რუსეთის ახალი კონსტიტუცია: „მარადიული“ პუტინი, ღმერთი და რუსი ხალხის განსაკუთრებული როლი

რუსეთს ბოლო ნაბიჯის გადადგმაღა დარჩა ახალი კონსტიტუციისკენ – დაამტკიცოს იგი საყოველთაო კენჭისყრაზე 22 აპრილს.

ამის შემდეგ, ის გახდება პირველი ქვეყანა, რომლის მთავარ კანონშიც ნახსენებია ღმერთი, განსაკუთრებით ხაზგასმულია რუსი ხალხის როლი და უზრუნველყოფილია ვლადიმირ პუტინის დე ფაქტო სამუდამო მმართველობა.

როგორ აღმოჩნდნენ მარადიული პრეზიდენტი და ღმერთი კონსტიტუციაში? 

2020 წლის 16 მარტს, საკონსტიტუციო სასამართლომ დაამტკიცა საკონსტიტუციო ცვლილებები, რომელიც რუსეთის პრეზიდენტმა პუტინმა იანვარში წარმოადგინა.

ის შეიმუშავა სპეციალურმა ჯგუფმა, რომლის შემადგენლობასთან დაკავშირებითაც ბევრი კითხვა გაჩნდა რუსულ საზოგადოებაში, რადგან მასში შევიდნენ მომღერლები, სპორტსმენები და სხვა სფეროს წარმომადგენლები, რომლებიც შორს არიან იურისპრუდენციისგან.

ძირითადი ცვლილებები: 

სახელმწიფო დუმას ექნება პრემიერისა და მთავრობის მთელი შემადგენლობის დამტკიცების უფლება. 
რუსეთის კონსტიტუციას პრიორიტეტი ექნება საერთაშორისო სამართლის აქტებთან მიმართებით. 
ნახსენებია ღმერთი. 
განსაკუთრებით აღინიშნა რუსი ხალხის როლი. 
ქორწინების ცნება განმტკიცებულია, როგორც მამაკაცისა და ქალის კავშირი. 

და ყველაზე მთავარი: 

საპრეზიდენტო ვადების რაოდენობის შესახებ დებულებიდან ამოღებულია სიტყვა „ზედიზედ“, ასევე, თავიდან იწყება ამ ვადების ათვლა, ანუ ისინი „განულებულია“. ამრიგად, ეს ვლადიმირ პუტინს შესაძლებლობას მისცემს, როგორც მინიმუმ, 2036 წლამდე დარჩეს პრეზიდენტის თანამდებობაზე. 

ამ ცვლილებებმა შოკში ჩააგდო იურისტები რუსეთსა და მთელ მსოფლიოში. ის ძალაში საყოველთაო კენჭისყრის შემდეგ უნდა შევიდეს, რომლის ჩატარებაც დანიშნულია 22 აპრილს, თუმცა, კორონავირუსის პანდემიის გამო, თარიღი შესაძლოა გადაიწიოს.

რუსები რუსეთში მთავარი ხალხი გახდებიან?

ნავთობის ომი რუსეთსა და საუდის არაბეთს შორის. ვინ დაზარალდება მსოფლიოში?

„შეიყვარო კადიროვი“ – ჩეჩნეთის ლიდერს რუს ბლოგერებთან ერთად „იუმორისტულ“ ვიდეოებში იღებენ

საზოგადოების პროტესტი რუსეთში

  
რუსული კულტურის 120-მა ცნობილმა მოღვაწემ გააკეთა განცხადება წარმოდგენილ ცვლილებებთან დაკავშირებით. 

„იმას, რაც ხდება, ჩვენ მივიჩნევთ რუსეთის ფედერაციის კონსტიტუციური წყობის ღია ხელყოფად და ძალაუფლების უზურპაციის აქტად ერთი ადამიანის – რუსეთის მოქმედი პრეზიდენტის, ვლადიმირ პუტინის სასარგებლოდ“, – აღნიშნულია წერილში.

კიდევ ერთ ღია წერილში, რომელსაც ხელს აწერენ წამყვანი რუსი იურისტები და მეცნიერები (მათ შორის, ათობით აკადემიკოსი, მეცნიერებათა დოქტორი და პროფესორი), ნათქვამია: 
„მიგვაჩნია, რომ ჩვენს ქვეყანას ღრმა საკონსტიტუციო კრიზისი და არაკანონიერი, ანტიკონსტიტუციური გადატრიალება ემუქრება“.

ვლადიმირ პუტინთან არსებული ადამიანის უფლებათა საბჭოს ყოფილმა წევრმა, ეკატერინა შულმანმა დამცინავი კომენტარი გააკეთა საკონსტიტუციო სასამართლოს გადაწყვეტილებაზე:
„იშვიათია, როდესაც მონური სული და ინტელექტუალური სიმხდალე ასეთი მასშტაბით გამოიხატება წერილობით ტექსტში. და ეს ყველაფერი რომაული სამართლის ტერმინოლოგიის გამოყენებით, რომლის მნიშვნელობის შესახებაც არანაირი წარმოდგენა არ აქვთ ამ საკუთარი ჩრდილის მოშიშ ბარბაროსებს. არ მესმის, რა გათვლა ჰქონდათ ამ ადამიანებს. მათი პროფესიონალური რეპუტაცია საბოლოოდ განულებულია“.

მოსკოვში საკონსტიტუციო ცვლილებების წინააღმდეგ გამართული საპროტესტო აქციის მონაწილე. პლაკატზე წერია: „ის ჩვენი მეფე არ არის“. 16 მარტი, 2020. REUTERS / Shamil Zhumatov