Դիվանագետները բանակցություններ են վարում Կոնգոյում գերի ընկած վրացի օդաչուի ազատ արձակման համար
Վրացի դիվանագետները բանակցություններ են վարում Կոնգոյի Դեմոկրատական Հանրապետության ապստամբներին գերի ընկած Վրաստանի քաղաքացուն ազատելու համար։ Զինվորական օդաչու, նախկին վրացական զինվորական Սոսո Օսուրաուլին գերեվարվել է այն բանից հետո, երբ ապստամբները խոցել են կառավարական ուժերի ուղղաթիռը: Մեկ այլ վրացի օդաչու վիրավոր է, սակայն կարողացել է խուսափել գերի ընկնելուց:
«Մենք դիվանագիտական խողովակներով կապի մեջ ենք Կոնգոյի Դեմոկրատական Հանրապետության ներկայացուցիչների հետ: Մենք տեղեկատվություն ունենք, որ զինված խմբավորմանը գերի ընկած Վրաստանի քաղաքացին առողջ է: Վրաստանի մեկ այլ քաղաքացի վիրավոր է և բուժվում է Գոմա քաղաքում», — «Ռուսթավի-2» հեռուստաընկերությանը հեռախոսով հայտնել է Հարավային Աֆրիկայում Վրաստանի դեսպան Բեքա Դվալին:
Ավելի վաղ Վրաստանի ԱԳՆ-ն հայտարարել է, որ Կոնգոյում Վրաստանի քաղաքացու գերեվարման մասին լուրը հաստատել են այդ երկրի իշխանությունները:
Ինչպես մեկնաբանել է Վրաստանի պաշտպանության նախարարությունը, Կոնգոյում գտնվող Վրաստանի քաղաքացիները զինված ուժերի շարքերում չեն: Օսուրաուլին բանակը լքել է 2014թ-ին: Նախկին զինվորականները Կոնգո են մեկնել որպես մասնավոր անձ:
Վրացի զինվորական օդաչուները ստիպված էին արտասահմանում աշխատանք փնտրել այն բանից հետո, երբ Վրաստանը որոշում ընդունեց դուրս գրել վրացական բանակի զինանոցում գտնվող Մի-24 մարտական ուղղաթիռները: