Ադրբեջանը հրթիռային հարված է հասցրել Ղարաբաղին
լուսանկարը՝ Լուսի Սարգսյանի, JAMnews
Մայիսի 15-ի երեկոյան ղարաբաղյան հակամարտության հայկական և ադրբեջանական զորքերի շփման գծում լուրջ միջադեպ է տեղի ունեցել: Ադրբեջանական բանակը կառավարվող հրթիռի հարվածող պայթեցրել է հայկական կողմին պատկանող «Օսա» զենիթահրթիռային համալիրը:
«Հայաստանի հակաօդային պաշտպանության զորքերի «Օսա» զենիթահռթիռային համալիրը զինծառայողների կողմից նոր դիրքեր է դուրս բերվել, որտեղ փորձ է արվել վերահսկողության տակ առնել օդային տարածքը:
Ադրբեջանի թռչող սարքերի սպառնալիքի կանխարգելման և հակառակորդի ակտիվության ճնշման նպատակով «Օսա» զենիթահրթիռային համալիրն ու լիցքավորող տրանսպորտային մեքենան ամբողջությամբ շարքից հանվել են կրակի միջոցով, անձնական կազմը ոչնչացվել է», — ասված է Ադրբեջանի պաշտպանության նախարարության մամուլի ծառայության հաղորդագրությունում:
Հայկական կողմը հաստատել է հրթիռային հարվածի փաստը, սակայն հերքել է մարդկային կորուստների մասին տեղեկատվությունը:
«Մայիսի 15-ին՝ ժամը 16:30-ի սահմաններում, արցախա—ադրբեջանական սահմանի արևելյան ուղղությամբ հակառակորդը դիմել է հերթական սադրանքի՝ կառավարվող հրթիռից կրակ վարելով պաշտպանության բանակի ռազմական օբյեկտի ուղղությամբ, ինչի արդյունքում մասնակի վնասվել է մեկ ռազմական տեխնիկա: Ադրբեջանական զինուժի սադրանքից ՊԲ—ն մարդկային կորուստ չի ունեցել», — հաղորդում է Լեռնային Ղարաբաղի պաշտպանության բանակի պաշտոնական կայքը:
Այս տեսանյութը տեղադրված է Ադրբեջանի պաշտպանության նախարարության կայքում: Սակայն Հայաստանի պաշտպանության բանակի մամուլի քարտուղար Արծրուն Հովհաննիսյանն իր ֆեյսբուքյան էջում գրել է, որ այդ տեսանյութի միայն մի մասն է իրականությանը համապատասխանում:
«Օսա» զենիթահրթիռային համալիրը, որի անձնակազմը բաղկացած է 5 զինծառայողից, ունակ է բացահայտելու և հետևելու թիրախին 45լմ շառավղով, ինչպես նաև՝ այն ոչնչացնելու 9կմ հեռավորության վրա», — ասված է Ադրբեջանի պաշտպանության նախարարության հաղորդագրությունում:
Լեռնային Ղարաբաղի պաշտպանության բանակը միջադեպի համար պատասխանատվությունը դրել է ադրբեջանական կողմի վրա:
«Ադրբեջանական զինուժի սադրանքն անպատասխան չի մնալու, իսկ հետևանքների ողջ պատասխանատվությունը կրելու է Ադրբեջանի ռազմաքաղաքական ղեկավարությունը», — ասված է ԼՂ ՊԲ հայտարարությունում:
Հայաստանի լրատվամիջոցները մայիսի 16-ի առավոտյան հաղորդում են, որ մայիսի 15-ին և լույս 16-ի գիշերը արցախա-ադրբեջանական հակամարտ զորքերի շփման գծում հակառակորդը տարբեր տրամաչափի հրաձգային զինատեսակներից հրադադարի պահպանման ռեժիմը խախտել է մոտ 55 անգամ՝ հայ դիրքապահների ուղղությամբ արձակելով ավելի քան 1200 կրակոց:
Հաղորդվում է նաև, որ բացի հրաձգային զինատեսակներից ադրբեջանական զինուժը շփման գծի տարբեր հատվածներում կիրառել է նաև 60 միլիմետրանոց ականանետ (3 արկ) և հաստոցավոր հակատանկային նռնականետ (9 արկ), իսկ ՊԲ արևելյան ուղղությամբ հակառակորդը կիրառել է «ՍՊԱՅԿ» տիպի կառավարվող հրթիռ:
«Հայաստանի զինված ուժերի ստորաբաժանումներն, օգտագործելով 60մմ-անոց ականանետներ (12 ական), օրվա ընթացքում խախտել են հրադադարի ռեժիմը ռազմաճակատի տարբեր ուղղություններով 122 անգամ» — ասված է Ադրբեջանի պաշտպանության նախարարության հաղորդագրությունում:
