Աբխազիայում կրկին զինված հարձակում է տեղի ունեցել, այս անգամ՝ ռուսաստանցի վերաբնակիչների վրա

«Կավկազսկի ուզել».

Հուլիսի լույս 31-ի գիշերն Աբխազիայի Գուդաութիի շրջանում զինված հարձակում է տեղի ունեցել այնտեղ տեղափոխված ռուսաստանցիների ընտանիքի վրա, 3 տուժածներից մեկը հոսպիտալացվել է գլխուղեղի ցնցումով և այրվածքներով:

Ամուսիններ Անատոլի Իվանովն ու Վալենտինա Բիկովեցը մայիսին Սանկտ Պետերբուրգից տեղափոխվել են Խիպստա ավան մշտական բնակության: Այդ օրվանից նրանց տուն են փորձել մտնել երեք անգամ, սակայն ամեն անգամ անարդյունք, պատմել են նրանք: Տուժածների խոսքով՝ նրանց վրա զինված հարձակումը տեղի է ունեցել հուլիսի 31-ին գիշերը 02.00-03.00-ի սահմաններում:

«Ես շան հաչոց լսեցի և դուրս եկա բակ տեսնելու, թե ով է եկել: Շուռ եկա և իմ առջև սև դիմակով մի մարդ տեսա: Նա բռնեց մազերիցս, գետնին գցեց, ծունկը դրեց վրաս: Ես գոռում էի, իսկ նա սկսեց սպառնալ, որ հիմա ինձ կսպանի», — «Կավկազսկի ուզելի» թղթակցին պատմել է Վալենտինա Բիկովեցը:

Նրա խոսքով՝ հետո հանցագործներից մեկը նրան տուն է մտցրել, որտեղ գտնվում էին նրա ամուսինն ու զարմիկ Վադիմ Լուգինը, որը հյուր էր եկել:

«Գլխիս խփել են ինքնաձիգի կոթով, մարմնիս մասերն այրել արդուկով, ատրճանակ են պարզել վրաս: Ես ասացի. «Տարեք ամեն ինչ»: Ինձ հարվածեցին, ես կորցրի գիտակցությոնս, հետո ուշքի եկա, նրանք ինձ քարշ տվեցին ուրիշ սենյակ: Տանջում էին երկար, մոտ քառասուն րոպե», — պատմել է տուժածը:

«Նրանք ինձ երկար կտտանքների էին ենթարկում, գլխիս պարկ էին հագցրել: Ես նրանց ասացի, որ տունը վարկով ենք վերցրել: Սակայն նրանք չէին հանգստանում», — ասում է Վալենտինա Բիկովեցի ամուսինը՝ Անատոլի Իվանովը: 

Ինչպես պատմեցին տուժածները, հարձակվողները երեքն էին՝ երկուսն ինքնաձիգներով, մեկն ատրճանակով: Հարձակվածներից մեկը վերցրեց փողերով պայուսակը, սակայն ասաց, որ դա քիչ է, և շարունակում էր խնայողությունները պահանջել: Տուժածները նշել են, որ հանցագործներից մեկն իր գործընկերոջը Թիմուր է անվանել:

Հանցագործները տարել են Renault մակնիշի մեքենան՝ նախապես պատռելով նստատեղերը փող հայտնաբերելու մտադրությամբ, և հեռացել: Ավելի ուշ առևանգված մեքենան հայտնաբերվել է:

Վալենտինա Բիկովեցը, որը բոլորից շատ է տուժել, այժմ գտնվում է Գուդաութիի հիվանդանոցում: Բուժող բժիշկ Ինալ Աբաշիձեի խոսքով՝ կնոջ վիճակը գնահատվում է որպես միջին ծանրության, կայուն:

«Փակ գանգուղեղային վնասվածք կա, գլխուղեղի ցնցում, գլխի, ողնաշարի  բազմաթիվ վերքեր, վերին և ստորին վերջույթների այրվածքներ, ողնաշարի գոտկային հատվածի վնասվածք», — պատմել է նա «Կավկազսկի ուզելի» թղթակցին:

Ավելի վաղ JAMnews-ը գրել էր, որ հուլիսի 11-ին Աբխազիայի Գուդաութիի շրջանում զինված հարձակում է տեղի ունեցել ռուս զբոսաշրջիկների վրա, նրանցից մեկը սպանվել է: Հանցագործության երկու կասկածյալները ձերբակալվել են, խոստովանել իրենց մեղքը, նրանց քրեական օրենսգրքի 3 հոդվածով մեղադրանքներ են առաջադրվել, հաղորդում է Աբխազիայի գլխավոր դատախազությունը:

Լրատվամիջոցներում տեղ գտած արձագանքը վնասել է Աբխազիայի զբոսաշրջային իմիջին, իսկ ոլորտը, որն ապահովում էր բյուջեի եկամտի 10%-ը, դա միանգամից է զգացել: Զբոսաշրջային գործակալություններում JAMnews-ին պատմել են, որ ուղեգրեր գնած մարդիկ դրանք վերադարձնում են:

Ռուսաստանի դեսպանատւնը խորհուրդ էր տվել ռուս զբոսաշրջիկներին զգոնություն ցուցաբերել հանրապետությունում քրեածին իրավիճակի վատթարացման կապակցությամբ:

JAMnews-ի նյութերում օգտագործվող եզրերն ու տեղանունները, մտքերն ու գաղափարները միշտ չէ, որ համընկնում են JAMnews-ի և նրա առանձին աշխատակիցների դիրքորշման և դատողությունների հետ: JAMnews-ն իրեն իրավունք է վերապահում ջնջել հրապարակումների այն մեկնաբանությունները, որոնք կգնահատվեն որպես վիրավորանք, սպառնալիք և բռնության կոչեր կպարունակեն կամ էթիկապես անընդունելի կլինեն այլ պատճառներով: