Ermənistanın cənub bölgəsinin sakinləri baş naziri regiona buraxmayıblar: Sünik niyə qiyam qaldırıb?

JAMnews

Yerevan

Ermənistanın baş naziri Nikol Paşinyan ölkənin cənubundakı böyük şəhərlərə səfər edə bilməyib. Sünik vilayətinin sakinləri Yerevan-Qoris yolunu bağlayıblar və baş naziri regiona buraxmayıblar. O, bağlı yolun üzərindən vertolyotla uçmalı olub.

Öncəki gün o, Facebook səhifəsində yazıb ki, bazar ertəsinin iş gününü Sünikdə keçirməyə, Meğri, Qafan, Qoris, Sisyan şəhərlərini ziyarət etməyə, sakinlərlə və yerli özünüidarə orqanlarının nümayəndələri ilə görüşməyə hazırlaşır.

Amma baş nazirin səfəri Sisyan şəhəri və Sarnakunk kəndi ilə məhdudlaşıb. Qalan yerlərə getməyib.

Bütün təfərrüatlar – Sünikdə nə baş verir, niyə baş nazir səfərini yarımçıq qoymaq qərarına gəlib, keşiş isə ona əl verməyib?

Sünikdəki vəziyyət

İkinci Qarabağ müharibəsinin nəticələrinə görə Ermənistanın Sünik vilayəti ilə sərhəddə yerləşən Dağlıq Qarabağ ətrafındakı Zəngilan rayonu Azərbaycana təhvil verilib. İndi burada sovet dövrünün inzibati sərhədləri üzrə demarkasiya və delimitasiya işləri aparılır.

Nəticədə Sünik vilayətinin Qoris və Qafan şəhərləri arasındakı yol bir neçə yerdə Azərbaycan ərazisindən keçir. Bundan başqa, Qafan şəhərində aeroportun bir hissəsi də yeni sərhədə əsasən Azərbaycan ərazisinə düşür.

Qafan meri Gevorq Parsyanın Ermənistanın Müdafiə Nazirliyinin dekabrın 18-də axşam verdiyi şəhərin yaxınlığındakı “əlverişli yüksəkliklərdə” yerləşən hərbi postların təhvil verilməsi haqda sərəncamını elan edəndən sonra vilayətdə etirazlar başlayıb.

Mer bəyan edib ki, bununla belə Azərbaycan SQ Ermənistan sərhədinə yaxınlaşacaq və bir kilometrdən daha az məsafədə yerləşəcək, Qafandan yaxınlıqdakı dörd kəndə: Xdrants, Qafan, Yeqvard və Ujanisə gələn yol isə “düşmən ərazisinə düşəcək”.

Dekabrın 20-də axşam Qoris şəhərinin meri Aruş Aruşanyan Sünik sakinlərini “erməni torpaqlarını təhvil verən adamın vilayətə gəlişinə imkan verməməyə” çağırıb.

“Bu, siyasi yön, nə də hər hansı partiyanın təşəbbüsü deyil, bu, sünikliləri ləyaqət, təhlükəsizlik və fiziki mövcudluq mübarizəsi, ümumerməni itaətsizliyinin ifadəsidir”, – mer Facebook səhifəsində yazıb.

Hadisələr necə cərəyan edib?

Dekabrın 21-də səhər məlum olub ki, Qoris meri saxlanılıb, həmçinin Aruş Aruşanyan haqda cinayət işinin qaldırıldığı haqda da informasiya yayılıb.

Bununla yanaşı merin müavini İrina Yolyan bildirib ki, Aruşanyanın vəkilləri polisdən onun haqqında heç bir məlumat ala bilmirlər.

Bu arada Nikol Paşinyan Sünikə getdiyi zaman yoldan Facebook səhifəsində canlı yayım açıb və bildirib ki, vilayət sakinlərinə hörmətini ifadə etməyə və onlarla açıq danışmağa gedir:

“Mən yaranıza duz basmaq yox, sizin suallarınıza cavab vermək niyyətindəyəm. Sizin qarşınızda vəzifələrimi tam yerinə yetirmişəm və yetirirəm. […] Vurğulamaq istəyirəm ki, Sünik ərazisindən bir millimetr də verilməyəcək”.

Amma baş nazirin sözləri Sünik sakinlərinə təsir etməyib, yol bağlı qalıb. Sünikə polislərlə dolu ondan çox avtobus cəlb olunub. Burada yolu bağlayan sakinlərlə polislər arasında ara-sıra toqquşmalar baş verib.

Nəticədə hökumət başçısı baryeri vertalyotla aşıb.

Baş nazir haralarda olub və nə deyib?

Nikol Paşinyan əvvəlcə Sarnakunk kəndinə gedib və yerli sakinlərlə Azərbaycanla sərhəddə baş verən proseslər haqda danışıb:

“Belə alınıb ki, Qoris-Qafan yolu Ermənistan və Azərbaycanın sovet sərhədlərindən keçir. İndi orada bizim sərhədçilərimiz yerləşib, yolun təhlükəsizliyini və işləkliyini həmçinin Rusiya sərhədçiləri də təmin edəcək”.

Sisyanda baş nazir müharibədə həlak olan əsgərlərin məzarları üzərinə gül dəstəsi qoyub. O, burada da sakinlərlə ünsiyyətdə olub və sərhəddəki vəziyyəti izah edib.

Onun sözlərinə görə, hazırda sərhədlərin demarkasiyası hələ ötən hakimiyyət tərəfindən 2010-cu ildə qəbul edilən Ermənistanın inzibati-ərazi bölünməsi qanununa əsasən həyata keçirilir.

Sisyan şəhərinin sakinlərinin bir hissəsi baş naziri xoş qarşılayıb. Onlarla söhbət zamanı o, Sünik vilayətinə səfərini yarıda saxlamaq qərarına gəldiyini bildirib. Nazirlər Kabinetinin rəhbəri öz qərarını təxribata uymaq niyyətinin olmaması – xüsusən də ölkədə 19-21 dekabrda matəm elan edildiyini nəzərə alaraq – ilə izah edib:

“Mən əminəm ki, mən Qoris və Qafana getsəm, məni sizin kimi qarşılayacaqlar. Amma eybi yox, bugün olmasa da, gələn dəfə olar. Qoris, Qafan, Meğri öz yerində qalacaq. Onlar qəsdən yolları bağlayıblar ki, mənim bu [şəhərlərin] sakinləri ilə görüşüm baş tutmasın, çünki orada da belə qarşılanma olacaqdı”.

Keşişlə bağlı olay

Amma Sisyanda heç də hamı baş nazirin gəlişinə şad olmayıb.

Surb Qriqor Lusavoriç (Müqəddəs Maarifçi Qriqori) kilsəsinin rəhbəri Parqev Zeynalyan baş nazirin əlini sıxmayıb və baxışları ilə məbədi tərk etməsinə işarə edib. Bu olayla bağlı video şəbəkədə yayılıb.