ოპოზიცია ხელისუფლებას დარღვევებში ადანაშაულებს, უცხოელი დიპლომატები ხელისუფლებას საარჩევნო გარემოს სასწრაფოდ გაუმჯობესებისკენ მოუწოდებენ " />

საქართველოში ბოლო საპრეზიდენტო არჩევნები კონფერენციაზე შეაფასეს. აზრები გაიყო

ოპოზიცია ხელისუფლებას დარღვევებში ადანაშაულებს, უცხოელი დიპლომატები ხელისუფლებას საარჩევნო გარემოს სასწრაფოდ გაუმჯობესებისკენ მოუწოდებენ

საქართველოს საპრეზიდენტო არჩევნები,  რომელიც 2018 წლის ოქტომბერ- ნოემბერში ჩატარდა, თბილისში გამართულ კონფერენციაზე განიხილეს. საკუთარი შეფსაებები ევროპის საბჭოს ოფისის ხელმძღვანელმა, არასამთავრობო ორგანიზაციებმა, ხელისუფლებამ, ოპოზიციამ და ცენტრალურმა საარჩევნო კომისიამ გააკეთეს.

2018 წლის საპრეზიდენტო არჩევნებში საქართველოს პრეზიდენტად დამოუკიდებელი კანდიდატი სალომე ზურაბიშვილი აირჩიეს, რომელსაც მხარს მმართველი პარტია უჭერდა. ის ქვეყნის პრეზიდენტი 6 წლის ვადით იქნება.

• გია ნოდიას თვალსაზრისი: რა გავიგეთ ამ არჩევნებით?

• საერთაშორისო დამკვირვებლები: არჩევნები კონკურენტული იყო, თუმცა სამართლიანი არ ყოფილა

• ვინ არის სალომე ზურაბიშვილი, საქართველოს ახალი პრეზიდენტი?

ევროკავშირი და ევროპის საბჭო

საქართველოში ევროკავშირის წარმომადგენლობის ხელმძღვანელი, კარლ ჰარცელი, საქართველოს ხელისუფლებას ურჩევს, გამოიყენოს საპარლამენტო არჩევნებამდე დარჩენილი დრო და გააუმჯობესოს საარჩევნო გარემო.

კარლ ჰარცელის განცხადებით, ამ პროცესს პარლამენტი უნდა გაუძღვეს და მასში ყველა მხარე უნდა ჩაერთოს. მისი აზრით, უკიდურესად მნიშვნელოვანია, არსებული პრობლემების გადაწყვეტაში ხელისუფლება ოპოზიცია, მედია და სამოქალაქო საზოგადოებაც ჩაერთოს.

,,დრო ცოტა გვაქვს და მუშაობა დაუყოვნებლივ უნდა დაიწყოს. მას დიდი სიფრთხილით უნდა მოვეკიდოთ რადგან ამას დიდი მნიშვნელობა აქვს საქართველოსა და ევროკავშირის ურთიერთობისთვის,”- განაცხადა კარლ ჰარცელმა.

ევროპის საბჭოს ოფისის ხელმძღვანელი, კრისტიან ურსე, პრობლემას პოლიტიკური პარტიების წარმომადგენლების დისბალანსში, ნეგატიურ კამპანიასა და მედიის მარეგულირებლის როლში ხედავს.

კრისტიან ურსე მოუწოდებს ოპოზიციისა და ხელისუფლებას პრობლემების აღმოსაფხვრელად გამოიყენონ 2020 წლის საპარლამენტო არჩევნებამდე დარჩენილი დრო და მიუსხდნენ მოლაპარაკების მაგიდას.

აშშ

საქართველოში აშშ-ს ელჩის მოვალეობის შემსრულებლის როს უილსონის თქმით, საარჩევნო პროცესშიგამოჩნდა  ბევრი ისეთი პრობლემა და საკითხი, რომელიც ქვეყნის წარმატებისთვის ფუნდამენტური მნიშვნელობისაა.

მისი თქმით, ბოლო ათწლეულებშის საქართველომ დემოკრატიის განვითარების კუთხით დიდ პროგრესს მიაღწია, თუმცა საარჩევნო პროცესში არსებული დარღვევების აღმოფხვრა გადამწყვეტია დემოკრატიული კულტურის გაძლიერებისთვის.

ხელისუფლება

საქართველოს ხელისუფლება 2018 წლის საპრეზიდენტო არჩევნებს სამართლიანსა და გამჭვირვალეს უწოდებს. იუსტიციის მინისტრის, თეა წულუკიანის თქმით, არასამთავრობო ორგანიზაციები არ იყვნენ ნეიტრალურები და ვერ მოახერხეს ქალი საპრეზიდენტო კანდიდატი გენდერული ნიშნით თავდასმებისგან დაეცვათ.

იუსტიციის მინისტრის თქმით, ბევრს არ მოსწონდა ხელისუფლების მიერ მხარდაჭერილი კანდიდატი სალომე ზურაბიშვილი, ამიტომაც მის მიმართ “ბოროტი კამპანიები ააგორეს და ძალადობისგან არ დაიცვეს”.

რაც შეეხება ხმების დათვლასა და სამართლიანობას, მიუხედავად მცირე დარღვევებისა, მან არჩევნები სამართლიანად და მშვიდ გარემოში ჩატარებულად შეაფასა.

ოპოზიცია

ოპოზიციის წარმომადგენლები აცხადებენ, რომ 2018 წლის საპრეზიდენტო არჩევნები დარღვევებით და არასამართლიან გარემოში ჩატარდა.

,,შენების მოძრაობის“ ლიდერი დავით უსუფაშვილი ამბობს, რომ 2018 წლის არჩევნებზე გამოჩნდა 1990-იანი წლებიდან მოყოლებული ყველა მავნე პრაქტიკა.

,,ახალი მემარჯვენეების” ერთ-ერთი ლიდერი მამუკა კაციტაძე კი აცხადებს, რომ გასული წლის საპრეზიდენტო არჩევნები უკიდურესად არათანაბარ საარჩევნო გარემოში ჩატარდა და გამოყენებული იყო დიდი ადმინისტრაციული რესურსი.

ცენტრალური საარჩევნო კომისია 

ცენტრალურ საარცევნო კომისიაში არჩევნების გაყალბებასთან დაკავშირებით ბრალდებებს უარყოფენ. ცესკოს თავმჯდომარის, თამარ ჟვანიას თქმით, ცესკოს მუშაობის მიმართ ბევრი მადისკრედიტირებელი განცხადება ვრცელდებოდა, თუმცა საბოლოოდ, სადამკვირვებლო მისიების შეფასებებმა დაადასტურა, რომ 2018 წლის საპრეზიდენტო არჩევნები ცესკომ პროფესიონალურად ჩაატარა.

,,ჩვენ დავადასტურეთ, რომ ხმები სწორედ დავთვალეთ, ეს დადასტურებულია როგორც საერთაშორისო სადამკვირვებლო ორგანიზაციების ანგარიშებით,“- განაცხადა თამარ ჟვანიამ.


ასევე წაიკითხეთ