Tbilisi meriyası Türkiyə səfirliyi qarşısında erməni genosidinə həsr olunmuş tədbir keçirməyə icazə vermir

Hər il aprelin 24-də Osmanlı imperiyasında erməni genosidi qurbanlarının anım günündə Türkiyənin Tbilisidəki səfirliyi qarşısında aksiya keçirilir. Gürcüstanda yaşayan etnik ermənilər Osmanlı imperiyasında 1915-1918-ci illərdə həlak olmuş əcdadlarını bu cür yad edirlər.

Bu il ənənə pozula bilər – Tbilisi meriyası aksiyanın keçirilməsinə mane olmaq istəyir.

Erməni icması meriyadan Tbilisi Nəqliyyat Xidmətinin aksiyanın keçirilməsini “arzuolunmaz hesab etdiyi” haqda bildiriş alıb. Səbəb kimi isə hərəkətə maneənin yarana biləcəyi göstərilir.

“Gürcüstandakı erməni icması” aldığı bildirişi qadağa hesab etmir və öz planlarını dəyişmək niyyətində deyil.

JAMnews-la söhbətində “Gürcüstandakı erməni icmasının” məlumat mərkəzinin rəhbəri Sandro Ohanov bildirib ki, meriyadan gələn bildiriş “gözlənilməz və xoşagəlməzdir”:

“Biz bunu qadağa kimi dəyərləndirmirik, çünki aksiya keçirmək hüququnu bizə Konstitusiya verir. 2005-ci ildən biz genosid qurbanlarının xatirəsinə həsr olunmuş aksiya keçiririk və heç vaxt meriyanın bu cür mövqeyilə rastlaşmamışıq. Aksiyanın arzu olunan və ya arzu olunmayan olmasını ölkə vətəndaşlarının azad söz və özünüifadə hüququnun zamini olan Konstitusiya müəyyən edir, Nəqliyyat Xidməti yox”.

Ohanov vurğulayıb ki, meriyanın bu cavabı qərarın siyasi səbəbdən doğduğu şübhəsini yaradır, amma mövzunu dərinləşdirmək istəməyib: “Bu sadəcə ehtimaldır. Biz dövlətlərarası münasibətlərdə gərginlik yaratmaq istəmirik”, – Ohanov deyir.

“Gürcüstandakı erməni icması” mövcud qanunvericilikdə nəzərdə tutulduğu kimi aprelin 24-də Tbilisidə Türkiyə səfirliyinin yanında aksiya keçirmək niyyəti haqda məlumat verib.

Gürcüstan Konstitusiyasına əsasən hər kəsin dinc aksiya keçirmək hüququ var, əlbəttə, əgər bu aksiya Gürcüstan dövlətinə qarşı yönəlməyibsə. Aksiya keçirmək üçün icazəyə ehtiyac yoxdur. Sadəcə yerli bələdiyyəni xəbərdar etmək mütləqdir ki, həmin yerdə başqa aksiya planlaşdırılmasın. Bələdiyyə isə bu aksiyanın təşkilini təmin etməyə borcludur. Bununla belə bələdiyyə aksiya keçirilməsi haqda aldığı məlumatı cavablamaq məcburiyyətində deyil. Ancaq o zaman cavab yazılır ki, məlumatda göstərilmiş məkanda eyni zamanda başqa bir tədbir artıq planlaşdırılıb. Bu halda meriya cavab verir ki, aksiya təşkilatçıları başqa yer seçsinlər. Aprelin 24-də Tbilisidə Türkiyə səfirliyinin qarşısında heç bir tədbir planlaşdırılmayıb, bu isə o deməkdir ki, meriyanın “Gürcüstandakı erməni icmasının” aksiya keçirəcəyilə bağlı məlumatına heç bir cavab yazmaq tələb olunmurdu.

– Tbilisidə erməni genosidinin 102 illiyinə həsr olunmuş tədbirlərə aprelin 23-də Vake parkından başlanan yürüşlə start veriləcək. Yürüş iştirakçıları yanan məşəllərlə və şamlarla Türkiyə səfirliyinin qarşısına gələcək. Aprelin 24-də saat 14.00-da onlar elə oradaca nümayişə toplanacaqlar. Aksiya iştirakçıları Türkiyə hakimiyyətinə erməni genosidini tanıması tələbini çatdıracaqlar. Analoji tələblə onlar Gürcüstn hakimiyyətinə də müraciət edəcəklər.

Aprelin 14-də Gürcüstanda fəaliyyət göstərən erməni milli-ictimai təşkilatları artıq Gürcüstan Parlamentinə, prezidentinə və baş nazirinə genosidin tanınması məsələsinə baxmaları xahişi ilə müraciət ediblər.

JAMnews-un dosyesi:

• 1915-ci ildə Osmanlı İmperiyasında minlərlə erməni həlak olub. Onların bir hissəsi qətl edilib, bir hissəsi isə yaşam üçün uyğun olmayan ərazilərə köçürülüb və orada aclıqdan və Susuzluqdan ölüblər;
• Ermənistan iddia edir ki, ümumilikdə milyon yarım erməni həyatını itirib;
• Türkiyə bu rəqəmləri şişirdilmiş hesab edir. Türkiyə “genosid” terminini inkar edir və bildirir ki, ermənilərin çoxu minlərlə etnik türk kimi Birinci Dünya Müharibəsi zamanı toqquşmalar nəticəsində həlak olub;
• Gürcüstan erməni genosidini rəsmən tanımayıb.