Tbilisidə nəzarət olunmayan miqrasiyaya qarşı “Gürcü marşı” baş tutub. Fotoreportaj
İyulun 14-də axşam bir neçə min insan Tbilisidə Aqmaşenebeli prospekti ilə yürüş edib, “Türkiyə və Yaxın Şərq ölkələrindən Gürcüstana gələn və nəzarət olunmayan miqrasiyaya qarşı” etiraz etdiklərini bildiriblər.
Çoxları əllərində “Biz küçələrimizi əcnəbi kriminaldan təmizləyəcəyik!”, “Gürcü – Gürcüstan üçün”, “Yerini bil!” sözləri yazılmış plakatlar tutub. Plakatların çoxu millətçi və kvenofob məzmun ifadə edib.
Etiraz aksiyası “Gürcü marşı” adlandırılıb və iştirakçıları Gürcüstan hakimiyyətindən miqrasiya qanunvericiliyini sərtləşdirməyi və Gürcüstan ərazisində qanunsuz mövcud olan əcnəbilərin ölkədən deportasiya olunmasını tələb ediblər.
Iştirakçılar arasında bir neçə millətçi qruplaşmanın üzvləri olub. Marşın təşkilatçılarından biri siyasətçi Sandro Breqadze bildirib ki, iyulun 14-də Gürcüstanda “yeni milli-azadlıq hərəkatı” başlayıb.
Yürüş iştirakçıları bildiriblər ki, əcnəbilərin Gürcüstanda qalmasını nizamlayan qaydaları sərtləşdirmək lazımdır. Onlar həmçinin tələb ediblər ki, yerli qeyri-hökumət təşkilatlarının xaricdən maliyyələşməsi məhdudlaşdırılsın və “Milli hərəkat” siyasi partiyası qadağan edilsin.
Marş iştirakçıları hökumətə tələblərin yerinə yetirilməsi üçün bir həftə vaxt veriblər və bəyan ediblər ki, tələblər yerinə yetirilməzsə daha radikal addımlara keçəcəklər.
Marş zamanı Aqmaşenebeli prospektində hüquq-mühafizə orqanları səfərbər olub. Onlar münaqişə vəziyyətlərinin yarana biləcəyi təhlükəsi olan yerlərdə – əcnəbilərə məxsus mağazaların və restoranların qarşısında keşik çəkiblər. “Fobiyaya yox” internet-platforması hökuməti prosesin qanun çərçivəsində keçməsinə nəzarət etməyə və ksenofobiya və irqçilik səbəbilə zorakılığın qarşısını almağa çağırıb.
Aksiya zamanı heç bir hüquqa zidd hərəkət qeydə alınmayıb.
“Gürcü marşı” turistləri heyrətləndirib. Onlardan çoxu yürüşün səbəb və məqsədini anlamayıb, anlayanlar isə çox qorxub, onlar Aqmaşenebeli prospektindəki mağaza və kafelərdə gizləniblər.
Marş iştirakçıları öz məqsədləri haqda məlumat verməyə çalışıb, ərəb, türk və ingilis dilində yazılan vərəqələr paylayıblar.
