Եվս մեկ ադրբեջանցի ընդդիմադիր գործիչ է ազատազրկման դատապարտվել

Ժողովրդական ճակատ ընդդիմադիր կուսակցության ակտիվիստ Օրխան Բախըշլըն 6 տարվա ազատազրկման է դատապարտվել: Նրան մեղադրում են թմրանյութերի ապօրինի շրջանառության համար, իսկ նա ինքը դա քաղաքական հետապնդում է համարում: Նույնպիսի կարծիքի է նաև ադրբեջանցի իրավապաշտպանների աշխատանքային խումբը, որը Բախըշլըին ներառել է քաղբանտարկյալների ցուցակում, որը հրապարակվել է սեպտեմբերի 1-ին:

Օրհան Բախըշլըին կալանավորել են մայիսի սկզբին: Մեղադրող կողմը պնդում է, որ նրա մոտ 6 գրամ հերոին է հայտնաբերվել: Երբ բանը հասավ դատարան, ակտիվիստը հրաժարվեց ցուցմունք տալ որպես բողոքի նշան այն բանի, որ իր կողմնակիցներին թույլ չեն տվել դահլիճում ներկա գտնվել:

Ինչպես հաղորդում է Contact կայքը, կալանքից մի քանի օր առաջ Օրհան Բախըշլըն երկրի իշխանություններին մեղադրել էր հայտնի լրագրող Էլմար Հուսեյնովի սպանության համար, որը տեղի է ունեցել 2005թ-ին և մինչև հիմա բացահայտված չէ: Ըստ գործընկերների՝ Բախըշլըին հենց դրա համար էլ կալանավորել են:

Թմրանյութերի պահպանման մեղադրանքով Ադրբեջանում նստած են նաև Բայրամ Մամեդովը, Գիաս Իբրահիմովն ու մի քանի այլ ակտիվիստներ: