UTX-nin məlumatına görə, Saakaşvili mütəşəkkil cinayətkarlığı dəstəkləməkdə ittiham olunaraq saxlanılıb
14:45
Ukrayna baş prokuroru Yuri Lutsenko fövqəladə brifinqdə bildirib ki, Mixail Saakaşvilinin aksiyası keçmiş Ukrayna prezidenti Viktor Yanukoviçə yaxın olan şəxslər tərəfindən maliyyələşdirilib. Onun sözlərinə görə, Saakaşvilinin Rusiyadan yarım milyon dollar aldığı təsdiqlənib. Sübut olaraq Lutsenko Saakaşvilinin biznesmen Sergey Kurçenko (Yanukoviçin yaxın çevrəsindən) ilə telefon danışığının səs yazısını təqdim edib. Prokurorluğun iddiasına görə, bu, “dövlət əleyhinə ağır cinayətin” sübutudur. Paralel olaraq Kiyevin mərkəzində polis xüsusi təyinatlıları ilə Mixail Saakaşvilinin tərəfdarları arasında qarşıdurma davam edir. Sonuncular Saakaşvilinin mindirildiyi maşını mühasirədə saxlamağa çalışır. Müxalifətçilər bu küçədə barrikadalar qurublar.
13:12
Gürcüstanın keçmiş prezidenti Mixail Saakaşvili Kiyevdə mütəşəkkil cinayətkarlığı dəstəkləmək ittihamı ilə saxlanılıb. Ukrayna Təhlükəsizlik Xidmətinin (UTX) məlumatında deyilir ki, Saakaşvili Cinayət Məcəlləsinin “Cinayətkar dəstənin dəstəklənməsi və dəstənin fəaliyyətinə dair faktların gizlədilməsini” nəzərdə tutan 256-cı maddəsi ilə qaldırılmış cinayət işi üzrə saxlanılıb. Həmin bəyanata əsasən, bu iş üzrə Saakaşvilinin dindirilməsi planlaşdırılır. Bu maddənin pozulması 5 ilə qədər azadlıqdan məhrumetmə ilə cəzalandırılır.
12:40
Gürcüstanın keçmiş prezidenti, “Yeni Qüvvələr Hərəkatının” lideri Mixail Saakaşvili Kiyevdə, öz mənzilində həbs olunub.
Saxlanma ilə bağlı əməliyyat Ukrayna Təhlükəsizlik Xidmətinin (UTX) xüsusi təyinatlıları tərəfindən həyata keçirilib. Keçmiş Gürcüstan prezidentinin həbsinin səbəbləri və ona qarşı hansı ittihamların irəli sürüldüyü hələlik dəqiq bəlli deyil. Rusiyanın “Dojd” telekanalı Mixail Saakaşvilinin vəkilinə istinadən onun dövlət çevrilişi hazırlamaqda ittiham olunduğu haqda məlumat yayıb.
Xüsusi təyinatlılar Saakaşvilinin evinə səhər girib, keçmiş prezidentin özü bu zaman dama çıxıb və oradan tərəfdarlarını köməyə çağırıb. Onun vəkilini binaya buraxmayıblar.
Oraya toplaşan fəalların müqavimətinə baxmayaraq, hüquq-mühafizə orqanlarının əməkdaşları Saakaşvilini binadan çıxarıb, maşına mindirməyə müvəffəq olublar, amma tərəfdarları maşının hərəkətinə imkan verməyib və hələ də Saakaşvilinin mindirildiyi avtomobili mühasirədə saxlayırlar.
Dekabrın 3-də Mixail Saakaşvili minlərlə insanın iştirakı ilə aksiya təşkil edib. Nümayişçilər prezidentin impiçmentini tələb ediblər. Saakaşvilinin təşkil etdiyi aksiyalar Kiyevdə 17 oktyabrdan bəri permanent şəkildə keçirilir.
Noyabrın 30-da Ukrayna Miqrasiya Xidməti Mixail Saakaşvilinin ölkədə qalmaq icazəsini 3 ay da uzadıb.
2017-ci ilin iyulunda Ukrayna prezidentinin fərmanı ilə Mixail Saakaşvili bu dövlətin vətəndaşlığından məhrum edilib. Bu zaman o, ölkə xaricində olub. Sentyabrın 10-da Saakaşvili tərəfdarlarının köməyi ilə hüquq-mühafizə orqanlarının Polşa-Ukrayna sərhədində qurduğu kordonları aşaraq, Ukrayna ərazisinə qayıda bilib. Sərhədi qanunsuz keçdiyi üçün o, 130 dollar ekvivalentində məbləğlə cərimə olunub.
Saakaşvili və onun tərəfdarları Ukrayna prezidenti Pyotr Poroşenkonu ölkəni korrupsiya və oliqarx prinsipləri ilə idarə etməkdə ittiham edir, siyasi islahatların və növbədənkənar seçkilərin keçirilməsini tələb edirlər.
