Հայաստանի Ազգային գրադարանում բռնկված հրդեհը ոչնչացրել է սերվերները, որոնց վրա պահվում էին գրքերի թվային տարբերակները

Հայաստանի Ազգային գրադարանում հրդեհ է բռնկվել, այն վնասել է սերվերները, որոնց վրա պահվում էին հայերեն լեզվով գրքերի և պարբերականների թվային տարբերակները։

Արտակարգ դրության պայմաններում, որը Հայաստանում հայտարարվել է կորոնավիրուսի պատճառով, գրադարանի աշխատակիցներն աշխատում են առցանց՝ հեռավար ռեժիմով։ Քանի որ կայքն ինչ–որ պահի անհասանելի է դարձել, գրադարանի աշխատակիցները ոստիկանների հետ միասին, որոնք հսկում են շենքը, ստուգում են իրականացրել և հայտնաբերել այրված սերվերները։

•  Երեք դասարան մեկ սենյակում։ Երեխաներն ուրախ են, ուսուցիչները՝ շփոթված
• Տեսանյութ արհեստանոցից, որտեղ հին գորգերի նմուշներով գորգեր են գործում

Ազգային գրադարանի թվային բազան ստեղծվել է գրեթե 20 տարվա ընթացքում։ Այն ազատ ու անվճար ներբեռնման և օգտագործման իրավունքով հասանելի էր շատ հետազոտողների և պարզապես ընթերցողների ինչպես Հայաստանում, այնպես էլ արտասահմանում։

Հրդեհի պատճառը դեռևս չի պարզվել։ Հայտնի չէ նաև, թե արդյոք կարելի է վերականգնել այրված սերվերների վրա պահվող ինֆորմացիան։ Սակայն տնօրենի պաշտոնակատար Հրաչ Սարիբեկյանի խոսքով, գրադարանի մասնագետը դրանց արտաքին տեսքը հուսադրող է գնահատել․ 

«Լիարժեք գնահատական կարելի է տալ միայն դրանք ստուգելուց հետո, ինչը հնարավոր կլինի, երբ ԱԻՆ–ը քննի գործն ու դրա վերաբերյալ արձանագրություն տրամադրի»։ 

Սակայն, ըստ Սարիբեկյանի՝ ողջ թվայնացված և արխիվացված նյութը, որը սերվերների վրա է եղել, պահպանվում է նաև առանձին կրիչների վրա, այսինքն՝ այն ամեն դեպքում չի կորել։ Եվ գրադարանն արդեն աշխատում է այն ուղղությամբ, որ առցանց նյութերը կրկին հասանելի դարձնի ընթերցողների համար։