სკანდალური ბრალდება - არასამთავრობოები აცხადებენ, რომ სახელისუფლებო კანდიდატის მხარდასაჭერად ყალბი პირადობის მოწმობები იბეჭდებოდა" />

არასამთავრობო ორგანიზაციები: შესაძლოა, არჩევნების მეორე ტურის ლეგიტიმურობა ეჭვქვეშ დადგეს

სკანდალური ბრალდება - არასამთავრობოები აცხადებენ, რომ სახელისუფლებო კანდიდატის მხარდასაჭერად ყალბი პირადობის მოწმობები იბეჭდებოდა

სახელისუფლებო კანდიდატის, სალომე ზურაბიშვილის სასარგებლოდ, შესაძლოა, ყალბი პირადობის მოწმობების დაბეჭდვა ხდებოდეს, რაც საფრთხეს უქმნის საპრეზიდენტო არჩევნების მეორე ტურის ლეგიტიმურობას – ასეთი სკანდალური განცხადება გააკეთა დღეს სამმა გავლენიანმა არასამთავრობო ორგანიზაციამ ერთობლივ პრესკონფერენციაზე.

პრესკონფერენციაზე აღინიშნა, რომ ამ პროცესს, სავარაუდოდ, პირადად ხელმძღვანელობს სახელმწიფო სერვისების განვითარების სააგენტოს თავმჯდომარე.

არასამთავრობო ორგანიზაციები სამართალდამცავებს მიმართავენ და არჩევნების სავარაუდო გაყალბების ფაქტით დაინტერესებისკენ მოუწოდებენ.

ბრალდებას უკვე გამოეხმაურა სააგენტოს თავმჯდომარე სოსო გიორგაძე, რომელსაც არასამთავრობო ორგანიზაციების განცხადებას “გაუგონარი სიცრუე” უწოდა.

რა ინფორმაცია აქვთ არასამთავრობოებს

ამ ინფორმაციის გავრცელებისას არასამთავრობო ორგანიზაციები სახელმწიფო სერვისების განვითარების სააგენტოს თანამშრომლის ნაამბობს ეყრდნობიან.

როგორც  „საქართველოს ახალგაზრდა იურისტთა ასოციაციის“, „საერთაშორისო გამჭირვალობა – საქართველოს“ და „სამართლიანმა არჩევნების“ წარმომადგენლებმა  პრესკონფერენციაზე თქვეს, ეს თანამშრომელი მათ გასულ კვირას დაუკავშირდა და აცნობა, რომ სააგენტოში მეორე ტურის სალომე ზურაბიშვილის სასარგებლოდ გასაყალბებლად ყალბი პირადობის მოწმობები მზადდებოდა.

წყაროს ინფორმაციით, ამ პროცესს პირადად ხელმძღვანელობენ სახელმწიფო სერვისების განვითარების სააგენტოს მაღალჩინოსნები – თავმჯდომარე სოსო გიორგაძე და  შიდა აუდიტის სამსახურის უფროსი ბეჟან ობგაიძე.

როგორც წყარო განმარტავს, სქემა ასეთია: ერთ ადამიანზე ბეჭდავენ პირადობის ხუთ მოწმობას –  სხვადასხვა სახელით, გვარით და პირადი ნომრით. საერთო ამ ხუთ მოწმობას აქვს მხოლოდ ფოტო.

გეგმის თანახმად, ამ პირის მონაცემები შეყვანილი იქნება რამდენიმე საარჩევნო უბნის სიაში და შესაბამისად, მას შესაძლებლობა ექნება რამდენიმე უბანზე მისცეს ხმა.

წყარო ვერ აკონკრეტებს, თუ რა მასშტაბისაა გეგმა, ანუ სულ რამდენი ყალბი მოწმობა დაიბეჭდა. თუმცა, წყარომ განმარტა, რომ ყალბი პირადობის მოწმობების ბეჭდვით სააგენტოს რამდენიმე ტერიტორიული სამსახურია დაკავებული.

მისი თქმით, ზოგიერთ რეგიონში (მაგალითად, წალენჯიხასა და გარდაბანში) ტერიტორიული სამსახურის ხელმძღვანელები “არასანდო” პირებად მიიჩნიეს, მივლინებაში გაუშვეს, მათ ადგილას კი „სანდო” ადამიანები  მიავლინეს.

არასამთავრობო ორგანიზაციებმა გადაამოწმეს და ორივე სამსახურის ხელმძღვანელი მართლაც მივლინებაში აღმოჩნდა.

თუმცა, არასამთავრობო ორგანიზაციების წარმომადგენლებმა პრესკონფერენციაზე აღნიშნეს, რომ მათთვის უცნობია საქმის სხვა დეტალები, ასევე უცნობია, თუ რა მასშტაბის გაყალბებაზეა საუბარი.

ამ საქმით დაინტერესებას ისინი პროკურატურას ურჩევენ, რადგან საქართველოს კანონმდებლობით, “ყალბი დოკუმენტების დამზადება და არჩევნების გაყალბება სისხლის სამართლის დანაშაულია”.

“ასეთმა ქმედებებმა შესაძლოა გამოუსწორებელი ზიანი მიაყენოს საარჩევნო გარემოს და კითხვის ნიშნის ქვეშ დააყენოს არჩევნების ლეგიტიმურობა. აუცილებელია, რომ შესაბამისი საგამოძიებო უწყებები დაინტერესდნენ პირადობის მოწმობების სავარაუდო გაყალბების ფაქტით. შესაბამისად, მოვუწოდებთ საქართველოს პროკურატურას, სასწრაფოდ დაიწყოს გამოძიება და მიიღოს კანონით გათვალისწინებული შესაბამისი ზომები“, – აღინიშნა ბრიფინგზე.

რა პასუხი აქვს ხელისუფლებას

ბრალდებებს უკვე გამოეხმაურა სახელმწიფო სერვისების განვითარების სააგენტოს თავმჯდომარე სოსო გიორგაძე.

მისი თქმით, არასამთავრობო ორგანიზაციებმა გაავრცელეს ჭორია, რომლის მიხედვით, ის და მისი თანამშრომლები სისხლის სამართლის დამნაშავეებად გამოაცხადეს.

„ეს გაუგონარი ბრალდება ეფუძნებოდა მათ მიერ გამოგონილ აბსურდულ წინადადებებს და არგუმენტებს. ეს არათუ გაუგონარია, არამედ თეორიულადაც კია წარმოუდგენელია.მე მივმართე შესაბამის უწყებებს, რომ დაიწყონ მოკვლევა და იმედი მაქვს, ეს ორგანიზაციები წარმოადგენენ კონკრეტულ ფაქტებს, რომლებზე დაყრდნობითაც ასეთი ჭორი გაავრცელეს,” – აღნიშნა გიორგაძემ.

მისი თქმით, სხვა თუ არაფერი, წალენჯიხასა და გარდაბანში ბიომეტრიული პირადობის მოწმობები ვერ დაიბეჭდებოდა, რადგან ამ მოწმობების საბეჭდი ცენტრი საქართველოს მხოლოდ სამ ქალაქში – თბილისში, ქუთაისსა და ბათუმში არსებობს.


ასევე წაიკითხეთ