Tbilisidə Heydər Əliyev adına Mədəniyyət Mərkəzinin tikintisi üçün beş ailənin əmlakı əlindən alınacaq
Tbilisidə Heydər Əliyev adına Mədəniyyət Mərkəzi
Tbilisinin tarixi Abanotubani rayonunda Heydər Əliyev adına Mədəniyyət Mərkəzinin tikintisi planlaşdırılır. Bu qərarla əlaqədar Gürcüstan hökuməti həmin əraziyə “ictimai ehtiyaclar üçün zəruri” statusu verib. Bu isə o deməkdir ki, bu ərazidə yaşayan beş ailənin yaşayış və kommersiya sahələri ekspropriasiya yolu ilə əllərindən alınacaq.
İqtisadiyyat naziri Mariam Kvrivişvilinin imzaladığı sərəncam Aktivlərin İdarə olunması və İnkişafı Şirkətinə ekspropriasiya hüququ verir ki, bu da dövlətə əvvəlcədən kompensasiya müqabilində şəxsi mülkiyyəti müsadirə etməyə imkan yaradır.
Qərar aprelin 3-də, Azərbaycan prezidenti İlham Əliyevin Tbilisiyə səfərindən az əvvəl dərc olunub. Heydər Əliyev onun atası və Azərbaycan rəhbəri vəzifəsində sələfi olub.
İlham Əliyevin Tbilisiyə səfərinin ən diqqətçəkən tərəfi onun hakim “Gürcü arzusu” partiyasının fəxri sədri və Gürcüstanın qeyri-rəsmi idarəçisi Bidzina İvanişvili ilə görüşü olub.
Qərara əsasən, layihə köhnə evlərdən birinə aiddir və burada ümumilikdə 24 mülkiyyətçi qeydiyyatdadır. Onların bir qismi ilə dövlət tərəfindən seçilmiş şirkət artıq razılığa gəlib və əmlakı könüllü şəkildə satın alıb, lakin beş ailə ilə razılaşma əldə olunmayıb. Onlara məxsus əmlak müxtəlif ölçülü yaşayış və çardaq sahələrini əhatə edir.
Rəsmi açıqlamaya görə, mülkiyyətçilərə əvvəlcədən Məhkəmə Ekspertizası Milli Bürosunun qiymətləndirməsi əsasında kompensasiya təklif olunub, lakin razılaşma baş tutmayıb. Məhz bundan sonra şirkət ekspropriasiya prosesinin başlanması tələbi ilə nazirliyə müraciət edib.
Qərarda vurğulanır ki, mülkiyyət hüququ konstitusiya ilə qorunur, lakin bu hüquq mütləq deyil və ictimai zərurət olduqda məhdudlaşdırıla bilər. Həmçinin qeyd olunur ki, kompensasiyanın məbləği ilə bağlı fikir ayrılığı yaranarsa, məsələ məhkəmə qaydasında həll olunmalıdır.
Sakinlər bu qərardan bir ay ərzində şikayət verə bilərlər.
Layihəyə əsasən, 5 380 kvadratmetr ərazidə konsert zalı, təhsil məkanları, uşaq teatrı və ictimai zonaları əhatə edən çoxfunksiyalı mədəniyyət kompleksinin tikintisi planlaşdırılır. Əsas foye tarixi “Köhnə hamam” binası ilə birləşdiriləcək ki, bu da layihə müəlliflərinin fikrincə, köhnə ilə yeninin memarlıq harmoniyasını yaradacaq.
Sənəddə həmçinin qeyd olunur ki, mərkəz regional əməkdaşlıq platforması kimi nəzərdə tutulur və Gürcüstan ilə Azərbaycan arasında tarixi münasibətlərə əsaslanır. Layihə çoxmillətli mədəni mühitin inkişafına, həmçinin mədəni turizmin təşviqinə və beynəlxalq tədbirlərin keçirilməsinə yönəlib.
Heydər Əliyev Azərbaycanın ən nüfuzlu siyasi fiqurlarından biri olub və ölkənin müasir siyasi sisteminin formalaşmasında mühüm rol oynayıb.
O, 1923-cü ildə anadan olub və karyerasına sovet təhlükəsizlik strukturlarında başlayıb. Daha sonra Azərbaycan Sovet Sosialist Respublikasının rəhbərinə çevrilib əvvəlcə Kommunist Partiyasının birinci katibi, daha sonra isə Sovet İttifaqında ən yüksək siyasi vəzifələrdən biri sayılan SSRİ KP MK Siyasi Bürosunun üzvü olub.
Sovet İttifaqının dağılmasından sonra, 1993-cü ildə Əliyev artıq müstəqil Azərbaycanın prezidenti olub və 2003-cü ilə qədər ölkəyə rəhbərlik edib. Onun hakimiyyəti dövrü dövlətin mərkəzləşdirilməsinin gücləndirilməsi, siyasi sabitliyin bərpası və xüsusilə neft sektorunda iri beynəlxalq müqavilələrlə yadda qalıb.
Onun siyasəti tez-tez iki cür qiymətləndirilir: bir tərəfdən dövlət sabitliyi və iqtisadi artım dövrü kimi, digər tərəfdən isə avtoritar idarəetmənin güclənməsi və siyasi opponentlərin məhdudlaşdırılması kimi.
Heydər Əliyev 2003-cü ildə vəfat edib, lakin onun siyasi xətti bu gün də oğlu İlham Əliyev tərəfindən davam etdirilir.
Tbilisidə Heydər Əliyev adına Mədəniyyət Mərkəzi
