“Ya azadlıq, ya ölüm”. Müxalifətçi həbsdə 3 aydır aclıq edir
Əlizamin Salayevin işi
Azərbaycanda müxalifətçi üç aydan çoxdur ki, qanunsuz həbsinə etiraz əlaməti olaraq aclıq edir. Xuliqanlıqda ittiham olunan Azərbaycan Xalq Cəbhəsi Partiyasının (AXCP) üzvü Əlizamin Salayev həbsinin siyasi sifariş olduğunu bildirir və qeyd-şərtsiz azadlığa buraxılmasını tələb edir.
- Xatirələrdə qalmış “fotolar”
- Mətbuat Azadlığı günündə Azərbaycan mətbuatı 151-ci yerdə
- İlham Əliyev: “Hədə və terror dili Azərbaycanla işləməyəcək”
“Korrupsioner, cinayətkar olsaydı, azad edilərdi”
“Əlizamin Salayev korrupsioner nazir müavini olsaydı, 1,8 milyon manat dövlət vəsaitini mənimsəsəydi, İlham Əliyev onu da dünən əfv edərdi. Əlizamin bəy MTN zabiti olub, iş adamlarının boğazına çökərək, reketlik etmiş və başqa vəzifə cinayətləri törətmiş olsaydı, yenə də dünən əfv olunardı. Əlizamin bəy vəzifəli şəxs yox, sadəcə gerçək cinayətkar olsaydı, yenə də əfv edilmək şansı olacaqdı.
Ancaq Əlizamin bəy korrupsioner deyil, cinayətkar deyil, hakimiyyətdən hüquq və ədalət, özü kimi sadə insanların haqqını tələb edir. Ona görə də, ölüm ayağında olsa da, hakimiyyətin “humanizm”indən ona pay düşmür. Aclığın 92-ci günündə olan Əlizamin bəyi korrupsioner və gerçək cinayətkar olmadığı, siyasi məhbus olduğu üçün məhv edirlər.
Əlizamin bəyə azadlıq tələb edək!” – AXCP sədri Əli Kərimli bu gün özünün “Facebook” səhifəsində yazıb.
Xatırladaq ki, dünən, mayın 8-də eks-prezident Heydər Əliyevin anadan olmasının yüz illiyi münasibətilə dövlət başçısı 801 məhkumu əfv edib. Onların arasında hüquq müdafiəçiləri tərəfindən siyasi məhbus kimi tanınan cəmi 8 nəfər var. Əlizamin Salayev bunların sırasında deyil.
Nə baş verib?
AXCP-nin Salyan rayon şöbəsinin sədri Əlizamin Salayev bu il fevralın 7-də saxlanılıb. Ona qarşı Cinayət Məcəlləsinin 221.3-cü maddəsinə (xuliqanlıq – silahdan və ya silah qismində istifadə olunan əşyalardan istifadə edilməklə zərər çəkmiş şəxsə zor tətbiq olunması) əsasən cinayət işi açılıb. Salayevi 5 ilədək həbs cəzası gözləyir.
Hazırda Salayevin sağlamlıq durumu kritikdir. Bir neçə gün öncə saxlandığı 1 saylı Bakı İstintaq Təcridxanasında Salayevlə görüşən vəkili Fəxrəddin Mehdiyevin sözlərinə görə, onun səhhətində təhlükəli ağırlaşmalar var.
“Qan təzyiqi 80/60-dır. Çəkisində böyük itki (45 kiloqram) var, təcridxanaya qəbul ediləndə 118 kiloqram olub, indi 73 kiloqramdır. Kəskin ağrıları var. Ayaqları tutulub. Onu təcridxananın əməkdaşları əllərindən tutaraq mənimlə görüşə gətirmişdi. Mədəsində, böyrəklərində, ürəyində kəskin ağrılardan şikayət edir”, vəkil “Amerikanın Səsi”nə deyib.
“Salayev “ya azadlıq, ya ölüm” deyir”
Mehdiyev bildirib ki, AXCP fəalına məcburi sistem köçürürlər.
“Salayev bundan çox narazıdır. Dedi ki, məcburi sistem köçürülməsi davam etdirilsə, müqavimət göstərəcək və quru aclığa keçəcək”.
Vəkil onu da qeyd edib ki, Salayevlə ombudsmanın, Baş Prokurorluğun, Beynəlxalq Qırmızı Xaç Komitəsinin nümayəndələri görüşüb, lakin ona qarşı münasibətdə hər hansı dəyişiklik yoxdur.
“Çoxsaylı insanlar, vəkillər, yaxınları aclığı dayadırmasını xahiş edir. Lakin Salayev bildirir ki, onun hər hansı günahı yoxdur, ittiham böhtandır. O, aclığı sonadək davam etdirməkdə israrlıdır. “Ya azadlıq, ya ölüm” deyir. Bunlara baxmayaraq, hətta onun barəsində həbs qətimkan tədbirinin dəyişdirilməsi ilə bağlı vəsatətlərimiz belə təmin edilmir”, – o qeyd edib.
Salayev təcridxanada təkadamlıq kameraya köçürülüb, həkim nəzarətindədir. Aprelin 23-də komaya düşüb. Yalnız məcburi sistem köçürüldükdən sonra ayılıb. Yaxınları və partiyadaşları onun hər an həyatını itirə biləcəyindən qorxurlar.
İş üzrə məhkəmə prosesi başlayıb
Mayın 2-də Bakının Qaradağ rayon Məhkəməsində Əlizamin Salayevin cinayət işi üzrə hazırlıq iclası keçirilib.
Hakim Rufan Mürsəlovun sədrliyi ilə keçirilən prosesdə vəkil Nemət Kərimli sədrlik edən hakimə etiraz edib. Bundan başqa, vəkillər cinayət işinə xitam verilməsi, Zamin Salayev barəsində həbs-qətimkan tədbirinin ev dustaqlığı ilə əvəz olunması ilə bağlı vəsatətlər qaldırıb.
“Hakim istintaq müddəti yekunlaşdıqdan sonra həbs qətimkan tədbirinin ev dustaqlığı ilə əvəz olunması ilə bağlı vəsatəti qəbul etməmişdi. Əlavə olaraq, özündən əsaslar müəyyən etmişdi. Hansı ki, bu, prokurorluğun səlahiyyətində olan məsələdir. Bununla bağlı, hesab edirik ki, o, ədalətli məhkəmə apara bilməyəcək. Və hüquqlarını müdafiə etdiyimiz şəxslə məsləhətləşdikdən sonra vəkilləri olaraq etiraz etdik. Təbii ki, təmin edilmədi. Həbsin ev dustaqlığı ilə əvəz olunması ilə bağlı vəsatət verildi. Həmin vəsatət də təmin olunmadı”, – Nemət Kərimli “Amerikanın Səsi”nə bildirib.
Salayev məhkəmə prosesində çıxış edib. O, bir daha vurğulayıb ki, həbsi siyasi fəaliyyəti ilə əlaqədardır və siyasi sifarişdir.
