադրական դատարանն ընդունել է, որ Վրաստանի նախագահ Սալոմե Զուրաբիշվիլին խախտել է երկրի Սահմանադրությունը՝ ուղևորվելով ԵՄ երկրներ՝ հակառակ կառավարության արգելքին։
Այս եզրակացությունն այսօր՝ հոկտեմբերի 16-ին, հրապարակել է Սահմանադրական դատարանի պլենումը։
Դատարանի ինը անդամներից երեքը՝ Իրինե Իմերլիշվիլին, Գիորգի Կվենչհիլաձեն և Թեյմուրազ Տուգուշին այլ դիրքորոշում ունեն՝։
![Սահմանադրական դատարանի նախագահ Մերաբ Թուրավան ընթերցում է նախագահի իմփիչմենթի գործով եզրակացությունը. Լուսանկարը՝ IPN](https://jam-news.net/app/uploads/2023/10/391614836_875723454189937_1209447179963497382_n-1024x484.jpeg)
- «Ոչ մի տեղ չեմ գնալու, դադարեք երազել իմ հրաժարականի մասին»․ Վրաստանի նախագահ
- «Քաղաքական խարդախություն է». կարծիք Վրաստանի նախագահի նկատմամբ իմպիչմենտ սկսելու մասին
Ի՞նչ է նշանակում այս որոշումը
Այն նշանակում է, որ գործընթացն այժմ կտեղափոխվի խորհրդարան, որը կկարողանա Սալոմե Զուրաբիշվիլիի նկատմամբ իմպիչմենտի գործընթաց սկսել։
Նախագահին հեռացնելու համար անհրաժեշտ է 100 ձայն։
Եթե Սահմանադրական դատարանը հաստատի, որ պաշտոնատար անձը խախտել է Սահմանադրությունը, խորհրդարանը դատարանի որոշումը ստանալուց հետո երկու շաբաթվա ընթացքում կքննարկի հարցը և լիագումար նիստում կքվեարկի պաշտոնյայի իմպիչմենտի գործընթացի վերաբերյալ։ Խորհրդարանի որոշմամբ այս լիագումար նիստը կարող է փակ ռեժիմով կազմակերպվել։
Մանրամասներ
Սահմանադրական դատարանը հոկտեմբերի 5-ին ավարտել է նախագահի իմպիչմենտի վերաբերյալ միջնորդության քննարկումը։ Պլենումը երեք օրերի ընթացքում լսել է կողմերին:
Նախագահ Սալոմե Զուրաբիշվիլին ներկա չի եղել նիստերին։ Դատարանում նրա շահերը պաշտպանում էին խորհրդարանի նախկին փոխխոսնակ, «Վրացական երազանքի» նախկին անդամ Թամար Չուգոշվիլին և Սահմանադրական դատարանի նախկին դատավոր Մայա Կոպալեիշվիլին։
Նախապատմություն
Սեպտեմբերի 1-ին իշխող «Վրացական երազանք» կուսակցությունն իմպիչմենտի գործընթաց մեկնարկեց՝ հայտարարելով, որ նախագահը կոպտորեն խախտել է Սահմանադրությունը, երբ մի քանի անգամ այցելել է օտար երկրներ՝ առանց երկրի կառավարության թույլտվության։
Խոսքը երեք աշխատանքային այցերի մասին է՝ 2023 թվականի օգոստոսի 31-ին հանդիպում է եղել Գերմանիայի նախագահի, սեպտեմբերի 1-ին Եվրոպական խորհրդի նախագահի և սեպտեմբերի 6-ին Ֆրանսիայի նախագահի հետ։
Զուրաբիշվիլիի խոսքով՝ նա իր միջոցների հաշվին է ուղևորություններ կատարել՝ լոբբինգ իրականացնելով արտասահմանում՝ Վրաստանին ԵՄ անդամակցության թեկնածուի կարգավիճակ տրամադրելու վերաբերյալ։
Համատեքստ
Հոկտեմբերին Վրաստանին սպասվում է կարևոր որոշում՝ երկրին ԵՄ անդամակցության թեկնածուի կարգավիճակ տրամադրելու վերաբերյալ։ Քաղաքական մեկնաբանների կարծիքով՝ եվրոպամետ նախագահի դեմ իմպիչմենտի գործընթացի մեկնարկը ահազանգի ազդանշան կլինի Վրաստանի եվրոպացի գործընկերների համար:
Կանխատեսում
Նախագահին իմպիչմենտի ենթարկելու համար անհրաժեշտ է խորհրդարանի 100 պատգամավորի ձայն։ «Վրացական երազանք»-ն այդքան ձայն չունի։ Ընդդիմությունը չի բացառում, որ «Վրացական երազանքին» կհաջողվի հավաքագրել որոշ ներկայացուցիչների և հավաքել իմպիչմենտի համար անհրաժեշտ թվով ձայներ։ Ընդդիմադիր կուսակցությունների ներկայացուցիչները համատեղ հայտարարություններ են անում, և ոչ ոք կոնկրետ չի նշում, թե իշխող «Վրացական երազանք» կուսակցությունը ում կարող է իր կողմը գրավել։
Զուրաբիշվիլին խախտել է Սահմանադրությունը