"Tiflis həbsxanasında məhbuslar qeyri-insani rəftara məruz qalır", - azərbaycanlı jurnalistin həyat yoldaşı
Gürcüstan həbsxanasında azərbaycanlı jurnalistə qarşı pis rəftar
Gürcüstanda həbsdə olan azərbaycanlı jurnalist Əfqan Sadıqovun həyat yoldaşı Sevinc Sadıqova ərinin həbsxanada pis rəftara məruz qaldığını deyir. Gürcüstanda yerləşən Sosial Ədalət Mərkəzi də Əfqan Sadıqovun adekvat qidalanma ilə təmin olunmasının vacibliyini vurğulayır.
Kontekst
Azərbaycanlı jurnalist Əfqan Sadıqov avqustun 3-də Tbilisidə Mərkəzi Kriminal Polisinin nümayəndələri tərəfindən həbs edilib. Sadıqovun axtarışda olduğu və barəsində Azərbaycanda cinayət işi açıldığını ona həbs olunandan sonra deyiblər.
Sadıqov həbsinə etiraz olaraq Gürcüstandakı 8 saylı cəzaçəkmə müəssisəsində 161 gün aclıq aksiyası edib. Avropa İnsan Hüquqları Məhkəməsinin qərarlarına baxmayaraq, Gürcüstan məhkəmələri jurnalisti həbsdə saxlamağa davam edir.
Sevinc Sadıqova özünün feysbuk sosial şəbəkə hesabında yazır:
“Bu gün, martın 24-ü, həyat yoldaşım Əfqan Sadıqov saxlandığı Tiflis təcridxanasından zəng etmişdi. O, 161 gün aclıq edib və fevralın 28-i aclığı dayandırıb. Aclıq edən şəxsin səhhətinin necə olacağı da məlumdur.
Əfqan deyir ki, martın 18-dən etibarən çaydan, sudan başqa heçnə qəbul edə bilmir.
Bunun səbəbi isə Tiflis həbsxanasında məhbuslara verdikləri qidaların bərbad olmasıdır (yəni heyvana versələr, heyvan yeyib, zəhərlənib, ölər).
Tiflis həbsxanasında məhbuslar qeyri-insani rəftara məruz qalır”.
Martın 20-də Gürcüstanda yerləşən Sosial Ədalət Mərkəzi, Əfqan Sadıqovun zəruri tibbi yardım, adekvat qidalanma və daha yumşaq həbs tədbirləri ilə təmin olunmasının vacibliyini vurğulayan bəyanat yayıb.
Deyilir ki, Gürcüstan məhkəmələri Avropa İnsan Hüquqları Məhkəməsinin Əfqan Sadıqovun Azərbaycana ekstradisiya edilməməsi barədə qərarına baxmayaraq, onun ekstradisiya edilməsi qərarını qüvvədə saxlayıb. Tbilisi Şəhər Məhkəməsi və Apellyasiya Məhkəməsi onun azadlığa buraxılması ilə bağlı müraciətləri qəbulolunmaz elan edib.
Yerli məhkəmə Avropa Məhkəməsinin ekstradisiyanın yalnız qarşısını aldığını, lakin onu qadağan etmədiyinə qərar verib. Hüquqşünaslar isə bu qərarları əsassız və həm milli, həm də beynəlxalq qanunlara zidd hesab edirlər.
Uzun müddət aclıq aksiyası edən Sadıqov hazırda aclığı dayandırıb, lakin hələ də həbsdədir. Sosial Ədalət Mərkəzi beynəlxalq məhkəmələrdə qərarlara etiraz etməyə və Sadıqovun hüquqlarını müdafiə etməyə davam etdiyini bildirir.
Kontekst
İstintaqın məlumatına görə, Əfqan Sadıqovun Gürcüstanda həbsi Azərbaycanın tələbi ilə həyata keçirilib. Jurnalist Azərbaycan Cinayət Məcəlləsinin 188.2.2 və 182.2.4-cü maddələrində nəzərdə tutulmuş cinayətdə – “hədə-qorxu ilə tələb etmə, tanımadığı şəxsin külli miqdarda əmlakını ələ keçirmə, təhqiredici məlumat yaymaqla hədələmə”də ittiham olunur.
“Azel.TV” saytının rəhbəri Əfqan Sadıqov bundan öncə 2020-ci ilin mayında hədə yolu ilə pul tələb etmək ittihamı ilə Azərbaycanda həbs edilib. 3 noyabr 2020-ci ildə məhkəmə onu yeddi il azadlıqdan məhrum edib. Apellyasiya Məhkəməsi cəza müddətini 6 ilədək, Ali Məhkəmə isə 4 ilədək azaldıb.
Sadıqov həbsxanada 242 gün aclıq edib və ümumilikdə 2 il 15 gün həbsdə saxlanıldıqdan sonra prezidentin əfv sərəncamı ilə azadlığa buraxılıb.
- Rəy: “Oğurlamaq, sui-qəsdə məruz qoymaq və qətlə yetirmək, İlham Əliyev rəqiblərinə qarşı bunların hər birini həyata keçirə bilər”
- Azərbaycan Milli Mətbuatının ən çox jurnalist həbsi ilə qeyd olunan 149-cu ili
Gürcüstan həbsxanasında azərbaycanlı jurnalistə qarşı pis rəftar
