Բելառուսն Ադրբեջանին է հանձնել բլոգեր Լապշինին, որը մեղադրվում է Ղարաբաղ ապօրինի այցելելու մեջ

Բլոգեր Ալեքսանդր Լապշինը Մինսկից  Բաքու է տեղափոխվել հատուկ չվերթով: Ավելի վաղ, Բելառուսի Գերագույն դատարանը մերժել էր իրեն Ադրբեջանին հանձնելու մասին որոշման վերաբերյալ Լապշինի բողոքը:

2016թ-ի դեկտեմբերի 16-ին հայտնի ռուս բլոգեր Ալեքսանդր Լապշինը ձերբակալվել է Բելառուսում Ադրբեջանի պահանջով: Բաքվի վարկածի համաձայն՝ Լապշինն առանց ադրբեջանական կողմի պաշտոնական թույլտվության 2011թ-ի ապրիլին և 2012թ-ի հոկտեմբերին ապօրինի կերպով Ղարաբաղ է այցելել՝ խախտելով Ադրբեջանի հանրապետության պետական սահմանի մասին և Անձնագրերի մասին օրենքները: Իր բլոգում 2016թ-ի ապրիլի 6-ին և հունիսի 29-ին Լապշինը կոչ է արել ճանաչել Լեռնային Ղարաբաղի Հանրապետության անկախությունը:

Բելառուսի գլխավոր դատախազությունը որոշում է կայացրել Լապշինին Ադրբեջանին հանձնել քրեական հետաքննության համար: Մինսկի քաղաքային դատարանը ուժի մեջ է թողել Լապշինին հանձնելու գլխավոր դատախազության որոշումը: Գերագույն դատարանը փետրվարի 7-ի իր որոշմամբ ուժի մեջ է թողել սկզբնական ատյանի որոշումը: Նույն երեկո Լապշինն արտահանձնվել է Բաքվին:

Ավելի վաղ ՌԴ ԱԳՆ ղեկավար Սերգեյ Լավրովը հայտարարել էր, որ Մոսկվան դեմ է Լապշինին Ադրբեջանի իշխանություններին հանձնելուն: «Մենք դեմ ենք այս կամ այն երկրում ձերբակալված ՌԴ քաղաքացուն երրորդ երկիր արտահանձնելուն», — ասել է Լավրովը:

Ադրբեջանի գլխավոր դատախազության ծանր հանցագործությունների գործերով քննչական վարչությունը քրեական գործ է հարուցել Ադրբեջանի ՔՕ երկու հոդվածներով: Այդ հոդվածները որպես պատիժ 5-8 տարվա ազատազրկում են նախատեսում:

«Մենք պետք է նրան Ադրբեջանին փոխանցենք, մենք ոչ մի հիմք չունենք դա չանելու», — հայտարարել է Բելառուսի նախագահ Ալեքսանդր Լուկաշենկոն փետրվարի 3-ին կայացած մամուլի ասուլիսում:

Լապշինը Ռուսաստանի, Ուկրաինայի և Իսրայելի քաղաքացի է, և Livejournal-ում հայտնի բլոգ է վարում, որտեղ էլ հրապարակել է ռեպորտաժը Լեռնային Ղարաբաղից: