Yerevanda erməni kinematoqrafı muzeyi açılıb
Yerevanda erməni kinosu muzeyi açılıb. Muzeyin açılış günü ekspozisiya erməni kinematoqrafiyasından bəhs edən yeni materiallarla zənginləşib. Yeni eksponatları erməni kinematoqrafçıları öz şəxsi kolleksiyalarından təqdim ediblər. Onlar muzeyə rəmzi eksponatlar bağışlayıblar – erməni filmlərinin çəkilişlərində istifadə olunmuş əşyalar: kino kameraları, kino lentləri, fotokameralar, işıq texnikası, filmlər üçün yazılan saundtreklərin əlyazma notları.
Mədəniyyət naziri Armen Amiryan hesab edir ki, bu muzey bir müddət sonra çox populyar olacaq:
“Düşünürük ki, bu, bizim muzey dünyamızın ən yaxşı, ən çox ziyarət edilən və ən sevimli muzeylərindən biri olacaq”.
Kinematoqrafçılar İttifaqının sədri Harutyun Xaçatryan muzeyin açılış günü öz çıxışında bunları bildirib:
“Mən çox həvəsliyəm – bizdə sinematek olacaq, həm də təsadüfi, ölü muzey olmayacaq, dərslərin keçildiyi, filmlərin bərpa edildiyi, master-klasların verildiyi, kitabxananın, filmotekanın fəaliyyət göstərdiyi, film baxışlarının təşkili üçün kiçik zalın olduğu işlək muzey olacaq. Odur ki, biz xəyalımızı həyata keçirməyə – tamaşaçıları erməni kinematoqrafı ilə tanış etməyə davam edəcəyik. Məlum oldu ki, kino ölmür, kino bütün dünyada daha gərəkli, daha maraqlı olur, ciddi, mühüm silaha çevrilir”.