Azərbaycanda sosial şəbəkədə “ifşa olunmuş” rəhbər işçi vəzifəsindən azad edildi

Xaçmaz Regional Mədəniyyət İdarəsinin rəisi Nazim Ağayev tutduğu vəzifədən azad edilib. Bu barədə əmri mədəniyyət naziri Anar Kərimov imzalayıb. N.Ağayevin vəzifəsindən getməsinə səbəb isə sosial şəbəkələrdə “ifşa” olunmasıdır.

• Azərbaycanda səs-küylü məhkəmə iddiaları paradı
• Azərbaycanda yaşının 131 olduğu deyilən “ən yaşlı pensiyaçı”nın əslində neçə yaşı var?
• Terminallarda əlavə 1 manatı kim ödəyəcək?

Bir neçə gün idi ki, sosial şəbəkələrdə Xaçmaz Regional Mədəniyyət İdarəsinin kompüter proqramları və antivirus proqramlarının alınmasına dair elan etdiyi şübhəli tenderin nəticələri müzakirə olunurdu.

Belə ki, xüsusi dövlət portalına yerləşdirilmiş tender şərtlərində idarənin 10.426 manat məbləğində proqram təminatı alması nəzərdə tutulurdu. Məlumata əsasən, Məmmədli Malik Mikayıl oğlu adlı şəxs tenderin qalibi elan edilib.

Sosial şəbəkə istifadəçiləri qeyd edirdilər ki, antivirus proqramlarının alınması heç bir vəchlə bu qədər baha ola bilməz.

“Mədəniyyət nazirliyinə yeni nazir təyin olundu, xaricdə təhsil alıb, işləyib edib, gənc kadrdır, 4-5 dil bilir falan-filan, əla. “Dövlət satınalmalarının vahid elektron portalı”nda Məmmədli Malik adlı fiziki şəxs tenderin qalibi olub. Mədəniyyət Nazirliyinin Xaçmaz regional Mədəniyyət İdarəsi üçün antivirus və digər proqramların alınmasına 10 min 426 manat vəsait ayrılıb. Halbuki istənilən antivirus proqramı illik maksimum 60-70 manatdır. Digər proqramlar da olsun illik 100-150 manat. Xaçmazın mədəniyyət idarəsində hansı xüsusi proqram alınır ki, büdcədən minlərlə vəsait sərf edirlər, atomu zənginləşdirirlər orda, yoxsa “Bayraktar” istehsal edirlər? Büdcə oğurluğunun buynuzu olmur, elə belə-belə saraylar, malikanələr peyda olur”, – Almaniyada yaşayan azərbaycanlı bloqer Həbib Müntəzir yazıb.

O, nazirin bugünkü qərarına da münasibət bildirib:

“Mədəniyyət Nazirliyinin Xaçmaz Regional Mədəniyyət İdarəsinin rəisi Ağayev Nazim Əsəd oğlu tutduğu vəzifədən azad edilib. Bununla bağlı mədəniyyət naziri Anar Kərimov müvafiq əmr imzalayıb. Dünən yazdığım “antivirus” yeyintisinə görədir, doğru addımdır. Büdcədən qara qəpik də oğurlayanlar nəinki vəzifədən çıxarılmalı, barələrində ədalətli araşdırma aparmalı, təsdiqlənərsə həbs edilməlidirlər ki, başqalarına dərs olsun”.