Türkiyədə ata zəlzələdən sonra qızını dağıntılar altından tapıb. Amma çox gec

Türkiyədə zəlzələ qurbanları

Faciəni əks etdirən bu fotoları bu gün AFP-nin fotoqrafı Adəm Altan Türkiyənin Qəhrəmanmaraş şəhərində çəkib. Fevralın 6-na keçən gecə baş verən dəhşətli zəlzələ nəticəsində dünyasını dəyişən 15 yaşlı qızı Irmakın əlindən tutan ata. Məsut Hansər qızını tapa bildi, lakin o, artıq ölmüşdü.

İndi o, yalnız xilasedicilərin dağıntılar altından qızının cəsədini çıxara bilməsini gözləyir – CNN yazır.

Rəsmi rəqəmlərə görə, bu ana qədər (7 fevral) Türkiyə və Suriyada zəlzələlər nəticəsində 5200-dən çox insanın öldüyü və on minlərlə insanın yaralandığı məlumdur. Türkiyədə ölənlərin sayı 3700-ü keçib, 22286 yaralı var.

“Türkiyədə yüz ilin ən güclü zəlzələsi”. Suriyada da dağıntılar var. Minlərlə insan tələfatı. Video və reportaj

Fevralın 6-da Türkiyənin cənubunda və Suriyanın şimalında baş verən silsilə güclü zəlzələlər nəticəsində azı 2500 nəfər ölüb, 6000-dən çox insan yaralanıb

7,8 bal gücündə ilk zəlzələnin mərkəzi Pazarcık bölgəsinə düşüb. Qəhrəmanmaraş və bir sıra vilayətlər, o cümlədən Qaziantep, Şanlıurfa, Diyarbəkir, Adana, Adıyaman, Malatya, Osmaniyə, Hatay və Kilis ağır təkanlara məruz qalıb. Daha sonra yerli vaxtla saat 13.24-də mərkəz Qəhrəmanmaraş Elbistan bölgəsində 7.6 bal gücündə ikinci zəlzələ baş verib. Bu iki gün ərzində 125-dən çox yeraltı təkan qeydə alınıb.

5.0 və 6.0+ arasında yeni afterşok təkanların hələ də mümkün olduğu və ilkin zəlzələdən təsirlənən binalara əlavə ziyan vurma riski daşıdığı bildirilir. Bu, xilasetmə qrupları və sağ qalanlar üçün daimi təhlükə yaradır.

Xilasedicilər dağıntılar altında sağ qalanların axtarışını davam etdirirlər, lakin aramsız yağan qar və artan şaxta böyük maneəyə çevrilib. Yaxın günlər üçün proqnoz isə daha da pis hava vəd edir.

Dünyanın hər yerindən getdikcə daha çox xilasetmə qrupları Türkiyəyə gəlir, avadanlıq və humanitar yardım təyyarələrlə çatdırılır. Lakin Beynəlxalq Xilasetmə Komitəsi (IRC) dünyaya müraciət edərək bunun kifayət etmədiyini söylədi. “Suriya və Türkiyədə fəlakət dərəcədə humanitar ehtiyaclar var, çox gec olmadan kritik təcili tədbirlər görmək və ziyan çəkənlərə həyati yardım göstərmək lazımdır”, – CNN-in yazdığına görə IRC-dan bildirilib.

Ümumdünya Səhiyyə Təşkilatı Türkiyə və Suriyaya geniş miqyaslı uzunmüddətli yardım etməyə başladığını açıqlayıb.

ÜST 23 milyona qədər insanın dəhşətli zəlzələdən zərər çəkdiyini bildirib.

Yardımların çatdırılmasında da problem var, zəlzələ nəticəsində dağılan yollara görə hər şey ləngiyir.

Türkiyə prezidenti Rəcəb Tayyib Ərdoğan 10 əyalətdə 3 ay müddətinə fövqəladə vəziyyət elan edib.