ეშინია თუ არა ევროპას რუსული პროპაგანდის?
სტრასბურგში, ევროპარლამენტის სესიაზე სიტყვით გამოსვლისას, ევროკავშირის კომისარმა ჯულიან კინგმა (რომელიც ამ ორგანიზაციაში უსაფრთხოების სფეროს კურირებს) განაცხადა, რომ დასავლეთის წინააღმდეგ დეზინფორმაციის კამპანიის წარმოებისას რუსეთის ხელისუფლება უკან არაფერზე იხევს. დღეს ინფორმაცია სამხედრო იარაღის ტოლ-ფასია, განაცხადა მან.
ბრიუსელი, რომელიც ამჟამად ნამდვილად არ იმყოფება საუკეთესო ფორმაში, მოვლენების ასეთი განვითარებისთვის ნამდვილად არ იყო მზად. ევროკავშირი აბსოლუტურად დარწმუნებული იყო თავისი მთავარი იარაღის – „რბილი ძალის“ ეფექტურობაში. როგორც კი ეკონომიკური კრიზისის გამო დასავლეთიდან მატერიალური რესურსების მიწოდება შეფერხდა, სოციალისტური ბანაკის ყოფილი ქვეყნების რწმენა დასავლური ღირებულებების მიმართ შეირყა. ამას დაემატა მიგრაციული კრიზისიც, რომელმაც კიდევ უფრო მეტად იმოქმედა საზოგადოებრივ განწყობებზე, ვიდრე ეკონომიკურმა პრობლემებმა.
ესპანელმა ქრისტიან-დემოკრატმა, ესტებან გონსალეს პონსმა ევროპარლამენტის სესიაზე სიტყვით გამოსვლისას განაცხადა, რომ კრემლი გაცილებით მეტ ფულს ხარჯავს პროპაგანდისთვის, ვიდრე ბრიუსელი. ამ მიზნით მოსკოვი წელიწადში მილიარდ ევროს ხარჯავს – მაშინ, როცა ევროკავშირის ბიუჯეტში ამ საქმისთვის მხოლოდ ერთი მილიონია გამოყოფილი. რუსეთს პროპაგანდისტების არმია ჰყავს, ევროპის კავშირის სტრატეგიული კომუნიკაციების ოპერატიულ სამუშაო ჯგუფში (East StratCom) კი 17 საშტატო თანამშრომელი ირიცხება. აღსანიშნავია, რომ ეს უწყება ორი წლის წინ შეიქმნა.
რუსულ პროპაგანდაზე რეაგირების შემოთავაზებული ვარიანტები არც ისე ბევრია – პირველ რიგში, აღინიშნა, რომ საჭიროა სტრატეგიული კომუნიკაციების ოპერატიული ჯგუფების გაძლიერება და გაფართოება; სიტყვის თავისუფლების დაპირისპირება მათთვის, ვინც „ევროკავშირის ფუნდამენტურ ღირებულებებს ესხმის თავს“. დეპუტატებმა ასევე პოლიტიკური პარტიებისა და მედიის დაფინანსების სრული გამჭვირვალობის აუცილებლობაზეც ისაუბრეს.
მოხსენებაში და დეპუტატების გამოსვლებში მკაფიოდ გაისმა წინადადება “ტროლებით” გაჯერებულ სოციალურ ქსელებთან კონკურენციაში მყოფი ხარისხიანი მედიისთვის მატერიალური მხარდასაჭერის აღმოჩენის შესახებ.
სესიაზე რუსეთს ტრადიციულად მხარდაჭერა გამოუცხადეს კომუნისტური მიმართულების დეპუტატებმა. ასევე ულტრამემარჯვენე ნაციონალისტებმა, პოპულისტებმა და ევროსკეპტიკოსებმა, რომლებიც ევროკავშირის მიმართ ზიზღის ნიშნად ევროპარლამენტის დარბაზში ხშირად ეროვნულ დროშებით მიდიან ხოლმე.
რუსეთის მხარდამჭერი განცხადებები გააკეთე დეპუტატებმა – საფრანგეთის ნაციონალური ფრონტის წევრმა, სტივ ბრიუამ და “ბრექსიტის” ყველაზე აქტიური მხარდამჭერის – გაერთიანებული სამეფოს დამოუკიდებელი პარტიის UKIP-ს წარმომადგენელმა ჯერარდ ბატენმა.
იტალიელი მემარცხენეეების ლიდერმა, ბარბარა სპინელიმ განაცხადა, რომ იგი რუსეთში არსებულ რეჟიმს არ იცავს, მაგრამ არ ეთანხმება მოსაზრებას, რომლის მიხედვითაც ევროკავშირის პოლიტიკურ ცხოვრებაში არსებული ყველა პრობლემა კრემლის ქმედებებითაა გამოწვეული. მისი თქმით, დასავლური ქვეყნების არჩევნებში რუსეთის ჩარევის შესახებ გაკეთებული განცხადებების დიდ ნაწილს არგუმენტები არ ახლავს და ეს ბრალდებები არ დასტურდება.
მართლაც, ევროპელი ამომრჩევლები ხმას აძლევენ „ბრექსიტის“, მარინ ლე პენსა და პარტიას „ალტერნატივა გერმანიისთვის“ არა იმიტომ, რომ დღე და ღამე Russia Today-ის უყურებენ. ამომრჩევლის ასეთ ქცევას სხვა მიზეზები აქვს. თუმცა, ფაქტია, რომ ბრიუსელმა გადაწყვიტა გააძლიეროს აქამდე არარსებული მექანიზმები, რომელთა დახმარებითაც კრემლის მიზანმიმართულ ტყუილებსა და ყალბ ინფორმაციას ამხელს.
