“Artıq Yerevandan İstanbula reys açılır, bizim pulla 80 manat. Mən də gözləyirəm, Zəngəzur dəhlizi açılsın, maşınla gedim İrəvana, oradan İstanbula uçum”, – bunu bu gün Milli Məclisin iclasında deputat Aqil Abbas “Turizm haqqında” qanun layihəsinin müzakirələri zamanı deyib. Millət vəkilləri aviabiletlərin həddən artıq baha olmasından gileyləniblər.
Azərbaycan parlamentində “Turizm haqqında” qanun layihəsinin müzakirələri aparılıb. Bir sıra millət vəkilləri ölkədə turizmin inkişafını ləngidən və buna mane olan amilləri sadalayıblar. Bir çox deputatlar təyyarə biletlərinin həddən artıq baha olmasına diqqət çəkiblər.
Deputat Aqil Abbas bildirib ki, bu gün burada hamı təkliflərini dedi:
“AZAL qiymətləri endirəcəkmi? Yox, endirməyəcək. Artıq İrəvandan İstanbula reys açılır, bizim pulla 80 manat. Mən də gözləyirəm, Zəngəzur dəhlizi açılsın, maşınla gedim İrəvana, oradan İstanbula uçum.
Bu məsələyə ciddi şəkildə baxılmalıdır. Deputatların bu gün burda dediyi qalır havada. Sözümüzün havada qalmaması üçün bəlkə bu məsələyə qayıtmayaq, AZAL qiymətləri qaldıra-qaldıra getsin?”
“Hotellərdə bir gecə, iki gün qalmaq üçün mənim 1 aylıq maaşım qədər pul verməlisən. Qiymət məsələsi birdəfəlik həll olunmalıdır. Xahiş edirəm, Sahibə xanım, özünüz Milli Məcisin sədri kimi bu işə qarışın”, – deyə, A.Abbas sözlərini tamamlayıb.
Millət vəkili Musa Quliyevin sözlərinə görə, mühafizəkar viza rejimi ölkədə turizmin inkişafına maneə olaraq qalmaqdadır: “Azərbaycana yalnız 10 ölkədən xarici vətəndaş vizasız gələ bildiyi halda, Gürcüstana 100-ə yaxın, Özbəkistana 80-dən çox, Qazaxıstana 70-dən çox, Türkiyəyə isə 90-dan çox ölkədən əcnəbilər vizasız gələ bilərlər”.
“Digər tərəfdən, sərfəli olmayan bazar şərtləri də var. Təyyarə biletlərinin baha olması da turistlərin gəlişinə maneədir. Sərfəli olmayan bazar şərtləri aşağı büdcəli hava yolu şirkətlərinin cəlb olunmasına, uçuş istiqamətlərinin şaxələndirilməsinə və uçuş reyslərinin sayının artmasına maneə yaradır.
Eyni zamanda, Azərbaycanda beynəlxalq statuslu regional hava limanları mövcud olsa da, birbaşa hava əlaqələrinin qurulmasında onlardan səmərəli istifadə edilmir. Üçüncü səbəb quru sərhəd-keçid infrastrukturunun turistlər üçün əlverişli olmamasıdır.
Turist məmnunluğunun yaxşılaşdırılması, qonşu ölkələrdən gələn turist sayının artırılması məqsədilə quru sərhəd-keçid məntəqələrində viza verilməsi işinin təşkilinə, gözləmə rejiminin azaldılmasına, infrastrukturun təkmilləşdirilməsinə, keçid prosedurların optimallaşdırılmasına, habelə əlavə resursların (insan, texniki və maddi resursların) cəlb olunmasına ehtiyac var”, – Musa Quliyev deyib.
“Dəfələrlə təyyarə qiymətlərinin baha olması məsələsini qabardırıq. Bu məsələdə Gürcüstan və digər ölkələrə uduzuruq. Uduzuruqsa, rəqabət də olmayacaq. Başqa ölkələrdən bura gəlib getmək əzaba çevrilib”. Bunu isə Milli Məclisin üzvü Fazil Mustafa bildirib.
Parlamentin mədəniyyət komitəsinin sədri Qənirə Paşayeva da təyyarə biletlərinin baha olmasından şikayətlənib: “Niyə qardaş Türkiyədən başqa ölkələrin uçuş xərcləri Azərbaycanla müqayisədə daha aşağıdır? Bunun səbəbi Türkiyə ilə bağlı deyil, Azərbaycanda bu işə məsul qurumlarla bağlıdır. Mühafizəkar viza rejimi də Azərbaycandadır.
Beynəlxalq uçuşlarda regional hava limanları ilə bağlı daha aşağı qiymətlər tətbiq etməliyik. Quru sərhədlərindən Azərbaycana keçən turistlər var, həmin yerlərdə sadələşdirilməyə gedilməlidir. Bu yaxınlarda Özbəkistanda səfərdə idim. Orda mənə dedilər ki, Azərbaycana artıq 10 saata gələ bilirlər. Azərbaycana gəlmək Amerikaya gəlməyə çevrilib. Turizmin inkişafı məsələsinə kompleks yanaşılmalıdır”.
