Bu qətliam sənayesini durdurmayınca özümüzü inkişaf etmiş insanlıq adlandıra bilməyəcəyik

“Novaya qazeta”nın müxbiri Moskva fəallarının hinduşkaların quş fermasından azad edilməsi aksiyasını çəkib. Rusiyada zoo-müdafiəçilər ilk dəfə açıq hərəkət edib və üzlərini gizlətməyiblər. Bu format dünyada “open rescue” – “açıq xilas” kimi tanınır.

Video niyə üzlərini gizlətmədiklərini izah edən gənc fəalın bu sözlərilə başlayır: “Əgər sən üzünü gizlətmirsənsə, bilə-bilə ki, sənin əməlin qanuna ziddir, amma haqlı olduğuna tam əmin olduğun üçün yenə də riski gözə alıb özünü gizlətmədən buna gedirsən”.

Altı dəqiqəyə yaxın süjetdə zoo-fəalların gizlicə quş fermasına girərək Şükranlıq günü üçün kəsilməyi gözləyən bir neçə hindtoyuğunu özlərilə götürüb çıxdıqları əks olunub.  

“Baxın, onları necə pis şəraitdə saxlayırlar, bütün həyatları boyu bu quşlar qaranlıq, qapalı yerdə qalır, lazımı çəkini alandan sonra isə öldürülürlər…”, – fəallardan biri deyir.

“Rusiyanın ilk azad olunmuş hinduşkası, konslagerdən, quş fermasından xilas oldu…”.

Fəallar bu quşlara qayğı göstərib, onları sağaldandan sonra azad edəcəklərini deyirlər.

“Əlbəttə ki, onların hamısını xilas edə bilmərik, ancaq onlardan bir neçəsini ibrətlik olaraq azad edirik…”.

“Quşların üçünün də ayağında problem var, çünki onlar raxitlik keçirib. Əslində müalicəsi çox asandır, onları dəstədən ayırıb, kalsium vermək və ayaqlarını tərpənməz vəziyyətə salmaq lazımdır. Amma hindtoyuğu olduqları üçün sahiblərinə görə onlar quş deyil, ətdir. Əti müalicə eləməyin isə mənası yoxdur”.

Fəalların bildirdiyinə görə, onların mübarizəsi bütünlükdə maldarlıq, quşçuluq sənayesinə yönəlib və “bu zorakılığa son qoyulmayınca insanlığın inkişafı haqda haqda danışmaq mümkün deyil”.