Cəmiyyət və ekspertlər narazılıq bildirir, hakimiyyət isə əmin edir ki, bu məsələ gündəmdə yoxdur, ola da bilməz " />

Rusiya yenidən Ermənistana rus dilinə rəsmi dil statusu verməyi təklif edir

Cəmiyyət və ekspertlər narazılıq bildirir, hakimiyyət isə əmin edir ki, bu məsələ gündəmdə yoxdur, ola da bilməz

Rusiya Dövlət Dumasının spikeri Vyaçeslav Volodin Ermənistan hakimiyyətinə qanunvericiliklə rus dilinə rəsmi dil statusu verməyi təklif edib. Volodin deyib ki, bu halda Ermənistanda verilən sürücülük vəsiqələri Rusiya ərazisində keçərli olacaq.

2017-ci il iyunun 1-də Rusiyada ölkə ərazisində xarici sürücülük cvəsiqəsi ilə sürücülük etməyi yasaqlayan qanun qüvvəyə minib. İyulun 14-də qəbul olunmuş qanunda isə Avrasiya İqtisadi İttifaqına daxil olan və rus dilinin rəsmi dil olduğu ölkələrin vətəndaşlarına Rusiyada öz milli sürücülük vəsiqələri ilə avtomobil idarə etməyə imkan verən müddəa mövcuddur. Bununla da Ermənistan vətəndaşları AAİİ üzvü olan ölkənin sakinləri olsalar da, Rusiyada öz vətənlərində aldıqları sürücülük vəsiqəsilə maşın sürə bilmirlər.

Vyaçeslav Volodinin bəyanatı ekspert çevrəsində və bütünlüklə ölkədə narazılıq doğurub.

Məsələn, politoloq Styopa Safaryan xatırladıb ki, hələ 2011-ci ildə Rusiya tərəfi açıq şəkildə və “əyri” metodlarla Ermənistanda rus dilini təşviq etməyə çalışıb.

Politoloq hesab edir ki, Ermənistanda rus məktəblərinin erməni məktəbləri ilə eyni statusda olması belə artıq Ermənistan hakimiyyətinin Rusiya siyasətinə qarşı olmadığını göstərir.

“Bu, erməni dilinə və Ermənistanın suverenliyinə açıq qəsddir, çünki Rusiyanın bizi bütün bunlara vadar etmək haqqı yoxdur. Faktiki olaraq bu gün Rusiyada işləyən bizim erməni miqrantlarımız Rusiya tərəfindən girov kimi nəzərdən keçirilir və onların problemindən rəsmi Yerevan və Ermənistan Respublikasına təzyiq vasitəsi kimi istifadə olunur”, – Safaryan bildirib.

İqtidarda olan Respublika Partiyası adından ERP-nın Ali Orqanının üzvü, deputat Armen Aşotyan bildirib ki, rus dilinin rəsmi statusu məsələsi Ermənistanın gündəmində deyil və heç gözlənilmir də.

Ermənistanda verilən sürücülük vəsiqələrinin Rusiyada istifadəsinə gəlincə, Armen Aşotyan bildirib ki, iki ölkə parlamentlərinin nümayəndələri müzakirələri davam etdirmək və parlament dinləmələri gedişatında əlverişli həll yolu tapmaq haqda razılığa gəliblər.

Bu məsələ ilə bağlı Ermənistandakı Facebook istifadəçiləri də öz fikirlərini paylaşıblar. Onlardan bəzilərini təqdim edirik:

“Sürücülük vəsiqələrinin tanınmasının rus dilinə rəsmi status verilməsi ilə heç bir əlaqəsi yoxdur. Bununla sürücülərin dil bilikləri artmayacaq. Sürücülük vəsiqələrinin tərcüməsi haqda düşünmək olar sadəcə… Yoxsa sabah rus dilinə rəsmi status vermək üçün başqa bir bəhanə tapacaqlar”.

“O nə cavabdır, Ermənistan hakimiyyəti verib? Belə cavab versələr daha doğru olardı: heç kim həyasızlıqla belə bir məsələni heç qaldırmamalıdır da…”

“Onlar necə həyasızlaşıblarsa, xalqımız üçün belə bir vacib və ağrılı məsələyə də toxuna bilirlər və bu, adamlara sürücü işləmək haqqı vermək üçündür”.

“Oo, bu, sonsuz sevgi ifadəsi olardı! Təşəkkür”.

“Qoy, Rusiyada işləmək istəyən vətəndaşlar rus dili imtahanı versinlər və əgər dil tələbinə uyğun gəlsələr, işləmək hüququ qazansınlar. Ermənistanda rus dilinə rəsmi status verilməsi isə yumşaq desək, heç bir məntiqə sığmır”.


More on JAMnews