Türkiyənin Azərbaycana təhvil verdiyi alim Qubad İbadoğlu işi çərçivəsində həbs edilib
Azərbaycanda siyasi həbslər
Türkiyədə yaşayan iqtisadçı alim Fazil Qasımov həmin ölkənin hüquq-mühafizə orqanları tərəfindən saxlanılaraq Azərbaycan hökumətinə təhvil verilib. Rəsmi məlumata görə, Qasımov Qubad İbadoğlu işi çərçivəsində həbs edilib və ona qarşı eyni ittiham irəli sürülüb. Onun yaxınları isə hadisə barədə sosial şəbəkələrdən xəbər tutduqlarını və saxlanılma səbəbilə bağlı onlara heç bir məlumatın verilmədiyini bildiriblər.
- Gürcüstanın Şovi dağ kurortunda torpaq sürüşməsi nəticəsində onlarla insan ölüb və itkin düşüb
- Azərbaycanın Baş Prokurorluğu: “Xaçatryan Meşəli cinayətilə bağlı axtarlan 9 nəfərdən biridir”
- Afiəddin Məmmədov həbsdə aclıq aksiyasına başlayıb
Fazil Qasımovun qardaşı Nazim Qasımov “Turan” agentliyinə bildirib ki, onu İstanbulda yaşadığı evdən aparıblar.
“Onun hansı səbəbdən saxlanılması barədə heç bir məlumat verilməyib. Sosial şəbəkələrdən öyrəndik ki, Fazil Bakıya gətirilib.
Lakin saxlanma səbəbi ailəmizə izah olunmayıb və biz onun haqqında dövlət strukturlarından məlumat ala bilmirik”, – deyə Nazim Qasımov bildirib.
Fazil Qasımov kimdir?
Fazil Qasımov 1985-ci ildə Azərbaycanın Kəlbəcər rayonunun Başlıbel kəndində anadan olub. 700 balla ali məktəbə qəbul olub. İlk olaraq Azərbaycanda Qafqaz Universitetini bitirib. Universitetin fəaliyyəti 2017-ci ilin yanvarında, Azərbaycanda FETÖ-çü “ovu” davam etdiyi zaman dayandırılıb.
Daha sonra Qasımov Niderlandın Tilburg University, Türkiyənin Özyeğin Universitetində təhsil alıb. 2019-cu ildən İstanbul Universitetinin doktorantıdır. Son illərdə İstanbul şəhərində yaşayıb.
Fazil Qasımov sonuncu dəfə iyulun 29-da Azərbaycanda baş verən son həbslərlə bağlı tənqidi status paylaşıb:
“21-ci əsrdə alimlər təqib edilir, xeyirxah insanlar şərlənir. Artıq nəyin həqiqət, nəyin yuxu olduğunu ayırd etməkdə çətinlik çəkirik. Aydınlıq sabahlar naminə yeni bir Rönesansa ehtiyac var”, – deyə alim “Facebook” hesabında yazıb.
Analoji saxta pul ittihamı
Azərbaycanın Daxili İşlər Nazirliyinin (DİN) Abzas Media-ya verdiyi məlumata görə, Fazil Qasımov axtarışda olub:
“Cinayət işi ilə əlaqədar axtarışda olan Fazil Qasımov ölkəyə gətirilib və istintaqa təhvil verilib”.
Ona qarşı Cinayət Məcəlləsinin 204-cü (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham irəli sürülüb.
Nərimanov Rayon Məhkəməsinin qərarı ilə Qasımov barəsində 3 ay 12 gün müddətinə həbs qətimkan tədbiri seçilib.
Rəsmi məlumata əsasən, Fazil Qasımov Qubad İbadoğlu ilə eyni iş çərçivəsində həbs edilib.
FETÖ işi böyüyür?
İyunun 24-də həbs edilən Azərbaycan Demokratiya və Rifah Hərəkatının rəhbəri, iqtisadçı alim Qubad İbadoğlu da Cinayət Məcəlləsinin 204.3.1-ci (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham olunur. DİN-in yaydığı məlumata əsasən, az əvvəl FETÖ (Amerikada yaşayan din xadimi Fətullah Gülənin rəhbərlik etdiyi Türkiyədə terrorçu elan edilmiş təşkilat) ilə əlaqədar həyata keçirilmiş xüsusi əməliyyat zamanı saxlanılan dörd nəfərdən birinin İbadoğlu ilə əlaqələri müəyyən edilib və bu da onun istintaqa cəlb edilməsinə səbəb olub.
İbadoğlunun saxlanması ilə eyni vaxtda Azərbaycanın iqtidaryönlü mediasında Türkiyənin iqtidaryönlü “Yeni Şafak” qəzetinə istinadən FETÖ ilə əlaqəsi olan 4 nəfərin, o cümlədən Anar Əliyevin da Bakıda saxlanması ilə bağlı xəbərlər yayılıb.
O cümlədən bildirilirdi ki, FETÖ-nün Azərbaycandakı keçmiş rəhbərlərindən biri Doyruş Cəfərov, təşkilatın maliyyə işlərinə məsul olan Qumrax Abduraxmanov, “Yurd” Mərkəzinin direktoru Ruslan Əliyev və təşkilati məsələlərə cavabdeh olan Anar Əliyev saxlanılıb.
“Müəyyən edilib ki, Cəfərov, Əbdürəhmanov və Əliyev uzun müddətdir ki, FETÖ-nün Azərbaycandakı təhsil mərkəzlərində öz ideyalarını təbliğ ediblər və gəncləri təşkilata cəlb etmək üçün addımlar atıblar”, – deyə Azərbaycanın iqtidaryönlü mətbuatı yazırdı.
Ertəsi gün məlum olub ki, hər üç şəxs həbs edilib və onlar da İbadoğlu kimi Azərbaycan Cinayət Məcəlləsinin saxta pul hazırlama, əldə etmə və ya satma (204.3.1-ci) maddəsi ilə ittiham olunublar.
Həbsdə olan Ruslan Əliyev Bakı Mühəndislik Universitetinin (Qafqaz Universitetinin bazasında yaradılıb) müəllimidir.
