Təmas xəttində Azərbaycan hərbçisi əsir götürülüb

“Fevralın 1-də Azərbaycan tərəfi Qarabağda təmas xəttini keçərək kəşfiyyat-diversiya əməliyyatına cəhd edib”, – Dağlıq Qarabağ Müdafiə Nazirliyinin mətbuat xidməti xəbər verib. Mətbuat xidmətinin məlumatına görə, insident təqribən 15:00-da təmas xəttinin şimal istiqamətində baş verib, diversiya qrupu “əlverişli” hava şəraitindən – dumandan istifadə edib.

“Azərbaycan xüsusi təyinatlılarının hərəkəti zamanında aşkar edilib. Preventiv əməliyyat nəticəsində rəqib itkilər verib və geri çəkilməyə məcbur edilib. Erməni qüvvələri Azərbaycan Ordusunun hərbçisi 1995-ci il təvəllüdlü Elnur Hüseynovu əsir götürüb”, – məlumatda deyilir.

Azərbaycanın Müdafiə Nazirliyinin saytında məlumat təkzib edilir. “Erməni tərəfinin təxribatla… bağlı yaydığı məlumat yalandır. Cəbhə xəttində heç bir fəal hərbi əməliyyat baş verməyib. Elnur Hüseynova gəlincə… o hərbi intizamı pozub və… nəticədə Azərbaycan Silahlı Qüvvələri sırasından tərxis edilib”, – məlumatda bildirilir.