Аzərbaycan polisi “Yehova Şahidləri” dini təşkilatı üzvlərinin mənzillərində axtarış aparıb

Dini Qurumlarla İş üzrə Dövlət Komitəsi hüquq-mühafizə orqanları ilə birlikdə Bakının Qaradağ rayonunun Lökbatan qəsəbəsindəki iki ünvanda axtarış aparıb.

Nəticədə Solmaz Məmməd qızı Orucova və Sevil Babali qızı Ağaliyevanın Lökbatandakı mənzillərində “Yeqova şahidləri” dini təşkilatının qanunsuz toplantıları aşkarlanıb. Bu barədə Dini Qurumlarla İş üzrə Dövlət Komitəsi-nin mətbuat xidmətinin məlumatında bildirilir.

Reyd zamanı hər iki ünvanda ümumilikdə 33 nəfər, o cümlədən 10 azyaşlı uşaq olub, sektanı təbliğ edən çoxsaylı ədəbiyyat aşkarlanıb və müvafiq qaydada müsadirə edilib, – məlumatda bildirilir.

Faktla bağlı müvafiq araşdırmalar və istintaq tədbirləri davam etdirilir.

Dini Qurumlarla İş üzrə Dövlət Komitəsinin məlumatına görə, “Azərbaycan ərazisində 17 dini təşkilat fəaliyyət göstərir, onlardan 5-6-nın fəaliyyəti ciddi şübhə doğurur, “Yehova şahidləri” və “Yeddinci günün adventistləri” də onlar sırasındadır”.

“Yehova şahidləri” xristianlığın bir cərəyanıdır, bütün dünyada 8 milyon yarım insanı birləşdirir, yəni az qala Azərbaycan vətəndaşlarının sayına bərabər.

Bu, həmin cərəyan üzvlərinin təqibinə dair ilk fakt deyil. 2010-cu ildə Azərbaycanın Müdafiə Nazirliyi Yehova şahidlərini bir sıra digər dini təşkilatlarla birlikdə Ermənistanın Apostol Kilsəsi və Ermənistan xüsusi xidmət orqanları ilə əməkdaşlıqda ittiham etmişdi.

• Yehova şahidləri seçkilərdə iştirak etmir, dövlət himnini ifa etməkdən, dövlət rəmzlərinə ehtiram bildirməkdən imtina edir.
• Onlar heç bir siyasi partiyada və ictimai-siyasi təşkilatda təmsil olunmur. Yehova şahidləri heç bir siyasi partiyanı təbliğ etmir və seçkilərdə öz namizədliklərini irəli sürmürlər.
• Orduda xidməti yolverilməz sayırlar, hətta xidmətdən imtina cinayət məsuliyyəti və həbslə nəticələnsə də.